1 Zãn 4

Dɔfĩn Mɛkɛ̃nì àá ɔ́ ńbíyanle mɛkɛ̃nì dũń wiekɛrɔ́

1Kìe nìɛ lɛ ɛ́ ń wɛ, mì bí wóo dɛsĩ̀ ɓɛ̀ nìnbirìe ɓɛ́kùi lɛ wóò bie nɛ ɓɛ́pe ɛ́ dàa le Mɛkɛ̃n-Sãanu wɛ̀. Kɛ́ mí den wóo hàaní ɓɛ́ húi ɛ̀ dàá dũń kɛ́ lépe mɛkɛ̃nì lɛ wi ɓà ǹ ɛ́ dàa ɓen ɛ́ lé àá Dɔfĩn viì; iè hɔ̀ lɛ ɛ́ ɓɛ́ ɓúo bɔ̀háaníriè bìkuì ɛ́ wo hĩ́nà tú lé dímíɲɛ́. 2Ɛ́ lɛ iè bòo lɛ ɛ́ mí wóo mii dàá dũń lé Dɔfĩn Mɛkɛ̃ni: nìnbírɔ yée nìnbírɔ lɛ ɛ́ tɛ̀ ɛ́ dũnɛ nɛ Yiezu Kirisa ɛ́ ɓɛrɛ siɛ wɔ́ nìnbírɔ, ɛ̀ Dɔfĩn Mɛkɛ̃ni ɛ́ wi ɓàasɔ ǹ. 3Ɛ̀ nìnbírɔ lɛ ɛ́ yí tɛ̀ ɛ̀ dũń kɛ́ Yiezu ɛ́ ɓɛrɛ siɛ wɔ́ nìnbírɔ, ɛ̀ lè mɛkɛ̃ni lɛ wi ɓàasɔ ǹ ɛ́ yí lé àá Dɔfĩn viì kɛ́ á iè Kririsa ɓà ńbíyanle mɛkɛ̃ni ɛ́ temu wi ɓàasɔ ǹ, àpe Kririsa ɓà ńbíyanle lɛ ɛ́ mí ɲɛ́ kɛ́ ɓɛ́ nɛ a vaá-ɓen, á lò yɛ̀rɛ́ zĩ̀níkɛa wi lepe dímíɲɛ́ hũn vɔ́.

4Mìpe niǹ nìɛ, mìpe bòo ɛ́ sɛ̃̀ Dɔfĩn, ɛ̀ mì yú hɔ́ pànkɛ́ ɓɛ́pe ɓúo bɔ̀háaníriè lɔ̀n, iè hɔ̀ lɛ ɛ́ lépe Mɛkɛ̃ni lɛ ɛ́ wi miɛ ǹ ɛ́ den pànkɛ́ wi pɔ le lɛ ɛ́ wi ɓɛ́ dímíɲɛ́ nìɛ ǹ. 5Ɓɛ̀pe ɛ́ bòo sɛ̃̀ lè dímíɲɛ́ ǹ; ɛ́ si iè hɔ̀pe ɛ́ peɓɛ̀ biehĩ́ ɛ́ dàa iè lè dímíɲɛ́ biehĩ́, ɛ̀ lèpe dímíɲɛ́ ɛ́ dàa wóò ɲí peɓɛ̀ bòo. 6Kɛ́ képe ɛ́ bòo sɛ̃̀ Dɔfĩn; ɛ́ nìnbírɔ lɛ ɛ́ dũ Dɔfĩn ɛ́ wóò tɛ̀ ɲí ké bòo; ɛ̀ nìnbírɔ lɛ bòo ɛ́ yí sĩ̀ Dɔfĩn ɛ́ yáà ɲí ké bòo wɛ̀. Ɛ́ sí iè pe bòo lɛ temu wóò lɛ́ ɛ̀ kè dàá dũń lé bɔ̀berà Mɛkɛ̃ni àá ɓɛ́ nìnbiriè fĩinílán mɛkɛ̃nì ɛ̀ wiekɛ.

Dɔfĩn ɛ́ iè Wanminu ɓàasɔ

7Kìe nìɛ lɛ ɛ́ ń wɛ, mì nɛ ke wɛní ɓán kèpe àá ké nì-cóohɛ̃ iè hɔ̀ lɛ ɛ́ lé wanminu ɛ́ lé àá Dɔfĩn viì. Ɛ́ nìnbírɔ lɛ ɛ́ wɛ ɓá ńkɔhĩ́ ɛ́ iè nìnbírɔ lɛ ɛ́ tɔn lɔ́ Dɔfĩn à lò dũ Dɔfĩn. 8Ɛ̀ nìnbírɔ lɛ ɛ́ yí wɛ ɓá ńkɔhĩ́ ɛ́ yí dũn Dɔfĩn wɛ̀; iè hɔ̀ lɛ ɛ́ Dɔfĩn iè wanminu ɓàasɔ. 9Ɛ́ lɛ iè hɔ̀ bòo lɛ ɛ́ Dɔfĩn ɛ́ wɔ́ ɛ́ dàa zɛ̃́niɛ mí wanminu kie ǹ: Hɔ̀ ɛ́ tɔniɛ mí Zu-cóoní á ɓɛrɛ lè dímíɲɛ́ hũn bòo lɛ ɛ́ wé ɛ̀ kè yí lé mɛkɛ̃nì piè yènsénín. 10Ɛ́ lépe wanminu sɔ ɛ́ den iè lè lɛ: hɔ̀ yí képe ɛ́ te Dɔfĩn ɛ́ wɛniɛ wɛ̀; kɛ́ hɔ́pe Dɔfĩn ɛ́ te kepe ɛ́ wɛniɛ ɛ́ Hɔ́ dàa tɔniɛ mí Zuú á ɓɛrɛ lɛ́ míte ɛ́ ɓɛ́ ɓɔ́ ɛ́ dàa tiɛ kè bɔ̀koohɛ̃ ɛ́ lɔ́ ké lɔ̀n.

