Filiipu Siè 1

Tìɛníkɛrɔ́

1Hɔ̀ iè ǹpe Pooli àá Timote lɛ iè Yiezu Kirisa tɔntɛ́riè, ɛ́ te lepe vɛ̃hṹ sɔ lɛ ɛ́ wĩ́ ɛ́ ke ɛ̀ lɛ́ mípe lɛ ɛ́ wi hɔ Filiipu lóo hũn mìkùi kɛ́ mí bòo ɛ́ sɛ̃̀ Dɔfĩn, àá mí hándíe àá ɓɛ́pe mì Dɔfĩn zũnù bòo yìe lenliè. 2Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá miɛ ɛ̀ ɓɛ̀ lɛ́ hũn-wiɛ̀ miɛ ǹ.

Pooli ɛ́ Dɔfĩn ɛ̀ hɛ̃nin Filiipu lóo ńdɛsĩ̀riè bòo hũn

3Pɛ̃̀hṹ íe pɛ̃̀hṹ kɛ́ ń ɓen ɛ́ mì bòo ɛ̀ nùún, ɛ̀ ǹ wóò dé Dɔfĩn bɛrikɛ. 4Ń wóò hɛ̃un Dɔfĩn ɛ̀ lɛ́ miɛ ǹ fúu, ɛ̀ ǹ wóò wé hɔ́ àá tĩwiɛ̀, 5iè hɔ̀ lɛ ɛ́ mí yíiniɛ mi lè Bentĩnu buierɔ́ hũn, ɛ̀ dàá mìí lé hán wurù zɔn fúu ɛ̀ ɓen dɛ̃ zoòni. 6Ń dũ sãàniɛ kɛ́ Dɔfĩn lɛ ɛ́ te hɔpe tɔn-sãanù sɔ sí fìi ɛ́ ɓɛ́ mí tĩ́ihṹ ɛ́ ɓén lɛ́ ɛ́ mí ɛ́ tɛ́ hɔ́ fúu ɛ́ vɛ dɛ̃ pehɔ̀ vénlén kè Ɲunsɔ Yiezu Kirisa khũ̀á ɓenlɔ́ zɔn. 7Ɛ́ hɔ́ iè bòo lɛ ɛ́ cã̀aní ɛ̀ ǹ wóo nùún mí bòo kɛ̀amu, iè hɔ̀ lɛ ɛ́ mípe mìkùi bòo ɛ́ den wi niǹ tĩì hũn cɛ̃̀un. Mìpe mìkùi ɛ́ den yíiniɛ mi ɛ́ dàa tɛ́ hɔ́ tɔnlɔ́ lɛ ɛ́ Dɔfĩn àá mí hiì ɛ́ dɔ́ niǹ núnú hũn. Hɔ̀pe zoòni lɛ ń wi le kɛ̀sí hũn, ɛ̀ khíi páa hɔ́ lɛ ɛ́ ń dàa hṹn mí lé kɛ̀sí hũn, lɛ ń dàa ɛ́ hṹn lè Bentĩnu ɲunù ɛ̀ sɛ, ɛ̀ zɛ̃́ní kɛ́ lé iè bɔ̀berà, ɛ́ mí hɛ̀ yíiniɛ mi. 8Dɔfĩn ɛ́ dũ kɛ́ ń hɛ̀ ɛ́ wɛ miɛ cɛ̃̀un àá Yiezu Kirisa wanminu.

