1 Dimodi 5
5
Mo wenaali ma-epeape epe aununa angele lea ei
1Yomogae ali repara rendaa pi angele na-lape. Go au na-piri kuma pi rupasi nena apa para loale rupa lape. Pena nakinuri nena amenu repara pu ale aunu palapape. 2Gupuma ambalana wenanuri nena ama repara pu ale aunu palapape. Gupuma pena nongo wenanuri nena ainyanu repara pu ale rupa epe aunu palapape.
Mo alinu ma-komae waisa wenanuna angele lea ei
3Wena mendame nipuna ali komenaloma, nipuna kunuma aliandare, gore go wena waisa waru epe rupa wamopape. 4Go peapare waisa wena menda nipuna nongo nakinu ao pange go nongo nakinuna si wanenu menda alimindare gore go nongo nakinumi go eina kone waru winya. Nimuna ara anginu ambala wamo puma ainya. Go au pi auri gore nimu andere-aisimiya eina yangi. Godeme gurupa aunu raname waru komea.
5Gupuma wena menda nipuna ali komenaloma nipuna kunuma aliandare gore go wename go aunu pilia. Nipumi naare raayo Gode para kone rulaoma ara naarena pange rimbala pange Gode wi loma nipumi yainya waru pualia. 6Go peapare wena mendame nipuna ali komenaloma waisa piri nipuna do yongalena kone pea einu pualiandare gore go wenare nipuna remo ambala kome wena aya. 7Go einare gupi wenanu para mo mana angelenu waru lape. Go au pilindare mendame go wenanu repara rondo menda aeya ei na-andeleme. 8Go peapare menda ali apimi nipuna repaa wenaali pange ora nipuna komea para mandinu pange kou wadeandare gore nipuna aunuri ora koyoma kama nane aeme wenaalinu pange lu angulaya.
9-10Go einare mo ali ma-komae waisa wenanuna binu wia parare kuni gipa ali ria repo wandualapi waisa wenanuna bi komea siala pipape. Go eina ralaore nipuri ali rana komea puma nipuna aunuri ora epe aunu komea puae wenana bi ma-wape pipape. Gupuma go wena nipuna si wanenu pange ora epe rupa mandu mandayaoma nipuna anda para pange lee para na-ande wenaali pange ipulupa loma nipuna Keriso yangonu repara epe aunu puma pange koae yandanu andoma piri wenaali rambameala puae wenana bi loma wape pipape.
11Go peapare mo pena nongonu ali ma-komae nongonuna binu go para na-wape pape. Ora dia. Gore akepeandare nimuna rana pea einu pulameyandare Keriso repara kou waloma ali peleme yanda lalo. 12Go au pilimindare mo nimuna ambala ririna nipu repara wili mandaa meamende ei rungudimi. 13Go einu pu eiri pula ara aunu menda gurupa peme. Nimuri gimi waru komala ara wenaalinu raayona anda paranu anda pora gape yalaeri pamu aeme. Gupula ara ora koae au mendare nimumi lame lame waru lo peme pange na-lape aunu pange waru lopeme. 14Go einare nina koneme mo pena wena waisanu nimumiri alina anda ambe puma ara naki nongonu manduma pange nimuna andanu waru andere-ainyaya lalo. Nimumi go einu ora pilimindare, gore yanda runguli ali mendame naa koyaluame koae angelenu loma au menda naa para ora pape-na-ya. 15Akepeare wena waisa mendapareme mo epe rupa kone rulaoma aya ei giaoma Sadanina kone pea einu ambala peme. 16Go einare Keriso repaa menda nimuna rupara waisa wena menda aliandare gore nimuna gole andere-ala pinya. Go eiri gore wala mo Keriso wenaalimi wala mo mendame na-andere-ae wena waisanu kome andere-ainya yanda wala kenda menda ma-rialimiya lalo.
Kalu alinuna angele wi ei
17Kalu alinu pupudengi waru naleme alinuri yangi waru alala pipape. Ambala ririna yangi ada peme repaare mo Godena angele walaluame pupudengi naleme alinu ambala yangi adapape. 18Go eiri mo Godena angele wia bukame lea ei naame kone wima.
Gawa mename guni lu rambualiandare neeme
guni napanaya angaa na-korape lea.
Go ei mandare,
Pupudengi nala alimiri nipuna yangi ora milia.
19Ali mendame lalo ara lalo, Go kalu alimi go pa deandare go ei na-pangape. Go peapare ali repo pange laapo menda mendaa angele demendare gore neeme go angele pangape. 20Go peapare kalu alinu mendame koae aunu piliare, gore nipuna koae auri mo wenaali ambunana lee rona wamo pipape. Go au pilimindare menda parame wala go au na-pilimi.
21Go eina neme Godena lee rona pange Yesuna lee rona pange ande yaakopi eindiolo alinuna lee rona neme ora lalo. Neeme go pupudengi waru nape. Go eina go angelena ree menda ambe na-wali arare e ora da o e payapo da angele ambe na-lape. Gupuma pa wenaali repara rendaa rendaa pi angele lala ara nena wenaali repara komea kuma pi angelenu na-lala pape.
22Go einare neeme ali menda wangepu muma kalu ali ainyaya ambe na-ma-mape. Ali mendana koae einu rapu nee na-ma-ralape. Gupuma neere yaakopi rupa ape.
23Go einare ipa kama na-nala piri koro mendamere waini ipa ongepusi nena lo ma-epeainya mula mula leale nala pape.
24Alinu menda paranu koae einuri ora pename wia. Gupuma nimuna koae einu ambala ririna reko aya. Go einare naame nimuna puaeme einu wangepu ando-aema. Go peapare wenaali menda parana koae einuri ambe wangepu na-wale kundiri waru puma ora werepe nane penameyao walala pea. 25Go einare mendaa rupa ora aunu peme einu pange penameyao walea. Gupuma penameyao waru na-andalema einu pange na-panga wilimi.
Currently Selected:
1 Dimodi 5: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
