Filiipu Siè 2

Kirisa te síɛnírɔ́ àá piè ɓàarɔ́ bòo

1Ɛ́ hɔ́ lɛ mí ńcɛɓánlɔ́ àá ɔ́ Kirisa ɛ́ wo ɛ́ tĩhiè ɛ̀ lɛ́ miɛ ǹ, ɛ̀ piè wanminu ɛ́ wo ɛ́ mì tĩɛ̀ ɛ̀ hĩ̀níkɛ, ɛ̀ mì wo can ɓán àá lé Mɛkɛ̃n-Sãanu, ɛ̀ mì lò wɛ ɓán ɛ́ wóò mi ɓán miinɛ, 2ɛ́ mí wo wé mí ɲunù àá dìcóoní ɛ̀ ǹpe niǹ tĩwiɛ̀ ɛ̀ dàá ɲunù tí. Mì wɛní ɓán àá wanminu dìcóoní, ɛ̀ mì wé mí tĩɛ̀ àá mí nùnlé àá dìcóoní. 3Mì bí wóo wé ńbíyaanún bòo dɔ̀ tàá mì bí wóo wé yèncànlè bòo dɔ̀ wɛ̀, pehɔ̀ ɲún mí wɛ̀. Kɛ́ mí den wóo síɛní míte ǹ ɛ̀ mì húi ɓɛ́ nìnbirìe lɛ kɛ́ kɛ̀a nìɛ lɛ ɛ́ pɔ miɛ. 4Mì bí nɛ hɔ́rɔ ɛ̀ wóo wé mí kùrú sãàrɔ́ bòo mí dòonún à húi, kɛ́ á ɓiɛ̀ wóo húi ɓɛ́lɛ kɛ́ sãàrɔ́ bòo. 5Mì lɛ́ nɛ le nùnlé lɛ hàarí wi-e Yiezu Kirisa ǹ ɓà ńmàa ɛ̀ ɓiɛ̀ kań miɛ ǹ.

6Àpe lɛ dĩ̀nlɔ́ àá Dɔfĩn dĩ̀nlɔ́ ɛ́ iè dìcóoní,

Kɛ́ á den yí bie nɛ hɔ lɛ ɛ́ mípe àá Dɔfĩn ɛ́ màamán,

Ɛ́ mípe ɛ́ wo mii ɓɛ́ɓɛ́ ɛ̀ mí dìń kɛ̀amu àá pànkɛ́ wɛ̀.

7Kɛ́ á den tɛ̀ ɛ́ fùɛrɛ̀sí hɔ́pe sí míkùi ǹ,

À ɛ́ wɔ́ á nìnbirɔ,

Ɛ́ yɛ̀rɛ́ wɔ́ ɓɛ́ nìnbirìe tɔntɛ́,

Ɛ́ kɛrɛ peɓɛ̀ tĩ́ihṹ ɛ́ ɓɛ́ ɛ́ mɔn kɛ́ á ie nìnbírɔ.

8Á tɛ̀ ɛ́ síɛniɛ míte ǹ, à ɲɛ́ Dɔfĩn bòo fúu,

Ɛ́ van dɛ̃un hɔ̀ húmú, lè ɓáalén dãanù lɔ̀n húmú.

9Ɛ́ sí ɓiɛ̀ iè hɔ̀pe ɛ́ Dɔfĩn dàa hóoniɛ ɔ̀ yòoniɛ ɛ́ pɔniɛ hɔ̀ bòo míkùi,

Ɛ̀ Hɔ̀ ɛ́ lɛ́ lé yèrè lɛ ɛ́ wi hɔ yèhĩ́ míkùi ɲún hũn ɔ̀ ǹ,

10Bòo lɛ ɛ́ wé kɛ́ Yiezu yèrè ɛ́ ɓen vɔn,

Ɛ̀ hɔ̀ bòo lɛ ɛ́ wi hɔ hóohũn àá hɔ́lɛ ɛ́ wi le sṹsùnù lɔ̀n àá hɔ́lɛ ɛ́ wi le sṹsùnù fìi hũn míkùi,

ɛ̀ wóo síɛ hùenkɛsí ɓɛ́ nunkɛ́yìe lɔ̀n. 11Ɛ̀ ɓɛ̀ nìnbirìe ɓɛ́kùi ɛ̀ lò wóo bie nɛ «Yiezu kirisa ɛ́ iè Ɲunsɔ», ɛ̀ dàá ɓàaní Yàá Dɔfĩn yèrè.