9Ɛ́ lɛ iè hɔ̀ bòo lɛ ɛ́ ń wóò hɛ̃un Dɔfĩn nɛ Hɔ wé ɛ̀ lɛ́ miɛ ǹ: ń wóò hɛ̃un nɛ Hɔ lɛ́ ɛ̀ mì wanminu ɛ̀ ɓàaní ɓàanírɔ́, ɛ̀ lèpe wanminu sɔ ɛ̀ lɛ́ ɛ̀ mì yí hɔ́ bɔ̀dũmunù, ɛ̀ wóò dũń hɔ́ bòo ɛ̀ ciiní, 10bòo lɛ ɛ́ wé ɛ̀ mì dàá wóo dũń hɔ́ bɔ̀tente ɛ̀ wiekɛ. Ɛ́ kɛ̀amu, á Kirisa khũ̀á ɓenlɔ́ zɔn, ɛ́ mí wo ɛ́ wé nìɛ lɛ ɛ́ ce, nìɛ lɛ ɛ́ ńwekhemù dɔ̀ ɛ́ mí nin wɛ̀. 11Ɛ́ mí wo ɛ́ wé nìɛ lɛ ɛ́ wɔ́ hɔ́ bɔ̀tente àá bɔ̀bín, hɔ̀pe bɔ̀tente sɔ wénlɔ́ pànkɛ́ ɛ́ Yiezu Kirisa ɛ́ te mii lɛ́ miɛ ǹ Dɔfĩn yèrè ɓàanírɔ bòo hũn.

Bòo lɛ ɛ́ Pooli kɛ̀sí zɔnlɔ́ ɛ́ dàa lɛ́ ɛ́ lé Bentĩnu ɛ́ buie cɔ́

12Kìɛ zɛ̀ɓɛ̀, ń wɛ nɛ mi dũń kɛ́ hɔ́ bòo lɛ ɛ́ wɔ́ mi ǹ ɛ́ den bĩniɛ lɛ́ ɛ́ lé Bentĩnu ɛ́ vɛ vanlɔ́ àá híɛhɔ́. 13Ɓɛ̀pe nìɛ lɛ ɛ́ wi-e Kuvɛrɛnɛɛre yíe ɓɛ́kùi àá ɓɛ́lɛ ɛ́ wi hɔ vi-ɓuà hũn ɓɛ́kùi ɛ́ den dũ kɛ́ hɔ́ iè hɔ̀ lɛ ɛ́ nín ɔ̀ Kirisa tɔnlɔ́ ɛ̀ tɛ́ ɛ́ ń dàa ɛ́ wi le kɛ̀sí hũn. 14Ɛ́ hɔ́ lɛ ɛ́ ɓɛ́ kìe zɛ̀ɓɛ̀ cɛ̀rìɛɛ ɛ́ loo mi kɛ́ ń wi le kɛ̀sí hũn, ɛ́ ɓɛ́ den wookɛa dũmuasɛ̃̀ à Ɲunsɔ ǹ ɛ̀ ɓɛ̀ ɛ́ yú lé tĩhiè ɛ́ lè Dɔfĩn bienù ɛ̀ buie kɛ́ ɓɛ́ yá zankɛ wɛ̀.

15Hɔ̀pe wo bɔn kɛ́ ɓɛ́dɔ̀ peɓɛ̀ tĩ́ihṹ ɛ́ iè yanlienú àá peɓɛ̀ hũn lɛ ɛ́ lɔn àá mi ɛ́ temu lɛ́ ɛ́ ɓɛ́ dàa ɛ́ ɔ̀ Kirisa bòo ɛ̀ buie, kɛ́ ɓɛ́dɔ̀ ɛ́ ɓiɛ̀ ɛ́ ɔ̀pe Kirisa bòo ɛ̀ buie àá hũn lɛ ɛ́ ce. 16Ɛ́ ɓàasiè sɔ ɛ́ den ɛ́ hɔ̀ wé àá wanminu iè hɔ̀ lɛ ɛ́ ɓɛ́ dũ kɛ́ ńpe wi hũ̀nún lè Bentĩnu ɲunù sanlɔ́ yènsénín. 17Ɛ̀ ɓɛ̀pe sí kɛ́ ɛ́ den ɛ́ ɔ̀ Kirisa bòo ɛ̀ buie àá ńbíyaanún. Ɛ́ peɓɛ̀ bòo lɛ ɛ́ ɓɛ́ ɛ́ lieníkɛ ɛ́ den yá ce wɛ̀. Ɓɛ̀ den ɛ́ lieníkɛ ɛ̀ ɓɛ̀ nɛ le iè niǹ lɔ̀nbiè ɛ́ ɓɛ́ ɛ́ sĩinínin lè kɛ̀sí hũn.

