1 Zãn 5

Kè ńdɛsĩ̀nlɔ́ ɛ́ lɛ́ ɛ́ ké wóò yí pànkɛ́ lé dímíɲɛ́ lɔ̀n

1Nìnbírɔ lɛ dũmuasɛ̃̀ nɛ Yiezu ɛ́ iè ɔ̀pe Kirisa, ɛ̀ ɓàasɔ ɛ́ tɔn lɔ́ Dɔfĩn, ɛ̀ nìnbírɔ lɛ ɛ́ wɛ a Yàá ɛ́ lò ɓiɛ̀ wɛ piè zuú. 2Kɛ́ ké ɓen wɛ Dɔfĩn, ɛ̀ kè ɛ́ vɛ ɛ̀ ɓáaníɓán àá pehɔ̀ ɲunù tɛmu, hɔ́rɔsí ɛ̀ kè ɛ́ den hɛ̀ wo dũ kɛ́ ké ɛ́ wɛ hɔpe Dɔfĩn nìɛ. 3Ɛ́ hɔ́ ńwɛní Dɔfĩn iè bòo ɛ́ ɓɛ́ nɛ ke mɛ̀ndɛ̃ pehɔ̀ ɲunù tɛmu. Ɛ̀ pehɔ̀ ɲunù tɛmu ɛ́ yí tìerɔ́ dɔ̀ kè ɲún hũn wɛ̀; 4iè hɔ̀ lɛ ɛ́ Dɔfĩn zɛ̀ɓɛ̀ ɛ́ wóò yí pànkɛ́ lè dímíɲɛ́ lɔ̀n. Ɛ̀ hɔ̀ bòo lɛ ɛ́ temu wóò lɛ́ ɛ̀ kè dàá yí hɔ́ pànkɛ́ lè dímíɲɛ́ lɔ̀n ɛ́ iè kè ńdɛsĩ̀nlɔ́. 5Á den wo iè wieni ɛ́ temu ɛ́ yú hɔ́ pànkɛ́ lè dímíɲɛ́ lɔ̀n? À iè ɔ̀lɛ mí-dòonun lɛ ɛ́ dũmuasɛ̃̀ nɛ Yiezu ɛ́ iè Dɔfĩn Zuú.

6À den iè ɔ̀pe Yiezu Kirisa míte ǹ ɛ́ temu ɓɛrɛ lè dímíɲɛ́ hũn, ɛ́ ɓɛrɛ lɛ́ míte ɛ́ ɓɛ́ líiniɛ hɔ̀ ɲumu hũn, à lò koosí mí cãani ɛ́ dàa húrun. Ɛ́ hɔ́ wo yí hɔ́ ɲumu mí-dòonún ɛ́ ɓɛ́ líiniɛ ɔ̀ hũn, kɛ́ á lò bĩniɛ ɛ́ koosí mí cãani. Ɛ́ lé Mɛkɛ̃n-Sãanu ɛ́ temu ɛ́ zɛ̃́ní kɛ́ hɔ́ ɛ́ iè bòo lɛ ɛ́ bɔn, iè hɔ̀ lɛ ɛ́ lépe Mɛkɛ̃n-Sãanu ɛ́ iè bɔ̀berà. 7Ɛ́ bòo bɔ̀nbɔ̀ tĩ ɛ́ te hɔ bɔ̀berà ɛ́ munkɛ hɔpe sí bòohũn: 8Lè Mɛkɛ̃n-Sãanu àá hɔ̀ ɲumu àá hɔ́ cãani; ɛ́ hɔ́pe bɔ̀nbɔ̀ tĩ sí míkùi ɛ́ ɲunù iè dìcóoní. 9Ɛ́ ɓɛ́ nìnbirìe bòo lɛ ɛ́ ɓɛ́ ɛ́ mɔn ɛ́ bie ɛ́ ké wóò tɛ̀ bòo; kɛ́ Dɔfĩn bòo lɛ ɛ́ Hɔ́ ɛ́ zɛ̃́ní ɛ́ den temu ɛ́ ɓań cɛ̃̀un; ɛ́ hɔ́pe bòo lɛ ɛ́ Dɔfĩn ɛ́ zɛ̃́ní àá kie ɛ́ lò den iè pehɔ̀ Zuú bòo. 10Ɛ́ kɛ̀amu, ɛ́ nìnbírɔ lɛ ɛ́ dũmuasɛ̃̀ Dɔfĩn Zuú ǹ ɛ́ dũ mí tĩì hũn kɛ́ hɔ́pe bòo lɛ ɛ́ Dɔfĩn ɛ́ khɛ́ ɛ́ iè bòo lɛ ɛ́ bɔn. Kɛ́ nìnbírɔ lɛ ɛ́ pe yí dɛsĩ̀ Dɔfĩn, ɛ̀ ɓàasɔ iè wìe lɛ ɛ́ Dɔfĩn ɛ̀ wé àá ɓɔ́-ɓúukɛ iè hɔ̀ lɛ á yí dɛsĩ̀ Dɔfĩn bòo lɛ ɛ́ Hɔ́ khɛ́ mí Zuú bòo hũn wɛ̀. 11Ɛ́ Dɔfĩn bòo lɛ ɛ́ Hɔ́ zɛ̃́niɛ lɛ́ kiè ǹ ɛ́ iè hɔ̀ lɛ: Hɔ̀pe Dɔfĩn ɛ́ lɛ́ lé mɛkɛ̃nì lɛ yá vé kie ǹ, ɛ̀ lèpe mɛkɛ̃nì sɔ ɛ́ piè Zuú ɛ́ te dàa ɓɛrɛ. 12Ɛ́ nìnbírɔ lɛ ɛ́ canɓán àá ɔ́ Zuú ɛ́ dàa le mɛkɛ̃nì; ɛ̀ nìnbírɔ lɛ ɛ́ yí cɛɓán àá ɔ́ Zuú ɛ́ yí dàa le mɛkɛ̃nì wɛ̀.