Nɛ mi ńpiemu ɛ̀ wóo mi le dímíɲɛ́ hũn

12Ɛ́ kɛ̀amu mìpe kìe pàáɓɛ́, mí hṹn wóò ɲí niǹ bòo fúu pɛ̃̀hṹ lɛ ɛ́ ń dàa hàarí wi mí tĩ́ihṹ. Ɛ́ kɛ̀a sáalɛ ɛ́ ń wo mí mí tĩ́ihṹ, ɛ́ ń den nɛ mi bĩní wookɛ ɲí niǹ bòo cɛ̃̀un ɛ̀ pɔní. Mì tɛ́ hɔ́ tɔnlɔ́ ɛ̀ dàá zɛ̃́ní kɛ́ mí yú lé fuerɛ̀, kɛ́ mí den tɛ́ hɔ́ kɛ́ mí ɛ́ Dɔfĩn ɛ̀ zán cɛ̃̀un kɛ́ mí lò ɛ́ Hɔ̀ mɛ̀ndɛ̃. 13Dɔfĩn ɛ́ wóò tɛ́ mí tɔnlɔ́ mí hũn, ɛ̀ Hɔ̀ te mí bòo wénlɔ́ pɔnù ɛ́ wóò dé miɛ ǹ, ɛ̀ Hɔ̀ bĩní lɛ́ pehɔ̀ wénlɔ́ pànkɛ́ miɛ ǹ kɛ̀a bòo lɛ ɛ́ Hɔ́ dàa wɛ nɛ hɔ wé.

14Mì wóo wé hɔ́ bòo míkùi kɛ́ mí bí khĩ́ mí ɲihĩ́ɛ hũn ɛ̀ mì lò bí wóo wũ̀aní wɛ̀. 15Bòo lɛ ɛ́ wé ɛ̀ mì wé nìnbirìe lɛ ɛ́ ce lɛ ɛ́ ńwékhemù dɔ̀ ɛ́ mínɛ nin, ɛ̀ mì wé Dɔfĩn nìɛ lɛ ɛ́ fĩnɛ̀ ɛ́ mí nin, lɛ ɛ́ wi ɓɛ́ dímíɲɛ́ nìɛ lɛ yí sãa ɛ̀ ɓɛ̀ lò ɲúuhɛ̃ ɛ́ yá cã̀aní tĩ́ihṹ. Ɛ́ mí lɛ́ nɛ mi ńpiemu ɛ́ cĩ̀ peɓɛ̀ tĩ́ihṹ kɛ̀a ie le pɛ̃̀ntĩ́ní bòo sí, 16kɛ́ mí ɛ́ lè mɛkɛ̃nì bienù ɛ̀ bie lɛ́ ɓà ǹ. Ɛ́ kɛ̀amu, ɛ́ ń wo ɛ́ wɛní niǹte mì bòo hũn à Kirisa ɓenlɔ́ yìi hũn, iè hɔ̀ lɛ ɛ́ hɔ́rɔsí ɛ́ niǹ tɔnlɔ́ lɛ ɛ́ tɛ́ lɔ̀n bɔn ɛ́ yí vɛ kã́amáa wɛ̀.

17Ɛ́ hɛ̀rí kɛ́ niǹ cãani ɛ́ yɛ̀rɛ́ hṹn fɔ́ɓán ɛ̀ hɔ̀ kóosí ɛ̀ wé miyiɛ́ ɛ̀ khíi páa mípe mì ńdɛsĩ̀nlɔ́ tɔnlɔ́ lɛ kùusɔ ie le miyiɛ́ lɛ ɛ́ mí lɛ́ Dɔfĩn, ɛ́ ń den pɛ́wi ɛ́ wɛní niǹte pehɔ̀ bòo hũn, ɛ̀ mì lò ɛ́ páa niǹ lɔ̀n ɛ́ ké dàá wɛní kéte. 18Ɛ̀ mìpe ɛ̀ ɓiɛ̀ wɛní míte, ɛ̀ ǹ lò ɓiɛ̀ ɛ́ páa mí lɔ̀n ɛ́ ké dàá wɛní kéte.