18Kɛ́ hɔ́pe sí ɛ́ den yí bòo lɛ ɛ́ hie wɛ̀. Hɛ̀rí kɛ́ peɓɛ̀ bòo lɛ ɛ́ ɓɛ́ ɛ́ lieníkɛ ɛ́ yí bòo lɛ sãa lòo, tàá hɛ̀rí kɛ́ hɔ́ iè bòo lɛ sãa lòo, ɛ̀ hɔ̀ lɛ bòo hie ɛ́ iè hɔ̀ lɛ ɛ́ ɓɛ́ ɔ̀ Kirisa bòo ɛ̀ buie. Ɛ́ ń den ɛ́ wɛ niǹte hɔ̀pe sí bòo hũn, ɛ̀ ǹ lò ɛ́ nín vɛ àá híɛhɔ́ ɛ̀ wɛní niǹte, 19iè hɔ̀ lɛ ɛ́ ń dũ kɛ́ hɔ́pe sí míkùi ɛ́ ɓén ɓen àá niǹ fuerɛ̀ iè hɔ̀ lɛ ɛ́ mí wóò hɛ̃un Dɔfĩn ɛ̀ lɛ́ mi ǹ, ɛ̀ Yiezu Kirisa Mɛkɛ̃ni#1.19 Yiezu Kirisa Mɛkɛ̃ni àá Dɔfĩn Mɛkɛ̃ni ɛ́ iè dìcóoní. ɛ́ lò ɓiɛ̀ ɛ̀ niǹ sĩiní. 20Ɛ́ hɔ́ bòo lɛ ɛ́ nín hìé cɛ̃̀un àá hɔ́ lɛ ɛ́ ń bɔ̀ niǹ tĩì lɔ̀n bòo hũn, ɛ́ ń yá ɓén dí lùwiè hɛ̀rí bòo dɔ̀ hũn wɛ̀. Kɛ́ kɛ̀a sáalɛ àá pɛ̃̀hṹ míkùi hũn, ɛ́ ńpe niǹte míkùi ɛ́ den wóo ɓén ɓàaní-ɛ Kirisa ǹ kɛ́ niǹ fɔnù tɛ́rɛ, hɛ̀rí kɛ́ niǹ yìe wi tàá hɛ̀rí kɛ́ ń yɛ̀rɛ́ hṹn húrun. 21Iè hɔ̀ lɛ ɛ́ ńpe niǹ viì à Kirisa ɛ́ temu iè niǹ mɛkɛ̃nì, ɛ́ kɛ́ ń yɛ̀rɛ́ hṹn húrun, ɛ̀ ǹ pɛ́ yú. 22Kɛ́ ń lò den ɓen wi le mɛkɛ̃nì hũn ɛ̀ ǹ dɛ̀ tɔnlɔ́ lɛ ɲunù wi ɛ́ tɛ́, ɛ́ ńpe wo yí dũ bòo lɛ ɛ́ n fɔ́ɓán ɛ̀ ǹ muń wɛ̀. 23Ɛ́ nín tĩì ɛ́ wo sankɛa hɔ̀pe bòo ɲuniɛ̀ hĩ̀ ɲu sí tĩ́ihṹ: niǹ tĩì dɔ̀ ɛ́ wɛ nɛ n tɛ lé lépe dímíɲɛ́ lɛ hũn ɛ̀ vɛ kań àá ɔ́ Kirisa, ɛ́ sí den iè hɔ̀ lɛ ɛ́ ńpe ɛ́ hṹn nɛ hɔ bòo ɛ́ tṹ niǹ viì. 24Ɛ̀ niǹ tĩì dɔ̀ ɛ́ ɓiɛ̀ nɛ mipe mì bòo hũn, ɛ́ hɔ́ bòo ɛ́ tṹ cɛ̃̀un ɛ̀ ǹ kań lé mɛkɛ̃nì hũn. 25Ɛ́ hɔ́ lɛ ɛ́ ń wo dũ hɔ́pe sí sãàniɛ, ɛ́ ń dũ kɛ́ ń ɓén kań yán. Ń ɓén kań yán àá miɛ ɛ́ yíiní miɛ ɛ́ mí ɛ́ vɛ àá híɛhɔ́, ɛ̀ mì lò ɛ́ kań tĩwiɛ̀ hũn hɔ̀ ńdɛsĩ̀nlɔ́ hũn. 26Ɛ́ pɛ̃̀hṹ lɛ kɛ́ ń khũ̀á ɓɛrɛ mì viì, ɛ́ mí wo ɓén wɛní míte cɛ̃̀un niǹ bòo hũn, kè ńcɛɓánlɔ́ àá Yiezu Kirisa bòo hũn.

