Efɛɛzi Siè 6

Ɓɛ̀ zĩncã́ahɛ̃ àá ɓà tenliè bòo

1Mìpe zĩncã́ahɛ̃, mì wóo ɲí mì tenliè bòo kɛ̀a bòo lɛ á Ɲunsɔ ɛ́ wɛ, iè hɔ̀ lɛ ɛ́ hɔ́ iè bòo lɛ ɛ́ cã̀aní. 2«Mɛ̀ndɛ̃ mì yàá àá mì nín» sí iè hɔ̀ Dɔfĩn hán ɲunù tɛmu lɛ ɛ́ Hɔ́ lɛ́ mí ɲunù ɛ́ páa lɔ̀n ɛ́ nɛ: 3«Bòo lɛ ɛ́ wé ɛ̀ kɔ̀ ɲún ɛ̀ tĩìní ɛ̀ kɔ̀ mɛkɛ̃nì ɛ̀ lò tóoní lé sṹsùnù.»

4Ɛ̀ mìpe yàáɓɛ́, mì bí wóo cĩ̀níkɛ mi zĩncã́ahɛ̃ tĩɛ̀ wɛ̀. Kɛ́ mí den hɛ̃ ɓɛ kɛ́ mí ɛ́ hɔ̀ bénlɔ́ àá hɔ́ te dàarɔ́ lɛ ɛ́ lí-e Ɲunsɔ viì ɛ̀ lɛ́ ɓà ǹ.

Ɓɛ̀ wɔhĩ́ àá ɓɛ́ ɲúuhɛ̃siè bòo

5Mìpe wɔhĩ́, mì wóo ɲí mí ɲúuhɛ̃siè bòo lèpe sṹsùnù lɛ lɔ̀n, ɛ̀ síɛní míte peɓɛ̀ híɛhɔ́ ɛ̀ mɛ̀ndɛ̃ ɓɛ, ɛ̀ hán mí hũn ɛ̀ dàá tɛ́ peɓɛ̀ tɔnlɔ́ kɛ̀a bòo á iè Kirisa tɔnlɔ́ ɛ́ mí ɛ́ tɛ́. 6Mì bí wóo tɛ́ hɔ́ lè pɛ̃̀hṹ lɛ ɛ́ ɓɛ́ ɛ́ mì húi mí dòonún hũn wɛ̀; hɔ́rɔsí ɛ̀ hɔ̀ iè bòo ɛ́ mí nɛ mi bòo ɛ̀ tĩìní ɓɛ́ nìnbirìe ǹ. Kɛ́ mí den wóo tɛ́ peɓɛ̀ tɔnlɔ́ kɛ̀a ie Kirisa tɔntɛ́riè lɛ ɛ́ wóò wé hɔ́ Dɔfĩn tĩì bòo àá ɓɛ́ tĩɛ̀ míkùi. 7Ɛ́ mí wóo hán mí hũn ɛ̀ dàá tɛ́ ɓɛ́pe mì ɲúuhɛ̃siè tɔnlɔ́ kɛ̀a bòo á iè pe Ɲunsɔ kùusɔ tɔnlɔ́ ɛ́ mí ɛ́ tɛ́ kɛ́ hɔ́ yí ɓɛ́ nìnbirìe tɔnlɔ́ wɛ̀. 8Ɛ́ mí dũń sãàní kɛ́ hɔ́rɔ ń nìnbírɔ, à yɛ̀rɛ́ wé wɔnù tàá nìnbírɔ lɛ ɛ́ te míte ɛ́ Ɲunsɔ ɛ́ ɓén sàaní-ɛ ɓáaní ɓán àá hɔ́ bɔ̀tente lɛ á wɔ́.

9Ɛ̀ mìpe wɔhĩ́ ɓà ɲúuhɛ̃siè, mì ɓiɛ̀ wóo dàá míte kiɛ́ àá ɓɛ́pe mì wɔhĩ́. Mì bí wóo lɛ̀ lè hiɛ̀ àá ɓɛ́ wɛ̀. Mì dũń sãaní kɛ́ mípe àá ɓɛ́pe ɛ́ páaniɛ lɔ̀ Ɲunsɔ wìcóoní ǹ hɔ̀ hóohũn, ɔ̀pe lɛ ɛ́ yáà wiekɛ nìnbirìe wɛ̀.

