1 Dioni 2
2
Kerisore naana rambami
1Nina enge nongo nakinuo, nimimi koae koae aunu pilimiyandare neme nimi repara wape pi. Go peapare mendame koae aunu menda piliandare gore naa Rambameape Aliri gore Apa Gode rapu ao-aya. Go aliri Yesu Keriso, ande rendepona pamuaya ali.
2Nipumiri naana koae einu raayo ambala wamo puma pereyaya. Go pea eimiri naa komea wamo pulame na-pea. Ora diayapare su wenaalinu raayo rambamulame pea.
3Go pea eina naame Godena angeleme rudule angelenu waru pangoma pilimandare gore naame Gode kone ora waru suaema, kone wilima. 4Go eina ali mendame lalore, Godere ni kone waru wi deapare gole nipuri Godena angeleme rudule angelenuri ora rendepona pangoma pi ali na-ae pakama angaa kambulumi deandare go aliri nipuna pu pange nipuna angaa kambulu nipuna gole makirada ali aya. Go pea eimi nipuna pu para Godena endoae ora epe angele na-pia. 5Go eina ali mendame Godena angeleme rudule angele wia einu ora rendepona waru pangoma piliandare gore go alimi Gode para nipuna pumi kone waru rulale ali aya. 6Mendame lalo, Niri Gode rapu raminyeke puma ayo, deandare gore go da ali nipuri Yesu Keriso pamisaya rupa ao-padia.
Alimi ame pu adeandare, paa pi ei para alia
7Ora nina andami alinuo, go rudule angelere neme nimi para wape pi. Go eiri pena angele diayapare ambaisena angele ara ambalande nimimi meamende. Go ambaisena rudule angelere nimimi ambala ririna pangamende. 8Goyapare go rudule angelere pena rudule angele neme nimi para wape pi. Akepeanda wenaalimi mo rudule angelena ora eiri Keriso rupara pange nimi rupara andoaeme. Go eimiri rimbale ei raluma ambiare ora paa pi ei epa wia.
9Go peapare ali mendame lalore, Niri mo paa pi ei rupara ayo, loma deapare nipumi nipuna amesinu para nipuna pumi rono pangala ara deandare gore go aliri koae rimbale ei rupara ora pa aya. 10Go peapare ali mendame nipuna amenu para nipuna pumi kone suma yarame waru komeleandare go aliri mo paa pi ei rupara ora aya. Nipu rupara nipu ma-lopala pea ale menda na-aya. 11Go peapare ali menda apimi nipuna ame para nipuna pumi rono pangoma koae kone su diandare gore nipuri mo koae rimbale para pa aya. Nipuri mo koae rimbale para puaya. Nipu pula pora para nipumi waru na-andala. Akepeare nipu rimbale para aya eimi nipuna lee rumbu pea.
12Na enge nongo nakinuo, Kerisona bina Godeme nimina koae einu ma-rumbaripa. Go eina go angele nimi para wape pi. 13Nimi apanu nimimi go alina ree kini pea ei kone waru sialepape. Ambaisena ririna ora paisaya pange ambia ora pa aya. Go eina ambia go wape pi ei nimi para rapadondae. Pena nakinuo, neme nimi repara ramayo wape pi. Akepeare nimimi ande koae remo ambala lu rambuariminde.
14Na enge naki nongonuo, nimimi Apa Gode kone waru wimi. Go eina nimi para angele wape pi. Nimi apanuo, nimimi go Alina reere kone wimi ambaisena aisaya pange ambia pa aya. Go eina angele nimi para wape pi. Nimi pena alinu, nimi puri wia pange Godena angele nimi rupara wia. Gupuma nimimi Sadani lombai paeme. Gore nimi para go angele wape pi.
Naana pu konenu su aununa na-alaminya
15Nimimi go suna aunu puaeme einu para nimina pu kone raayo go para na-sialepape pange suna olemolenu para pange nimina pumi kone andapu na-sialepape. Go peapare ali mendame suna aunu repara nipuna pumi kone ora sualiandare gore go ali nipumiri Apa Gode repara pu na-alia. 16Go su alina rana pea aunuri naame kone wima. Go aunuri go einu. Wenaalimi andoma wee pambademe alenu pange go suna alenu repara wenaalimi ako lambi diame aunu raayo Apa Gode repara ipula aunu diama. Go einu raayo go suna aunu. 17Go su pange go su rupara wia alenu wenaalimi wee pambademe alenu raayosi peredea. Go peapare Godena rana pia ei pilia repaare pa ao-alimi.
Yesuna yanda runguli alinu
18Ora nina enge nongo nakinuo, ambiare naare repara ora pereda. Nimimiri ambalande angelenu menda pangamende eiri kone waru sialepape. Yesuna yanda runguli ali epelea, loma pangamende eina lalo. Ambiare Yesuna yanda runguli alinu andapupe ambala epeme. Go eina ambiare naame kone wima, pereda pea ei repara ipula. 19Go wenaaliri naana repaa dia. Go einare naa minyapalariminde. Nimu naana repaayalore naa na-giala pame. Go peapare nimu puame eiri nimuri naana ei dia loma wadoame pamende.
20Go eina nimiri Epe Yaakopi Sipiridi ambala meme, gupuma nimi raayome go einuna ree ambala kone wimi. 21Neme nimi repara wape pu rapado. Akepeare nimi ande reere ora ambala kone wimi. Gupuma pange ande ora angele lee eina ruparare yayapi angele menda na-ralea.
22Go yayapi angele dapeya aliri apiyapae. Go angele da pea aliri gupi alimi dea. Yesuri Godena Naki na-aya, loma gupi angele da alimiri yayapi angele dea. Go ali nipuri Apa Gode pange Si Yesu pange ora gipia loma aya alimi go deandare nipuri Yesu para yanda runguli ali aya. 23Ali apimi Yesu Godena Si para giada ara kou wadeandare gore Apa Gode para pange kou waloma giada. Go pimipare ali menda apimi Si para kone rulaliandare gore Apa para pange nipuna pumi kone rulada.
Epe Yaakopi Sipiridimi ora epe angelenu waloaya ei
24Go angelenu ambala pangame. Go eiri waru siamba alepape. Ora nimimi ambala pangame angele siamba alimindare gore Si pange Apa niipu laapome nimi siamba ali pi. 25Yesu nipumi ale menda gulua angele gupa lea. Nipumi gilia eiri endoaya ei pa ao-ape ei gilia.
26Mo pereke angele loaeme alinu mendame nimi makirapanaya go angele nimi para go wape pinda.
27Gupuma pange nimiri Yesuna Epe Yaakopi Sipiridi ambala meme wenaali aeme. Go eina Epe Yaakopi Sipiridiri nimi rapu ambia go pa aya. Go peandare mendare ale menda nimi repara na-wadea. Ora dia. Epe Yaakopi Sipiridimi alenda alenda raayo nipumi nimi para anana wadea. Go Epe Yaakopi Sipiridina angelere ora epelea. Nipumi nimi para pereke angele ora na-wadea. Nimimi Epe Yaakopi Spiridimi walea eiri pangoma pipape pange Yesu Keriso para raminyeke puma alepape.
28Ee na enge nongo nakinuo, nimi nipu rapu raminyeke puma alepape. Go eiri nipu opopala pea naare epeleandare nipu andapeya yalame na-komaminya.
29Nimina kone wimi eiri Yesuri ora epe rupa rendepona aya Reali kone ora wimi. Go ei ora kone wilimindare gore go ei pange epeleapare ali mendame nipuna kone suma epe au piliandare gore go ali nipuri ora Godena naki aya.
Currently Selected:
1 Dioni 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
