Hebereɓɛ 4

1Dɔfĩn ɛ́ lɛ́ mí ɲunù nɛ ɓén lɛ́ wṹn ɓɛ̀ nìnbirìe ǹ ɛ̀ ɓɛ̀ zɔ le ńvũùnín lɛ ɛ́ mí sɛ́sɛ́a bɔ̀sí hũn. Ɛ́ mí nɛ ke pɛ kete bòo sãàní bòo lɛ ɛ́ wé ɛ̀ mì tĩ́ihṹ ádɔ̀ ɛ̀ bí ɓuɔ́ à khe ɛ̀ bí dàń lé ńvũùnín sɔ hũn ɛ̀ zɔ wɛ̀. 2Kèpe ɛ́ lò ɓiɛ̀ ɲɛ́ lépe Bentĩnu lɛ nɛ ké ɓén zɔ Dɔfĩn ńvũùnín hũn kɛ̀a bòo lɛ ɛ́ ɓɛ́pe kìe zĩkĩ́nɓɛ̀ lɛ hàarí wi le ńɲiherà hũn ɛ́ dàa hàarí ɲɛ́ lépe Dɔfĩn bienù. Kɛ́ ké mɔn kɛ́ ɓɛ́pe ɛ́ yí yí lépe bienù sɔ tũ̀nú iè hɔ̀ lɛ ɛ́ ɓɛ́ hàarí yí dɛsĩ̀ lè ǹ wɛ̀. 3Kɛ́ hɔ́ lɛ ɛ́ képe lɛ ɛ́ dũmuasɛ̃̀ lè ǹ, ɛ́ ké wo ɓén zɔ lepe ńvũunín sɔ hũn, lèpe lɛ ɛ́ Dɔfĩn hàarí bie bòo peɓɛ̀ bòo hũn ɛ́ nɛ: «Niǹ tĩcĩ̀nín hũn, ɛ́ ń wo wĩ́ɛ nɛ ɓɛ yá ɓén zɔ le viì lɛ ɛ́ ń sɛ́sɛ́a nɛ ɓɛ ɓen vũùní hũn ɛ́ yá mi wɛ̀.»

Dɔfĩn hàarí bie hɔ̀pe sí hɔ́rɔsí kɛ́ pehɔ̀ bòo míkùi ɛ́ lò hàarí wɔ́ vɔ́ lépe dímíɲɛ́ mínlɔ́ yìi hũn. 4Iè hɔ̀ lɛ, ɛ́ lépe Dɔfĩn bienù vɛ̃hṹ hũn, ɛ́ hɔ́ bie viì dɔ̀ hũn hɔ̀ wihĩ́ hùuɲulán bòo hũn ɛ́ nɛ làa: «Dɔfĩn ɛ́ vũuniɛ hɔ̀ wihĩ́ hùuɲulán zɔn mí tɔnlɔ́ míkùi hũn. 5Ɛ̀ hɔ̀ lò ɓiɛ̀ ɛ́ wɛ̃́ lépe dáanú lɛ hũn nɛ làa:

Ɓɛ̀ yá ɓén zɔ le viì lɛ ɛ́ ń sɛ́sɛ́a nɛ ɓɛ ɓen vũùní hũn ɛ́ yá mi wɛ̀.»

6Ɓɛ̀ nìnbirìe lɛ ɛ́ hàarí sɛ̃̀nɛ́hã̀ ɲɛ́ lé Dɔfĩn bienù hɔ̀ híɛhɔ́ ɛ́ yí zɔ le ńvũunín sɔ hũn iè hɔ̀ lɛ ɛ́ ɓɛ́ hàarí yí tɛ̀ ɛ́ yí ɲí hɔ́pe Dɔfĩn bòo wɛ̀. Kɛ́ ɓɛ́dɔ̀ ɛ́ pe wo sãawi ɛ̀ ɓɛ̀ zɔ yán. 7Ɛ́ sí iè hɔ̀pe ɛ́ Dɔfĩn dàa bĩniɛ lerɛ sí-ɓuɛ̀ dɔ̀ lɛ ɛ́ Hɔ́ vɔn nɛ «zoòní». Ɛ́ hɔ́ lɛ ɛ́ ɓɛ́pe kìe zĩnkĩ́nɓɛ̀ ɛ́ hàarí pɛ̃́ hɔ́pe Dɔfĩn bòo vɔ́, ɛ́ hɔ́ khie míɛ cɛ̃̀un ɛ́ hɔ́pe Dɔfĩn ɛ́ dàa khie bɔ̀ à Daviide ǹ ɛ́ dàa khɛ́ hɔ́pe bòo lɛ ɛ́ ké sɛ̃̀nɛ́hã̀ kɛ̀rɛa nɛ làa:

Kɛ́ mí ɓen ɛ́ Dɔfĩn tɛmu ɛ̀ ɲínin zoòni,

Ɛ̀ mì bí dĩìní mí ɲɛkɛ̃̀a wɛ̀.