Hɔ̀ hĩɛ̀ tĩ̀ɛ lɛ ɛ́ Dɔfĩn ɛ́ lɛ́ á ńdɛsĩ̀rɔ ǹ bòo

10Ɛ́ kɛ̀a sáalɛ, ɛ́ mí lɛ́ nɛ mi pànkɛ́ ɛ̀ wé mí ńcɛɓánlɔ́ àá ɔ́ Ɲunsɔ hũn, piè pànkɛ́ bɔ̀bɛhɔ́ hũn. 11Ɛ́ mí khui hɔ hĩɛ̀ tĩ̀ɛ lɛ ɛ́ Dɔfĩn ɛ́ lɛ́ miɛ míkùi ɛ̀ zɔ bòo lɛ ɛ́ wé ɛ̀ mì dàá dàń ɔ́ Sitũanɛ hɛ́cín-bòo híɛhɔ́ ɛ̀ sĩ́. 12Ɓɛ̀ den yí ɓɛ́ nìnbirìe ɛ́ ké dàa ɛ́ hɔ̀ hĩɛ̀ ɛ̀ tɛ́ wɛ̀. Kɛ́ ɓɛ́ lɛ ɛ́ ké dàa ɛ́ hɔ̀ hĩɛ̀ ɛ̀ tɛ́ ɛ́ iè ɓɛ̀ bɛ́zɛ̀ɓɛ̀ pànkɛ́-bɛ̃hɛ̃ ɓàasiè lɛ wi le pinpinù hũn, àá lépe dímíɲɛ́ sɔ lɛ síbínú pànkɛ́ ɓàasiè àá ɓɛ́ ńɲikĩ́nìɛ àá ɓɛ́ ɲunhɛ̃siè lɛ wi hɔ hóohũn. 13Ɛ́ sí iè hɔ̀pe ɛ́ mí dàa khui hɔ Dɔfĩn hĩɛ̀ tĩɛ̀ míkùi ɛ̀ dàá nin ɛ̀ dàá pɛ mite, bòo lɛ ɛ́ wé kɛ́ lé sí kùanù ɛ́ ɓen van ɓɛrɛ, ɛ̀ mì dàá dań sĩ́ɓán àá ɔ́pe mì ńbíyanle; kɛ́ mí ɓen san hɔ sɛrɔ́ vɔ́, ɛ̀ mì dàń ɛ̀ fɛ́sí dìń sãàní.

