Iburu 10
10
1Ande Isaraelimi mandu rangala pae alinuna Rudule Angelemere ande werepe epola pea epepe alenu ora rendepona na-manda meaya. Go angeleme pa manda mu koyaya. Wenaalimi mo Rudule Angele ralialo ara kuni gipayalosi alinau puarimiya. Go peapare go au pameya eimi nimuna koae aunu na-randepeaisaya.
2Gode repara yainya puaeme wenaalina koae einu randepeala payalore gore nimuna koae einumi nimu yala na-mula pame. Gupuma Gode repara alinau na-pula pame. 3Go einare kuni gipayalosi alinau puaeme einare nimuna koae einu peme ei kone ma-siala puaya. 4Akepeare gawa menanuna weeme pange nanigosi menanuna weeme koae einu na-randepealia.
5Go eina reenare Yesu go suna epolamere Gode para gupi lisaya.
Apa Gode neemere nee para alinau puaeme ei pange
nee para gidame alenuri gipia de.
Gupuma nena ranare neeme ali aluma
suna epano kone wili.
6Aarinu pange alinau puaeme pereaya lena mandaa
luambu kiraya einu pange koae einu
randepelenayanda alinau pea aunu pange gipia de.
7Gupumare neme gupi le. Godeo nena rana pi einu
raduale ni gonda ae le.
Gurupare ande Rudule Angele wia bukana lea rupa.
8Ande angele ralialo ara alinau pademe einare ririnare gupi angele lea.
Aarinu ma-ipuma Gode repara ada eiri giada da.
Ande repanana kirada alenu pange koae alenu
randepelenayanda alinau pada alenu raayo giada.
Ande Rudule Angeleme pipape le aunuyapare gole.
9Gupuma wala werepe gupi da.
Godeo ni epe auri nena rana pi ei raduame ipulu lea.
Gupuma Yesu nipuri ririna aunu pane yoko rumbuma pena aunumi ropo pea. 10Yesu Keriso nipuri Godena rana ralialo ara nipuna do rana komea alinau paya. Go einare naa yaakopi wenaali ma-aya.
Yesu Kerisona dome alinau pea aimi komea koae einu randepelea
11Alinau puaeme alinumiri nimuna pupudenginu naare raayosi noaeme. Gupuma mendaa alinumi naare raayosi alinau pao-aeme. Go peapare go alinau peme einumi koae einu na-randepelea. 12Yesumi rana komeasi wenaalina koae einu mealuame komisaya. Go rana komea pisaya aumiri werepenu pange ora pa wamo pualia. Gupuma nipu ambia Godena popeke ki nane pia. 13Gurupa pa piri Godeme nipuna yanda runguli alinu nipuna rolo para ma-pirainyayanda maisambao aya. 14Nipumi randepeaya repaare ora epe wenaali ainya lea. Go eiri alinau rana komea pisaya eimi pea.
15Epe Yaakopi Sipiridimi pange naa para gupi lea.
16Werepe neme nimu rapu pena angele menda lo
koro sula lea.
Nimuna pu rupara nina rudule angele kone ma-sialua
angele Realimi lea.
Gupuma nimuna konenu para pange
kone ma-sialua lea.
17Gupuma nimuna koae aunu para pange
neme kone na-sula lea.
18Go einare go koae einu Godeme kone na-wiandare gore koae einu randepe ainyayandare alinau pia auri go perelea.
Gode repara epaminya lea ei
19Yesu Keriso komisaya eimiri ande ambalande alinau puaeme alinumi pua kondo pambala pisimiyande Yaakopi Anda panda para pange manda pua kondo pambala pilima. 20Yesumi pena pora piaisaya. Go pena porare endoaya pora. Go eiri nipuna dome pisaya.
21Go Godena Andare alinau puae Kalu Ali mendame go andere-ayanda. 22Nipuna weeme naana lo rombanu randepeaya. Gupuma epe ipame naa randepeaya. Go eina yayapi aunu giaoma ora nipu repara kone rulaoma bainya. 23Naame naana kone rulao-aema eina pange naana maisambao-aema ale laapo waru irulu ripinyaminya. Gode nipuna wili mandaa meaya au ora pilia kone suma maisambao-aminya. 24Menda menda repara rambamea aunu waru puma pu alo paminya.
25Ambia ambala pima rupa menda menda rapu mombedama aunu na-giaminya. Mendane wenaalimiri go au pi au apo giada aemenda. Ande Realina Epola Pea Naare repara dandare menda mendana lo romba puri ma-palaminya.
Godena Naki para kou na-walaminya lea ei
26Ande Godena ora angele pangalo arayapare gole koae aunu pa pairi pelemandare gore go koae aunu randepe ainyayanda alinau menda na-pilimi. Akepeare manda na-randepedea. 27Ambiare pa ali rali pula epelea di komea maisambao pidima. Gode repara yanda diame wenaali nimumi paalame komoma alimi. Akepeare repana ora andaai para pua releme. 28Ande ambalande Mosesimi walisayande angelenu rungulala pisimiya wenaaliri luma komala pisimiya. Ali laapo o andapuna lee rona go au pisimiya ei andoma go alinumi koda lala pameyanda luma komala pisimiya.
29Go einare ande Godena Naki Yesu repara kou wadea aliri ale kone wilimapae. Go alimi ora koae au andelea. Ande Yesumi pena angele lo koro wisaya weemere go alina koae aunu randepea. Go pula peapare go alimi koae aunu pa pairi peleandare gore Yesuna komea eiri go ali reparare ale menda dia. Gupuma ande pakama yarame komala Yaakopi Sipiridi para koae au pia.
30Ande go lisayande aliri Godeme lea loma naa kone wima.
Neme yango ora mula.
Ni para koae aunu peme rupa neme pange nimu para go au pulua lisaya.
Realimi nipuna wenaali rali pilia.
31Naame koae aunu pilimandare ande endoma aya Godeme naa kaipa na-lalia.
Kone rulada au waru paminya
32Go peapare ande ambalande pisande aunu kone waru sialepape. Ande Godena paa meamende dina para lalo. Go naarena nimi repara ora pu rendaa pi pupudengi gisimi. Gupuma nimimi rendaa ora andaai nalo arayapare gole ora puri paloma arimi. 33Naare mendanare wenaalina lee rona ma-arimi. Gupuma nimi ero lala pisimi. Naare mendanare gurupa rendaa meala pame wenaali rambameala pame. 34Dipula pirame repaa pange yarame komala pame. Naare mendanare nimina alenu pange pera meala pamepare golere raname komala pame. Akepeare nimina kone sialore ora nimina kone rilao-aeme ririna alemere nimi ma-siao pia kone suma go aunu pala pame. 35Go einare go nimina kone rulaeme ei ora na-gialepape. Werepe ora yangi andaai milimi. 36Godena angele raidaminya puri waru paloma alepape. Gupuma ambalande Godeme gula lande ale mealiminya puri waru paloma alepape. 37Godena angele wia bukamere gupi lea.
Ora ae. Ande epola lande ali repara epelea.
Go au pulu pea eiri pa mo pare aoma diayapare
ora go repara gole pilia.
Nipumi na-maisambo ao-alia.
38Go peapare nina rendepona aya aliri
kone rulaoma aya. Go einare endoma ao-alia.
Go peapare ni para kou wadea repaa para
raname na-komola.
39Go peapare naare paalame na-komoaema. Go eimiri na-alu pilima. Naana kone rulaema einare naa rambamilia.
Currently Selected:
Iburu 10: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
