1 Dioni 4
4
Godena Yaakopi Sipiridi pange yayapi remo laapona angele lee ei
1Ora na andamio, payapo angele loma alinu andapu su raayo para pamualeme. Go eina ali raayona angele kone na-rulalepape. Nimumi lalore, Ni Yaakopi Sipiridi pia deme. Nimuna Sipiridiri ora Gode para epea palo la andalepape. 2Nimimi ora kone wilimi, Godena Sipiridi siambae alinumiri gupi deme. Yesu Kerisore ora Ali ipisaya deme go alinuri gore Godena Sipiridi siamba-aeme. 3Yesuri ali leale go suna epaya pinda na-dea ali nipuri Godena Sipiridi nipu rupara na-pia. Nipuna rupara pia remore ande Yesu Kerisona yanda runguli remo. Go remore ora epelea angele pangame lee eiri ambiare ora penameyao ipuma pange go suna go epa aya.
4Ora nina enge nongo nakinuo, nimiri Godena ei go einare payapo angele leme alinu ambala rambuame. Go Sipiridi nimi para pia eimi mo suna alinu para pia Sipiridi ma-lombae paya. 5Go eina go alinuri su alinu komea aeme. Go peme einare nimuna angelena pange suna eina angelenu komea loaeme. Go eina su alinumiri go suna angelenu waru pangeleme. 6Naare Godenai. Alimi Gode kone wiliare go alimiri naana angele pangelea. Goyapare Godena ali dia deandare nipumi naana angele na-pange lea. Go rombore naame kone wilima. Go eiri ora Sipiridimi da lo pange koae remome da lo pename ando pilimi.
Godere pu ada eina ree aya
7Ora na yangonu naame amenu para ora pu alaminya. Pu ada auri Gode repara ipula. Alimi pu ada au piliandare nipuri Godena si alia pange Gode kone wia. 8Alimi ame para pu na-adeare nipumi Gode para kone na-wia. Gode nipuri pu ada eina ora ree aya.
9Gode nipuna Naki ora komea aisayapare go suna epenaya rapaisaya. Gupisaya eimi su wenaali naame endoaya ei ora meamonoya pisaya Godeme pu gisaya eiri naame kone wima. 10Pu ada auri gupa dia. Naame Gode para pu na-adema. Pu ada auri gupa. Godeme naa para yarame komala ara nipuna Naki suna rapaisaya. Go pisaya eiri naana koae koae einu randepeainya pisaya.
11O ora na yangonuo, go auri Godeme naa para pu gea. Go eina naame pange naana amenu para pu alaminya. 12Ali mendame Gode ora pakama andapenaya. Go peapare naana amesinu para pu ademandare gore Godere naa rapu ao-alia. Go au pilimandare gore naame Gode para naana pumi kone waru wilima.
13Gode nipumi nipuna Sipiridi naa para ambala gea. Go pea eimiri naame kone wima ambiare naare Gode nipu rapu aema. Nipu pange naa rapu aya.
14Naame andamande ei pange walamande eiri Apa Godeme Si go suna rapaya eiri naa rambaminyaya rapaisaya. 15Go eina ali mendame lalore, Yesuri Godena Naki, loma nipuna angaame deandare go ali nipu rapu Gode ora raminyeke pa aya. Gupuma mo ali Gode rapu aya. 16Gupuma naame kone wima Godeme naa para pumi komea naame go eina kone rulaema. Gode nipuri pumi kome auna ree. Ali mendame pu ada aunu pualiandare nipuri Gode rapu aya pange Gode nipu rapu aya. 17Go eina pu ada aumi naa ma-rumbiao-aya. Go pe auri naame go suna alimandare Yesu aya rupa ao-paidima. Go au pilimandare gore angele yokanali pula pema naare andaai epeleandare naame ora paalame na-komelema. 18Go peapare Godeme nee pu giliandare gore neeme paalame na-komele. Ora pu ale eimiri paala pi einu ralu dia. Go einare ali mendame paalame komeleandare nipu rupara pu ada au na-wia. Akepeare paalame kome auri rendaa pi ei meape ei rapu runaya.
19Naame pu aloaema eina reere Godeme naa ambala pu gisayanda pema. 20Go einare ali mendame lalore, Nina pu kone raayo Gode para aloma ayo deapare nipuna yangosinu menda para nipuna pumi koae kone suma rono pangoaliandare go aliri pereke pereke ali aya. Ali mendame ora pakama Gode andape-na-ya. Ali mendame nipuna yangosi leeme andomayapare pu aloma yarame na-komeleandare gore go alimi Gode lee para pange na-ande aliri nipumi pu akipuma adeayapae. 21Yesumi naa para gea rudule angelere go ei. Gode repara pu aloaya alimiri nipuna ame para pange pu adea.
Currently Selected:
1 Dioni 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