14Ɛ́ mí wo fɛ́sí dìń sãàní: Mì lɛ́ nɛ hɔ bɔ̀berà ɛ̀ temu wé mí khìrí lɛ ɛ́ mí can mì kuò hũn, ɛ̀ hɔ̀ cã̀anírɔ́ ɛ̀ temu wé mí hɛ̃nlɔ́ pɔ̀nkɔ̀rɔ́ lɛ ɛ́ mí zɔn. 15Ɛ̀ mì lɛ́ nɛ mi kuò cánlɔ́ lè hũn-wiɛ̀ Bentĩnu buierɔ́ hũn ɛ́ temu wé mí naahĩ́ lɛ ɛ́ mí koo mí laahĩ́ ǹ. 16Ɛ̀ pɛ̃̀hṹ míkùi hũn, ɛ̀ mì lɛ́ nɛ mi ńdɛsĩ̀nlɔ́ ɛ̀ wé lé hɛ̃nlɔ́ pĩ̀inù lɛ ɛ́ mí zɛ̃nkɛa nin mì núnú hũn ɛ́ dàa pan mìte ǹ, lèpe lɛ ɛ́ temu mii lɛ́ ɛ̀ mì dàá wóo dàń ɔ́ Sitũanɛ dṹn hĩɛ̀ lɛ á ɛ́ taa àá miɛ ɛ̀ ɓé. 17Mì lɛ́ nɛ le fuerɛ̀ lɛ ɛ́ mí yú ɛ́ temu wé mí kɔ̃́nlé lɛ ɛ́ mí yìe, ɛ̀ lè Dɔfĩn bienù ɛ̀ temu wé lé khɛ̃́n-tɔ́nú lɛ ɛ́ lé Mɛkɛ̃n-Sãanu ɛ́ lɛ́ miɛ ǹ nɛ mi dàá sɛ. 18Ɛ́ bòo míkùi hũn, ɛ́ mí wóo hɛ̃un Dɔfĩn fúu kɛ̀a bòo lɛ ɛ́ lépe Mɛkɛ̃n-Sãanu ɛ́ dàa dú mí híɛhɔ́, ɛ̀ mì ɛ̀ piɛní mí yìe pehɔ̀ hũn àá kuò cánlɔ́ ɛ̀ mì wóo hɛ̃un Dɔfĩn ɛ̀ lɛ́ hɔ́pe Dɔfĩn nìɛ ɓɛ́kùi ǹ. 19Ɛ̀ mì lò wóo hɛ̃un Dɔfĩn ɛ̀ lɛ́ mi ǹ bòo lɛ ɛ́ wé ɛ̀ Dɔfĩn ɛ̀ dé mí bienù nin ɲunù hũn, kɛ́ ń ɓen nín zɔ haà niǹ ɲunù, ɛ̀ ǹ wóo dàń lé Bentĩnu bòo lɛ ɛ́ hṹn tànkɔ̀niɛ ɛ̀ bie kɛ́ niǹ fɔnù ɛ́ tɛ́rɛ, ɛ̀ ɓɛ̀ nìnbiriè ɛ̀ dũń. 20Lè iè lèpe Bentĩnu sɔ ɛ́ Dɔfĩn ɛ́ tɔrɛ mi nɛ n bie bòo, hɛ̀rí kɛ́ kɛ̀a sáalɛ ɛ́ ń iè ɔ̀ kɛ̀sí nùún. Ɛ́ mí wóo hɛ̃un Dɔfĩn bòo lɛ ɛ́ wé ɛ̀ ǹ wóo bie le kɛ́ niǹ fɔnù ɛ́ tɛ́rɛ kɛ̀a bòo lɛ ɛ́ ń dàa fɔ́ɓán ɛ̀ ǹ wóo bie le.

Víeníkɛlan tɛmu

21Ń den wɛ nɛ mi dũń hɔ́ bòo lɛ ɛ́ ń te dàa wi àá hɔ́ bòo lɛ ɛ́ nín wé. Á Tisiike lɛ iè kìe zùú lɛ ɛ́ ń wɛ, àpe lɛ ɛ́ ɔ̀ Ɲunsɔ tɔnlɔ́ ɛ̀ tɛ́ àá cã̀anírɔ́ ɛ́ ɓén munkɛ hɔ bòo lɛ ɛ́ wi yán míkùi ɛ́ lɛ́ miɛ ǹ. 22Ɛ́ hɔ́ den iè pe hɔ̀ bòo hũn ɛ́ ń dàa tɔrɛ à nɛ a ɓen mì viì, ɛ̀ ɓen bie hɔ bòo lɛ ɛ́ ké te dàa ɛ́ dɛ̃̀ ɛ̀ lɛ́ miɛ ǹ, à lò hĩ̀iníkɛ mi tĩɛ̀.

23Nɛ kìe Yàá Dɔfĩn àá ɔ́ Ɲunsɔ Yiezu Kirisa ɛ̀ lɛ́ hũn-wiɛ̀ àá wanminu àá ńdɛsìnlɔ́ ɓɛ̀pe kìe zɛ̀ɓɛ̀ ńdɛsĩ̀riè ɓɛ́kùi ǹ. 24Nɛ Dɔfĩn hiì ɛ̀ wé àá ɓɛ́ nìnbirìe ɓɛ́kùi lɛ ɛ́ wɛ ke Ɲunsɔ Yiezu Kirisa àá wanminu lɛ yá ve.

Currently Selected:

Efɛɛzi Siè 6: bwj

Highlight

Copy

Compare