Hɔ̀ te dàarɔ́ lɛ ɓáaɓán àá lé Bentĩnu bòo

27Kɛ́ hɔ́ lɛ bòo hie, mì wóo dàá míte ɛ̀ ɓáaníɓán àá ɔ́ Kirisa Bentĩnu, bòo lɛ ɛ́ wé ɛ̀ hɛ̀rí kɛ́ ń ɓɛrɛ mì viì tàá hɛ̀rí kɛ́ ń mí mí tĩ́ihṹ, ɛ̀ ǹ wóo ɲí kɛ́ ɓɛ́ nɛ mí wɔ́ mí ɲunù àá dìcóoní ɛ́ fɛ́sí dɛ̃̀ sãa, ɛ̀ mì lò wɔ́ mí tĩɛ̀ àá dìcóoní ɛ́ dàa páaniɛ ɛ́ hɔ̀ sɛrɔ́ ɛ̀ sɛ ɛ̀ ɓɛ̀ nìnbirìe ɛ̀ dàá dɛsĩ̀ lè Bentĩnu ǹ. 28Mì bí fùansí nɛ ɓɛlɛ ɛ́ mì bòo ɛ̀ wũ̀aní ɛ̀ záaní miɛ hɛ̀rí bòo dɔ̀ hũn wɛ̀. Ɛ́ hɔ́ den ɛ́ wé bòo lɛ ɛ́ mii zɛ̃́ní ɛ̀ lɛ́ ɓà ǹ kɛ́ ɓɛ́ iè bìe lɛ ɛ́ wi ɓɛ́ yaanù wṹn lɔ̀n, ɛ̀ mìpe ɛ́ wi le fuerɛ wṹn lɔ̀n. Ɛ́ hɔ́pe sí iè bòo lɛ ɛ́ lɔ́ àá Dɔfĩn viì. 29Ɛ́ Dɔfĩn ɛ́ wɔ́ hiì àá miɛ nɛ mi dɛsĩ̀ Kirisa ǹ, kɛ́ hɔ́ yí hɔ́pe mí dòonún wɛ̀. Hɔ̀ lò ɓiɛ̀ wɔ́ hiì àá miɛ nɛ mi lɔ̀n ɛ̀ be piè yènsénín. 30Mí páa niǹ lɔ̀n ɛ́ dàa ɛ́ hɔ̀ sɛrɔ́ ɛ̀ sɛ, hɔ̀pe sɛrɔ́ lɛ ɛ́ mí hàarí mɔn kɛ́ nin sɛ, lɛ mí lò ɛ́ ɲí kɛ̀a sáalɛ kɛ́ ń pɛwi ɛ́ hɔ̀ sɛ̀.

Currently Selected:

Filiipu Siè 1: bwj

Highlight

Copy

Compare