Lè mɛkɛ̃nì lɛ ɛ́ yá vé bòo

13Ɛ́ ń wɛ̃́ hɔ́ pesí ɛ́ lɛ́ miɛ ǹ bòo lɛ ɛ́ wé ɛ̀ mì dũń kɛ́ mí dàa le mɛkɛ̃nì lɛ ɛ́ yá vé mìpe lɛ ɛ́ dũmuasɛ̃̀ à Dɔfĩn Zuú yèrè ǹ. 14Ɛ́ ké wo wóò vɛ lúwiní Dɔfĩn ǹ kɛ́ ké fɔnù ɛ́ tɛ́rɛ iè hɔ̀ lɛ ɛ́ ké ɓen hɛ̃nnɛ̀ bòo yée bòo pehɔ̀ viì ɛ̀ ɓaàniɛɓán àá pehɔ̀ tĩì bòo, ɛ̀ Hɔ̀ wóò ɲí ké hɛ̃nnɛ̀. 15Ɛ́ hɔ́ lɛ ɛ́ ké wo dũ nɛ Dɔfĩn ɛ́ wóò ɲí ké hɛ̃nnɛ̀, ɛ́ ké wo dũ kɛ́ hɔ́pe bòo lɛ ɛ́ ké wóò hɛ̃un pehɔ̀ viì ɛ́ ké wóò yí.

16Kɛ́ nìnbírɔ dɔ̀ ɛ́ mɔn ɓá ńkɔnù kɛ́ á ɛ́ bɔ̀koohɔ́ lɛ ɛ́ yáà ɓen àá húmú ɛ̀ wé, ɛ̀ ɓàasɔ ɛ̀ hɛ̃un Dɔfĩn, ɛ́ Dɔfĩn ɛ́ lɛ́ mɛkɛ̃nì ɓà zuú sɔ ǹ; ɓɛ̀ iè ɓɛ̀lɛ bɔ̀koohɛ̃ lɛ ɛ́ ɓɛ́ wóò wé ɛ́ yáà ɓen àá húmú ɛ́ ń nɛ. Kɛ́ bɔ̀koohɔ́ dɔ̀ wi yán ɛ́ pe wóò ɓen àá húmú#5.16 Vɛ húi Mat 12.31., ɛ́ hɔ́ yí hɔ́pe ɛ́ ń nɛ mi wóo hɛ̃un Dɔfĩn bòo hũn wɛ̀. 17Ɛ́ bòo yée bòo lɛ ɛ́ yí te mí yiè lɛ ɛ́ nìnbírɔ ɛ́ wóò wé míkùi ɛ́ iè bɔ̀koohɔ́, kɛ́ hɔ́ yí bɔ̀koohɛ̃ míkùi ɛ́ temu wóò ɓen àá húmú wɛ̀.

18Ké dũ kɛ́ nìnbírɔ yée nìnbírɔ lɛ ɛ́ tɔn lɔ́ Dɔfĩn ɛ́ yáà wé bɔ̀koohɛ̃ ɛ̀ lan wɛ̀; kɛ́ Dɔfĩn Zuú ɛ́ wóò ɓɛ́ɓɛ́ ɓàasɔ ǹ ɛ̀ Sitũanɛ ɛ̀ yá dàń bòo dɔ̀ ɛ̀ wé àá ɔ́ wɛ̀.

19Ké dũ kɛ́ képe ɛ́ bòo sɛ̃̀ Dɔfĩn, ɛ̀ lè dímíɲɛ́ míkùi ɛ́ pe wi e Sitũanɛ núnú hũn.

20Ɛ́ ké dũ kɛ́ á Dɔfĩn Zuú ɛ́ ɓɛrɛ, ɛ́ ɓɛrɛ lɛ́ hɔ́ bɔ̀dũmunù kie ǹ ɛ̀ kè dàá dũń hɔ́pe Dɔfĩn hɛ̀lɛ̀lɛ̀. Ɛ́ ké wo canɓán àá hɔ́pe Dɔfĩn hɛ̀lɛ̀lɛ̀ piè Zuú Yiezu Kirisa bòo hũn. Ápe piè Zuú ɛ́ temu ɛ́ iè pe Dɔfĩn hɛ̀lɛ̀lɛ̀ à lò temu iè lèpe mɛkɛ̃nì lɛ yá vé. 21Niǹ nìɛ, ɛ́ mí pɛ mite àá hɔ́ wɛ̃̀hɛ̃ bòo.

Currently Selected:

1 Zãn 5: bwj

Highlight

Copy

Compare