1 Dioni 5
5
Kone rulae alinumiri suna au rambualima
1Ali raayome kone rulala ara Yesuri ora Keriso kone wilimi go alinuri Godena sinu aeme. Ali mendame Ara repara pu adeandare, gore mo nipuna Arana nakinu para pange pu ada. 2Naame go au pilimandare gore naame Godena nongo nakinu repara pu aloaema lo andelema. Go eiri gore Gode pu aloma nipuna pipa da einu pangelemanda. 3Go eina naame Godena rudule einu raluma pilimare gore ora Gode para pu adama. Gupuma nipuna rudule angelere naa para rendaa na-pea. 4Akepeare Godena nongo nakinumiri go suna aunu mandana lu rambualimi. Go suna aunu naame lu rambuayo auri naana kone ruladema einumi mandana lu rambualima. 5Apimi rendaa puma suna aunu lu rambualiyapae. Yesuri Godena Naki kone rulalia, alimi komea manda lu rambualia.
Godeme penameya nipuna Nakina angele laya
6Yesu Kerisore ande ipame baparaisi au pisaya pange nipuna wee kolopelenaloma komisaya. Nipuri ipame baparaisi au komea na-pisayapare nipuna wee pange kolopelenaloma komisaya. Go eiri ande Sipiridi nipuna gole go eiri ora lea. Akepeare ande Sipiridi nipuri ora ree. 7Ale repome go au ora pisaya loma angele loaeme. 8Ande Sipiridi, ande ipa pange ande wee nimu repo raayome mendaa angele loaeme. 9Mo alinumi waleme angele repara kone rulaema. Goyapare Godeme walea angelere alinuna waleme angele ora lu angulaya. Go angele Godeme ambala walisaya eiri nipuna Naki Yesu para lisaya. 10Mendame Yesu para kone rulaliandare go alimi mo Godeme walisaya angele ora pangoma mea. Mendame Gode para kone na-rulaliandare go alimi Godena Naki Yesu repara Godeme lea ora ree angele lea ei na-pange. Go alimiri gore Godere yayapi loaya ali da. 11Go lea angelere Godeme walea eiri gupa. Godeme naa para naare raayo pa ao-ape endoaya ei gea. Go endoaya eina reere Si Yesu para wia. 12Ali apimi Godena Naki para raminyeke puma aliandare go ali para mo endoaya ei nipu para ora wia. Go peapare ali menda apimi Godena Naki para raminyeke puma na-aliandare mo endoaya eiri mo ali nipu para ora na-wia.
Endoaya eina pa ari pope ei
13Nimi Godena Si Naki repara kone rulaeme repaa nimi pa ari pope endoaya ei ambala meme ei kone sialiminyaya nimi repara wape pi. 14Godena lee rona paala paalame na-komelema. Gupuma ara naame Godena kone pea ei pula ara ale menda kongeyala ara yainya pilima ei ora waru pange lea kone wilima.
15Naame nipu konge lema dinare nipumi naame dama aunu pange go eiri ora lea. Gupuma pange naame kone wima naame nipu repara konge dema alenu ora guaya.
16Goyapare ali komeame nipuna ame pa ana na-pi au pilia ei andeleandare go ei pa ana na-pi aumi nipuna remo komape nano na-piliare gore Gode para yainya painya. Gore Godeme go ame para endoaya ei alena. Go eiri nipuna remo na-komape nano pi koae aunu piliminda komea go au pape. Go peapare nimuna remo komape koae einu pange apo supea neme nimi para gupi eina yainya pipape pi na-lalo. 17Pa aunu pi einu raayosimi koae aunu mula pelepare koae aunu raayosimi nena remo na-lu komalia.
18Naame kone wima Godena si wanenu mendame koae aunu pa na-pu eiri pelea ake peare ande Godena Si Naki nipumi andere-aya. Go einare ande koae Sadanimi na-waralia.
19Naame kone wima go suri koae remonumi su rumbemepare naare Godena ei aema.
20Godena Naki go suna ipisaya eiri naame kone ora wima. Gupuma nipumi naa para epe kone naa mongeriaoma kone ma-siao-aya. Gupuma naame Gode ora aya loma andomonoya gupunuya. Gupuma ambia naare Gode rapu raminyeke puma aema pange nipuna Naki Yesu Keriso rapu raminyeke puma aema. Go Godere ora Gode komea go endoaya ei naare raayo ora pa ao-ape eiye.
21Ora nina enge nakisi nongonuo, nimi yayapi godenumi nimi ma-koyapana waru andere-alepape.
Currently Selected:
1 Dioni 5: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
