1 Dioni 3
3
Ambiare naare Godena nakinu aema
1Gode naa repara pu gea eiri kone sialepape. Nipumi naa repara pu gea eiri ora andaaiyalo arare naare nipuna naki nongonu lea. Go eiri ora lea. Go einayandare go suna alinumiri naa kone na-wimi. Akepeare go suna aeme alinumiri Gode kone ora na-wimi. 2Ora nina yangosinuo, ambiare naare Godena naki nongonu aema. Go pemapare werepena naame akipu alimapae. Go eiri ambiare naa mareapare go eiri kone ora wima werepe nanere Yesu go suna wala perekeya ipula ara nipuna wele kongapu rongona epeleandare gore go dinare naare Yesu nipu mandalima. Gupuma naame ora nipu aya rupa andelema. 3Yesu epenaya maisambaema wenaali raayome nimina pu kone waru randepema kake pi alinu ara mo Yesu nipu ora kake pi ali aya rupa aminya.
4Ali mendame koae au piliandare gore go ali nipumi Godena rudule angele wia ei ora runguda. Koae au pia eiri Godena rudule angele runguda. 5Reali Yesu au menda pange na-pi Godena Nakimi wenaalinuna koae einu wamu pulame go suna ipisaya. 6Go eina ali menda apimi Yesu para nipuna pumi kone rulaoma Reali para raminyeke puma alia alimi koae einu wala pulame kone wala na-wilia. Gupilimipare ali menda apimi Yesu para ara koae einu wala pala pulame kone siala puma wala pala piliandare go aliri naame pima rupa nipumiri Yesu waru na-andea.
7Ora nina enge nongo nakisinu nimi para koae angele loma perekeyo-aya alinumi nimi makirapana waru andere-alepape. Ali mendame ora epe au pulame kone sualiandare gore nipuri ora epe ali aya. Go einare gore Yesumi epe aunu pea rupa mo alimi pange go rupa ora epe au puaya ali aya. 8Ambaisena Sadanimi koae au pisaya. Go eina alimi koae au puaeme. Go aliri Sadanina ei. Godena Nakiri ambala ririna penameyao ipisaya. Nipu ipisaya eiri Sadanina pupudengi nisaya ei ma-lakepe rumbepe pu ma-koyaluame ipisaya.
9Go einare ali menda api nipuri Godena naki deandare nipumi koae aunu pa na-pa eiri pualia. Nipumi koae aunu na-pea eiri Godena endoaya ei nipu para pianda nipumi koae aunu na-puaya. Godere nipuna Apayandare nipumi koae aunu pa na-pa eiri pualia. 10Go einu raayore naame kone ora wima ali menda api ora Godena naki aya pange ali menda apimi Sadanina ei aya go eiri naame ora andoma kone wima. Gurupa kone wima ali mendame ora epe aunu na-piliandare gore go ali nipuri Godena naki ora dia. Gurupa pange ali menda apimi nipuna amesinu para nipuna pumi yarame na-komeleandare go ali pange ora Godena naki dia.
Menda menda repara pu ada ei
11Nimiri ambalande angelere gurupa pangamende. Naame naana yangosinu para naana pumi yarame waru komoalepape angele pangama. 12Ambia naame Kaeni mandana na-aminya. Akepeandare Kaeniri Sadanina ali aisaya. Gupisaya rupa nipuna ora repara amesi lu komaisaya. Akepeanda nipuna ara amesi lu komaisayapae. Kaeni nipuna au ora kolisaya nipuna amena auri ora epelisayanda epe auna rono pangala ara ame lu komaisaya.
13Ora nina amenuo, go suna aeme alinumi nimi para yanda dimindare nimimi rungula mealo na-pambalepape. 14Naame ande komape ei wanduaoma endoaya ei repara epama eiri naame kone wima. Naame go ei kone wima. Akepeare amenu repara pu alo-aema. Ali apimi nipuna pumi kone suma yarame kome ei na-pualia aliri kome eina rupara pa aya. 15Go eina ali menda apimi nipuna amesi menda para nipuna pumi koae kone suma rono pangoaliandare nipumi go pia aumiri ora ali lu komanda au pia. Go au puma ali lu ma-komoaya aliri nimi ora kone wimi nipuri naare raayo Godena endoaya ei nipu rupara na-pia. 16Naana Reali Yesumi pange nipuna endoaya ei kone ambala na-wi nipuna pumi naa para yarame ambala komoma na-rambamulame go suna ipisaya. Go eiri ora pu ada ei. Go au ora pisayandare gore naame pange Yesumi go walea aunu pula ara naana suna dona endoaema einu para kone ambe na-wi naana yangosinu yarame komala ara rambamulame kone ara ririna ambala siaminya. 17Go peandare ali mendame go suna alenu waru andapu wi ali aliandare gore nipumi mo olemole menda na-wi narali ali menda aliandare mo olemole alenda alenda waru wi alimi mo narali ali para alenda menda na-adeandare nipumi Gode repara pu aloayo piri akepeanda deayapae. 18Ora nina nongo nakisinuo, naana amesinu menda para angeleme komea ora yarayoae angele naana angaame pakama na-laminya ora dia. Naana pu raayome yarame waru komala ara nimu para epe rupa pupudenginu pange ora epe rupa pala paminya.
Yesu para kone rulaya alimi Godena lee wilina paalame na-komelea
19Go eiri gore naame kone sialore, Naare ora eina rupara aema lo andelema. Gupumare go eimiri gore Godena lee rona kalu andasiaoma pelema. 20Naana koneme naa pa ao-pima deandare gore Godemere naana konenu pange lu angulaya. Gupumare nipumi olemole rayosi kone wia. 21Ora nina raminyasinuo, naana kone para alenda menda na-wiliandare gore Godena lee wilina naame ora epe rupa ara puri paloma ao-ala pilima. 22Gurupa ara alenda menda Gode para yainya pula ara konge demandare Godeme pange naa ora gilia. Akepeandare gore Gode nipuna kone pea ei pula ara pange nipuna angele pangoma pula ara demandare ora epedea. 23Nipuna rudule angele gupa. Naame nipuna Naki Yesu Keriso para kone rulaminya. Gupuma naame alinu menda para pu alaminya. 24Go einare ali menda apimi Godena angele pangoma siamba ara piliandare go aliri Gode rapu aya. Gupuma Gode pange mo ali rapu epa ao-aya. Gupuma Godeme naa para Epe Yaakopi Sipiridi ora ambala gea. Go Epe Yaakopi Sipiridimiri gurupa wada Godere naa rapu mendaa para raminyeke puma aya.
Currently Selected:
1 Dioni 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
