1 Dimodi 3
3
Keriso wenaalinu andere-aeme alinuna angele lea ei
1Go angelere ora angele gonda. Ali apimi Keriso wenaali andere-alua kone wiliandare, gore nipumi ora epe pupudengi nape eina kone sualia.
2Gupuma go ali nipuri nipuna aya ei rupara pa aunu pea einu menda na-anda wilimi. Gupuma nipuri wena komeana ali alia pange nipuna kone para aoma ao-alia pange lee para na-ande alinu pange nipuna anda para ipulupa loma ao-aya ali alia. Gupumare nipu waloae ali mandana alia. 3Gupuma nipuri koae ipa waru noae ali na-alia pange rendaa rendaa na-pi ali na-aere kuma kuma puma kuma pe einu rupara alia. Nipuri muni repara kone waru rulae ali na-alia. 4Gupuma nipuna wena nakinu waru andere-ao-ae ali alia. Gupuma mo nipuna naki nongonumi pange nipuna angele waru pangena loma karu alia. 5Go einare ali mendame nipuna wena naki waru na-andere-aliandare, gore mo ali nipumi mo Godena Keriso wenaali nipumi akepuma epe rupa andere-aliayapae. 6Gupumare pena Keriso alinuri Keriso wenaalinu na-andere-ainya dapape. Nipumi ni komea ayo loma ako dia naarenare Godeme ande Sadani pisaya rupa ralipuma pane ma-alia.
7Gupuma nipuri Keriso rupara na-ae kama nane aeme wenaalinumi pange andasiaoma andoae ali alia. Go aunda na-pi nipu bi na-wi ali deandare gore Sadanina konana relea.
Keriso wenaali rambameala ara pupudengi nademe alina angele lea ei
8Go einare, mo Keriso wenaalinu rupara pupudengi naleme alinuri ora epe bi wi alinu komea alimi. Gupuma mo alinumiri angele laapo repo leali na-ainya pange koae ipa waru na-nena. Ni ni loma mo wenaali mendana muni mena sekere olemolenu yolo mipi puma ao-ae alinu na-alimi. 9Nimuna pu para epe kone wi alinu aoma Godena angele waru ripinya ara kone rulaoma waru alimi. 10Go eina mo pupudengi nape alinumi pimi aunu ambala waru wanino andala paminya. Gupilimipare nimumi ora epe rupa pupudengi nelemendare gore nimumi Keriso wenaalinu andere-ae alinu manda alimi. 11Nimuna wenanu pange epe aunu komea puma nimumi lame lame na-lo pange nimumi epepe aunu komea pamu pilimi. 12Mo Keriso wenaalinu rupara pupudengi nola peme alinuri wena komea lami alinumi koma pilimi. Gupuma nimuna wena nakinu ora waru andere-ala pilimi. 13Mo alinu nimumi epe pupudenginda nelemendare gore nimuri ora epe bi wi alinu alimi. Gupilimindare gore nimumi Yesu Kerisona angele puri pale rupa yalame na-komea walala pilimi.
Godena kundiri pea eina ree angele wia ei
14Ora laloe, niri ambia go ramayo wape pula piri nee repara epolameya kone ma-ririyado ae. 15Go einare pa angele lalo. Ni wangepu nee para ambe na-epolare, gore neeme go ramayo wape andoma Godena wenaalinu rapu mendaa para ara epe rupa ala pele eina laloe. Godena repaare mo na-kome pa ae Godena Keriso wenaali para lalo. Go repaare puri pale pingi mandana Godena ora angele ria aeme. 16Mendame ande Godena angelena ree la yoke eiri mendame na-ande pa wanduapenaya. Go eiri gurupa.
Nipuri ora ali mandana penameyaoma ipisaya.
Mo Yaakopi Sipiridimi go eina ree ora ei loma
penameyao walisaya pange
eindiolo alinumi nipu andisimiya.
Go eina nipuna angelere wenaalinu raayosi para ipisaya.
Gupuma nipuna angelere su kuni para raayosinu
wenaalimi kone rulaisimiya.
Gupuma nipu wala so yaa nane ma-paisaya.
Currently Selected:
1 Dimodi 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