11Kìe nìɛ lɛ ɛ́ ń wɛ, kɛ́ Dɔfĩn ɛ́ ɓen wɛniɛ kie cɛ̃̀un kɛ̀amu, ɛ̀ kèpe ɛ́ ɓiɛ̀ sãawi ɛ̀ kè wɛní ɓán kèpe àá ké nì-cóohɛ̃. 12Nìnbírɔ dɔ̀ lɛ ɛ́ mɔn Dɔfĩn mɔn ɛ́ mí wɛ̀; kɛ́ ké den ɓen wɛ ɓán, ɛ́ Dɔfĩn ɛ́ kań àá kie, ɛ̀ piè wanminu ɲunù lò ɛ́ tí kie ǹ. 13Ɛ́ lɛ iè hɔ̀ bòo lɛ ɛ́ temu lɛ́ ɛ́ ké dàa dũ kɛ́ ké wi àá Dɔfĩn, ɛ̀ hɔ̀pe Dɔfĩn ɛ́ lò ɓiɛ̀ wi àá kie: hɔ̀ den iè hɔ̀ lɛ ɛ́ Hɔ́ lɛ́ mí Mɛkɛ̃ni kie ǹ. 14Ɛ́ képe, ké mɔn hɔ̀, ɛ́ ké dàa ɛ́ hɔ̀ bie nɛ a Yàá ɛ́ tɔniɛ mí Zuú nɛ a ɓen wé lé dímíɲɛ́ fuenírɔ. 15Ɛ́ nìnbírɔ lɛ ɛ́ tɛ̀ dũ ɛ́ bie nɛ Yiezu ɛ́ iè Dɔfĩn Zuú, ɛ̀ Dɔfĩn ɛ́ wi àá ɓàasɔ, ɛ̀ ɓàasɔ ɓiɛ̀ ɛ́ wì àá Dɔfĩn. 16Ɛ̀ kèpe, ké dũ ɛ̀ kè lò dũmuasɛ̃̀ nɛ Dɔfĩn ɛ́ wɛ kie. Dɔfĩn ɛ́ iè waminu ɓàasɔ; ɛ́ nìnbírɔ lɛ wi wanminu hũn ɛ́ canɓán àá Dɔfĩn, ɛ̀ Dɔfĩn ɛ́ lò ɓiɛ̀ wi àá ɓàasɔ. 17Ɛ́ kɛ́ Dɔfĩn wanminu ɛ́ ɲunù ɛ́ tú kie ǹ, hɔ́rɔsí ɛ̀ kè mɛkɛ̃nì lèpe dímíɲɛ́ lɛ hũn ɛ́ wo dɛ̃̀ kɛ̀a ie Yiezu Kirisa dén. Ɛ́ zɔǹ lɛ kɛ́ Dɔfĩn ɛ́ mii lè ɓɛ̀ nìnbirìe lìe, ɛ̀ kèpe fɔnù ɛ́ wo tɛ́rɛ. 18Ɛ́ záahĩ́ ɛ́ mínɛ wanminu hũn wɛ̀; kɛ́ lé wanminu lɛ ɛ́ ɲunù tú ɛ́ wóo ɲɛ hɔ záahĩ́. Nìnbírɔ lɛ ɛ́ zánkɛ iè wìe lɛ ɛ́ dũ kɛ́ fɔ́ɓán à lɔ̀n ɛ́ ɓén be. Ɛ́ nìnbírɔ lɛ ɛ́ zankɛ ɛ́ pe yí dàa wanminu lɛ ɲunù tú wɛ̀. 19Ɛ́ hɔ́ ɓen iè képe, ɛ̀ kè wɛ Dɔfĩn àá ɓɛ́ nìnbirìe iè hɔ̀ lɛ ɛ́ hɔ́pe Dɔfĩn ɛ́ temu dú híɛhɔ́ ɛ́ wɛníɛ kie. 20Kɛ́ nìnbírɔ ɛ́ nɛ mípe ɛ́ wɛ Dɔfĩn kɛ́ á lò den hɛ́rɛ ɓá ńkɔnù, ɛ̀ ɓàasɔ ɛ́ iè ɓɔ́-ɓúukɛ. Iè hɔ̀ lɛ ɛ́ nìnbírɔ lɛ ɛ́ yí wɛ ɓá ńkɔnù lɛ á loo àá mí yìe ɛ́ yí dɛ̀ Dɔfĩn lɛ á yí loo àá mí yìe ɛ́ yá wɛní wɛ̀. 21Ɛ́ lɛ iè lè ɲunù bienù lɛ á Kirisa ɛ́ lɛ́ kie ǹ: à nìnbírɔ lɛ ɛ́ wɛ Dɔfĩn ɛ́ lò ɓiɛ̀ fɔ́ɓán à wɛní ɓá ńkɔnù.

Currently Selected:

1 Zãn 4: bwj

Highlight

Copy

Compare