8Kɛ́ á Zozue ɛ́ hàarí hṹn te ɓɛpe kìe zĩkĩ́nɓɛ̀ ɛ́ dàa ɛ́ dàa van zɔn lè viì lɛ ɛ́ ɓɛ́ hàarí sãawi ɛ̀ ɓɛ̀ vɛ vũùní hũn àá bɔ̀bín, ɛ́ pehɔ̀ máahṹ, ɛ́ Dɔfĩn hṹn yá ɓén bĩní khɛ́ sí-ɓuɛ̀ dɔ̀ bòo wɛ̀. 9Ɛ́ ńvũùnín lɛ ɛ́ dɛ̃̀ kɛ̀a ie hɔpe wihĩ́ hùuɲulán ńvũùnín sɔ sí ɛ́ wi yán ɛ́ bòo sɛ̃̀ Dɔfĩn nìɛ ǹ. 10Ɛ́ nìnbírɔ lɛ ɛ́ zɔn Dɔfĩn ńvũùnín hũn ɛ́ wóò vũùní mí tɔnlɔ́ tánlɔ́ hũn kɛ̀a bòo lɛ ɛ́ Dɔfĩn ɛ́ dàa vũùniɛ mí tɔnlɔ́ tánlɔ́ hũn. 11Ɛ́ mí nɛ ke pĩ̀iní kéte ɛ̀ kè zɔ lepe ńvũùnín sɔ hũn. Mì bí nɛ àdɔ̀ kè tĩ́ihṹ ɛ̀ dĩìní mí ɲɛkɛ̃̀a ɛ̀ bí ɲí bòo kɛ̀a ie ɓɛpe kìe zĩnkĩ́nɓɛ̀ bòo lɛ ɛ́ ɓɛ́ hàarí wɔ́ ɓà ńmàa wɛ̀.

12Ɛ́ Dɔfĩn bienù den yìe wi ɛ̀ lè lò pànkɛ́ wi. Pelè ɲiɛ̀ ɛ́ wi ɛ́ pɔ khɛ̃́nlé lɛ sɛhĩ́ɛ bɔ̀nbɔ̀ ɲu ɲiɛ̀ wi. Lè wóò fĩ̀-ɛ nìnbírɔ ɛ̀ zɔ piè hũn fúu ɛ̀ zɔ sankɛ piè bɔ́nú àá piè mɛkɛ̃nì ɛ̀ lé ɓán, ɛ̀ lè sankɛ piè hũà sɛ̃̀mɛ̀kɛlénɓɛ̀ àá hɔ́ ńkɔ̀fĩ̀nlɔ́ ɛ̀ lé ɓán. Lè wóò zɛ̃́ní-ɛ nìnbírɔ hũn vànminù àá piè bòo lɛ á wɛ mii wé. 13Ɛ́ Dɔfĩn bòo lɛ ɛ́ Hɔ́ mɛ́ míkùi hũn ɛ́ bòo dɔ̀ lɛ dɛ̀ ɛ́ tànkɔ̀ní pehɔ̀ híɛhɔ́ ɛ́ mí wɛ̀. Hɔ̀pe míkùi ɛ́ kɛ wìée hɔ̀pe Dɔfĩn híɛhɔ́ ɛ̀ Hɔ̀ ɛ́ loo hɔ. Ɛ́ Dɔfĩn iè pe ɛ́ ké ɓén yìrí ɛ́ munkɛ ke bòo lɛ ɛ́ ké wɔ́ ɛ́ lɛ́ nin.

Yiezu iè Dɔfĩn khɛ̃́ndàarɔ wì-bɛhɔ́

14Ɛ́ mí lɛ́ nɛ ke ɓɛ́ɓɛ́ hɔ́ ńdɛsĩ̀nlɔ́ lɛ ɛ́ ké bòo ɛ̀ bie ǹ sãàní. Iè hɔ̀ lɛ ɛ́ ké dàa khɛ̃́ndàarɔ wì-bɛhɔ́ lɛ ɲún lì cɛ̃̀un lɛ iè Dɔfĩn Zuú Yiezu. Àpe ɛ́ temu cánkɛ́a hɔ̀ hóohũn ɛ́ van yòó dɛ̃un Dɔfĩn viì. 15Ápe khɛ̃́ndàarɔ wì-bɛhɔ́ sɔ lɛ ɛ́ ké dàa ɛ́ yí wìe lɛ ɛ́ yí dɛ̀ kè mìinɛ ɛ́ yá mi pɛ̃̀hṹ lɛ kɛ́ ké pànkɛ́ ɛ́ van yèrɛ wɛ̀. Hɔ̀ yí dɛ̃̀ kɛ̀amu wɛ̀. Àpe kè khɛ̃́ndàarɔ wì-bɛhɔ́ sɔ kùusɔ ɛ́ hɔ́ hàanírɔ́ àá mí ɲúuhɛ̃ ɲúuhɛ̃ míkùi ɛ́ yú kɛ̀a ie ke bòo lɛ ɓà ńmàa, kɛ́ ápe ɛ́ yí wé hɛ̀rí bɔ̀koohɔ́ wɛ̀. 16Ɛ́ mí nɛ ke khɛ̃̀ún vɛ lúwiní Dɔfĩn kɛ́ ké fɔnù tɛ́rɛ, Hɔ̀pe lɛ ɛ́ wóò wé mí hiì àá ɓɛ́ nìnbirìe, bòo lɛ ɛ́ wé ɛ̀ Hɔ̀ mi ke miinɛ̀, ɛ̀ Hɔ̀ dàá síiní kie pɛ̃̀hṹ lɛ kɛ́ ké van mɛ̀kóo wi pehɔ̀ ńsíinín.

Currently Selected:

Hebereɓɛ 4: bwj

Highlight

Copy

Compare