1 Dimodi 4
4
Mo pereke pereke alinuna angele wi ei
1Ande Epe Yaakopi Sipiridimi angele loma penameyao gurupa walisaya. Werepenuri wenaali menda para Gode para kone rulae ei ora gialimi. Gupuma nimumi mo pereke pereke remonuna angele pangeleme pange mo koae remonumi wademe aunu pilimi. 2Gupuma mo pereke pereke angele loaeme alinumiri pereke pereke aunu waloalimi. Nimuna konenuri raayo perelea eimiyalo arare nimu koae aunu pimalo pangere pename na-andeleme. 3Gurupa waloaeme alinumiri wena lamuape einare rudu deme pange enda go enda nainya go ei na-nape deme. Go pemepare Godemere ora angelenuna reenu kone sumare nipu repara kone rulaeme wenaalimiri ranae angele lomare mandana neleme lea. 4Go einare alenda alenda raayo Godeme wapea alenu raayosi epelea. Go einare ale menda na-gialima. Olemole raayosi ranae angele lomare pa nelema. 5Akepeare Godena angele kone siala ara pange yainya pala ara ranae demandare gore Gode repara manda pilia.
Yesu Kerisona ora epe pupudengi nao-ae ali ape eina angele lea ei
6Go einare neeme nena yangonu menda para go angelenu ladendare, gore neere ora epe rupa ara Yesu Kerisona pupudengi nae ali alie. Gupuma Godena angelena kone rulae eina pange ande kone waru wia einu wale einuna puri andaai ora mili. 7Go peapare mo wenagaenumiri ree na-wi pakama angelenu loaeme. Go angelenuri na-pange kou wadapape. Gupuma Godena aunu andape eina puri waru palape. 8Neere kone wili, do yongale puri ma-palaluame nalama pupudengimiri pa engepusi rambameala ei komea. Go peapare naana remonu puri ma-palaluame nalama pupudenginuri ora epelea. Akepeare ambia go mula pema endoaya ei raidipunana wili mandaa angele la wia. 9Go angelere ora angele lea ei wenaalimi raayo muma kone rulainya. 10Go einare Godeme wenaalinu raayo mulame rapoaya. Go peapare Gode nipu para kone rulaema wenaalinu komea milia. Naame Gode na-kome pa aya Gode repara kone rulao-aema. Go ei komea kamana komea pupudengi andaai noaema.
11Neeme nimu go gialo angelenu go au pipa lo pange go mongeriado einu pange raayosi walape.
12Neere pena nakiyapare wenaalimi nee na-lu pambainyalape. Keriso wenaalimi nee andoma mongelena nena angele pange nena ao-ale rupa pange nena pu ade ei para kone rulada ei rayo ora rendepona ora pamuape. 13Go einare neeme ni maisamba arare, neeme Godena angele puri waru paloma yarepema wenaali raayo para waru walape. Gupuma nimumi epe aunu pinaya neeme ora epe rupa kone winya rupa mongeriape. 14Ande Keriso wenaalinuna kalu alinumi nena kaluna ki siala ara Godena puri gisimindele go ei na-minya palape. 15Go aunu mongeando palainya narele perelena lalapape. 16Nena pili aunu pange mongeriade aunu pange waru andalapape. Go au laapo pa pa eiri pope. Akepeare neeme go au pilindare gore nena pange nena mongeriade repaana kalu pape poale.
Currently Selected:
1 Dimodi 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