Pooli ɛ́ wɛ mii tɔn Timote àá Epaforodiite

19Ɛ́ Ɲunsɔ Yiezu ɛ́ ɓen tɛ̀, ɛ́ hũ̀nún àá bìcínbóo ɛ̀ ǹ ɓén tɔn Timote á ɛ́ ɓen mi viì, bòo lɛ ɛ́ wé kɛ́ á ɓen khũ̀á ɓɛrɛ, à ɓen bie bòo lɛ ɛ́ mí te dàa dɛ̃̀ ɛ̀ lɛ́ mi ǹ, ɛ̀ hɔ̀ yí niǹ tĩì ɛ̀ hĩ̀iní. 20Kɛ́ ápe ɛ́ ɓen bòo ɛ́ mí, ɛ̀ ǹ bĩniɛ yí dàa nìnbírɔ dɔ̀ lɛ ɛ́ ń wóò dàá páaní sankɛ niǹ nùnlé, nìnbírɔ lɛ ɛ́ ɓiɛ̀ wóò dé mípe mì bòo mí tĩì hũn. 21Ɓɛ̀pe lɛ kɛ́ ɓɛ́kùi ɛ́ wóò wé ɓɛ́ kùrú bòo ɛ̀ ɓɛ̀ bè máahṹ ɛ̀ cɛ̀, kɛ́ ɓɛ́ yáà cɛ̀ à Yiezu Kirisa bòo wɛ̀. 22Ápe Timote ɛ́ lò wo zɛ̃́niɛ mí ɲún cã̀anírɔ́ ɛ́ mí mɔn. À lɛ́ míte ɛ́ páa niǹ lɔ̀n lè Bentĩnu tɔnlɔ́ hũn kɛ̀a ie zĩncáahɔ́ lɛ ɛ́ tɛ́ ɓá yàá kòohɔ́ hũn. 23Ɛ́ ń den ɛ́ cɛ̀ ɛ́ nín tɔn ɔ̀ à ɓen mì viì, pɛ̃̀hṹ lɛ kɛ́ ń ɓen van loo hɔ bòo lɛ ɛ́ nin ɓáa nin. 24Ɛ́ ń wo ɛ́ dũmuasɛ̃̀ Ɲunsɔ ǹ nɛ npe kùusɔ ɛ́ ɓén ɓen mì viì hũ̀nún àá bìcínbóo.

25Ɛ́ ń wo nɛ fɔ́ɓán ɛ̀ ǹ tɔn ɔ̀ kìe zuú Epaforodiite à khũ̀á ɓen mi viì, àpe lɛ ɛ́ mí zɔn lɛ́ hɔ́ ńsĩinín nin á ɓɛrɛ lɛ́ mi ǹ. À iè kìe ńtɛ́ɓánlɔ̀n nùún lɛ páa niǹ lɔ̀n ɛ́ dàa ɛ́ sɛ. 26À ɛ́ cɛ̀ cɛ̃̀un ɛ́ mii khũ̀á mi miɛ mìkùi, ɛ̀ piè kuò ɛ́ lò hè iè hɔ̀ lɛ ɛ́ mí ɛ́ ɲɛ́ piè duiè bòo. 27Hɔ̀pe wo bɔn kɛ́ á dooniɛ cɛ̃̀un ɛ́ yɛ̀rɛ́ tan zɔǹ hṹn mii hí. Kɛ́ Dɔfĩn ɛ́ mɔn piè miinɛ̀. Ɛ́ hɔ́ yɛ̀rɛ́ yí-e pe mí dòonún miinɛ̀ ɛ́ Hɔ́ mɔn, kɛ́ Hɔ́ lò ɓiɛ̀ mɔn ǹpe kùusɔ miinɛ̀ bòo lɛ ɛ́ wé ɛ̀ niǹ tĩì ɛ̀ bí bĩní wookɛ yáa wɛ̀. 28Ɛ́ sí iè hɔ̀pe ɛ́ ń dàa ɛ́ zɛ̀ pɛ̀ pɛ̀ ɛ́ nín tɔn ɔ̀ à ɓen mì viì, bòo lɛ ɛ́ wé kɛ́ mí ɓen mɔn ɔ̀ ɛ̀ mì wɛní míte, ɛ̀ ǹpe kùusɔ tĩyaarè ɛ̀ ɲunù yòó fánnin. 29Ɛ́ mí hán mí hũn ɛ̀ mì fí-e àá tĩwiɛ̀ dɛ̀bɛhɔ́ kè Ɲunsɔ yèrè lɔ̀n, ɛ̀ ɓɛ̀pe nìnbirìe lɛ dɛ̃̀ kɛ̀a ɔpe ɛ́ mí wóo mɛ̀ndɛ̃, 30iè hɔ̀ lɛ á van lúwiniɛ hɔ́ húmú ǹ à Kirisa tɔnlɔ́ bòo hũn, à ɛ́ tɛ̀ ɛ́ dɔ́ mí mɛkɛ̃nì hɔ̀ mɛ̀rɔ́ hũn ɛ́ dàa yíiniɛ mi àá hɔ́ ńyíinín lɛ ɛ́ mípe ɛ́ hṹn yí dɛ̀ ɛ́ yá lɛ́ mi ǹ.

Currently Selected:

Filiipu Siè 2: bwj

Highlight

Copy

Compare