Hebereɓɛ 5

1Ɓɛ̀ iè ɓɛ̀ nìnbirìe tĩ́ihṹ á khɛ̃́ndàarɔ wì-bɛhɔ́ ɛ́ wóò zɔ lé nin. Ɓɛ̀ wóò bìsí-e yán nɛ a tɛ́ hɔ́ tɔnlɔ́ ɓɛ̀ nìnbirìe bòo hũn. Àpe ɛ́ te hɔ́ hɛ̃mù bòo ɛ́ wóò zɔ lɛ́ Dɔfĩn, à lò te ɓɛ́ nìnbirìe bɔ̀koohɛ̃ sɛ́wɛ́rí dénlán miyiɛ́ bòo ɛ́ wóò wé. 2À dɛ̀ ɓɛ̀ nìnbirìe lɛ yí dũ bòo dɔ̀ àá ɓɛ́lɛ ɛ́ wóò wé khe miinɛ̀ ɛ́ mi iè hɔ̀ lɛ ápe kùusɔ ɛ́ ɓìɛ pànkɛ́ ɛ́ wóò yèń. 3Ɛ̀ hɔ̀ lɛ ápe kùusɔ pànkɛ́ ɛ́ wóò yèń, á sãawi à wóo wé lé miyiɛ́ mí kùrú bɔ̀koohɛ̃ bòo hũn, kɛ́ ɓɛ́ yí ɓɛ́ nìnbirìe lɛ kɛ́ ɓɛ́ dòonún bɔ̀koohɛ̃ bòo hũn wɛ̀. 4Nìnbírɔ dɔ̀ ɛ́ yí dɛ̀ míte ɛ́ yá leń ɛ́ wé àá khɛ̃́ndàarɔ wì-bɛhɔ́ ɛ́ dàá ɛ́ ɓàaní míte ǹ wɛ̀. Dɔfĩn míte ǹ ɛ́ te ɓàasɔ ɛ́ wóò wé àá khɛ̃́ndàarɔ wì-bɛhɔ́ kɛ̀a ie Aarɔn bòo sí.

5Ɛ́ kɛ̀amu, ápe Kirisa ɛ́ lò ɓiɛ̀ ɛ́ yí teń míte ɛ́ yí leń ɛ̀ wé àá khɛ̃́ndàarɔ wì-bɛhɔ́ ɛ̀ dàá ɓàaní míte ǹ wɛ̀. À yú mí khɛ̃́ndàarɔ yaamu Dɔfĩn viì, Hɔ̀pe lɛ ɛ́ bie lɛ́ à ǹ nɛ làa:

«Kɔ̀pe ɛ́ temu iè niǹ Zuú,

Ɛ̀ dàá mìí zoòni ɛ́ ń iè mì Yàá.»

6Ɛ̀ hɔ̀pe Dɔfĩn ɛ́ bĩniɛ khɛ́ lé dáanú dɔ̀ lèpe mí bienù vɛ̃hṹ hũn ɛ́ nɛ làa:

«Kɔ́ iè khɛ̃́ndàarɔ fúu pɛ̃̀hṹ lɛ ɛ́ yá vé hũn,

Kɛ̀a ie Mɛlikisedɛɛke bòo sí.»

7Ɛ́ pɛ̃̀hṹ lɛ ɛ́ Yiezu dàa hàarí wi le sṹsùnù lɔ̀n, á hɛ̃nnɛ Dɔfĩn lɛ dɛ̀ à ɛ́ leń ɛ́ lé hɔ́ húmú hũn. À hàarí ɓɔ́nɓɔ́nikɛa Hɔ̀ ǹ, ɛ́ wũamɛa àá tɛn-bɛhɔ́, ɛ́ koosí mí yìncuò. Ɛ́ hɔpe Dɔfĩn ɛ́ kɔ̃́niɛ ɔ̀ iè hɔ̀ lɛ á ɛ́ tɛ̀ pehɔ̀ tĩì bòo. 8Hɛ̀rí hɔ̀ lɛ á lò iè Dɔfĩn Zuú, á lɔ̀n pɛ́wi bɔn ɛ́ dàa kerɛ hɔ̀pe Dɔfĩn tɛmu tànlɔ́ ǹ. 9Ɛ́ hɔ́ lɛ á víeniɛ mí tɔnlɔ́, á wo wɔ́ á nìnbírɔ lɛ ɛ́ te ɓɛpe nìnbirìe lɛ ɛ́ tɛ̀ piè bòo ɓɛ́kùi ɛ́ mii fuenínin ɛ̀ ɓɛ̀ dàá kań yán fúu. 10Ɛ́ Dɔfĩn ɛ́ wɔ́ à àá khɛ̃́ndàarɔ kɛ̀a ie Mɛlikisedɛɛke bòo sí.

Hɔ̀ ńvɛ àá híɛhɔ́ hɔ́ ńdɛsĩ̀nlɔ́ hũn bòo

11Ké dàa biehĩ́ bɔ̀kuì ɛ́ ke bie hɔ́pe bòo lɛ bòo hũn, kɛ́ ké ɲɛùn yí dɛ̀ pehɔ̀ ɲún ɛ́ yá munkɛ ɛ́ lɛ́ miɛ ǹ iè hɔ̀ lɛ ɛ́ mí den yáà vṹn dũń hɔ́ bòo lɛ ɛ́ ɓɛ́ ɛ́ khɛ́ àá miɛ ɲún wɛ̀. 12Mí hṹn sãawi ɛ̀ mì wé ɓɛ́ nìnbirìe kɛ̀ránliè kɛ̀a sáalɛ iè hɔ̀ lɛ ɛ́ ɓɛ́ ɛ́ hɔ̀ bòo ɛ̀ kɛ̀rán àá miɛ ɛ́ wo míɛ. Kɛ́ mípe ɛ́ den pɛ́wi mɛ̀kóo wi nɛ ɓɛ kɛ̀rán miɛ àá hɔ́pe hán bòo lɛ ɛ́ ɓɛ́ kɛ̀rɛa àá miɛ lè Dɔfĩn bienù hũn. Mì mɛ̀kóo ɛ́ pɛ́ wi hɔ yɔmu ǹ kɛ́ mí yá hɔ̀ dínlɔ́ lɛ lì ɛ̀ cɛ̀ wɛ̀. 13À nìnbírɔ lɛ ɛ́ wóò wé hɔ́ yɔmu à yìɛ́ ɛ́ iè zĩncáahɔ́ lɛ fĩ́i. Hɔ̀ bòo lɛ ɛ́ cã̀aní àá hɔ́ lɛ ɛ́ yá cã̀aní á yí dũ ɛ́ yáà wiekɛ wɛ̀. 14Kɛ́ hɔ́ díe lɛ lì ɛ́ pe iè ɓɛ̀ nìnbirìe lɛ dɛ̃un vɔ́ ɛ́ te ɓɛ́ dínlɔ́, ɓɛ̀pe lɛ ɛ́ mɛ́nɛ hɔ̀ bɔ̀tente àá hɔ́ bɔ̀koohɔ́ wiekɛrɔ́ ǹ.

Currently Selected:

Hebereɓɛ 5: bwj

Highlight

Copy

Compare