1 Zãn 3

1Ɛ́ mí wo húi bòo lɛ á Yàá ɛ́ dàa hɛ̀ wɛniɛ kie! Piè wanminu ɛ́ lɛ́ ɛ́ ɓɛ́ wóò ve kie nɛ Dɔfĩn nìɛ, ɛ́ ké lò ɓiɛ̀ iè ɓɛ̀pe àá bɔ̀bín. Kɛ́ ɓɛ́ dímíɲɛ́ nìɛ ɛ́ den yí dũ kɛ́ ké iè Dɔfĩn nìɛ wɛ̀; iè hɔ̀ lɛ ɛ́ ɓɛ́ den yí dũ hɔ pe Dɔfĩn lɛ iè kìe Yàá wɛ̀. 2Kìe nìɛ lɛ ɛ́ ń wɛ, kɛ̀a laà lɛ lɔ̀n ɛ́ ké iè Dɔfĩn nìɛ, kɛ́ bòo lɛ ɛ́ ké te dàá ɓén dìń ɛ́ ɲɛùn ɛ́ yí zɛ̃́ní wìée wɛ̀. Kɛ́ képe wo dũ nɛ pɛ̃hṹ lɛ kɛ́ á Kirisa ɛ́ khũ̀a ɓɛrɛ ɛ́ ké ɓén léɓán àá ɔ́ iè hɔ̀ lɛ ɛ́ ké ɓén ɛ́ mi-ɛ kɛ̀a bòo lɛ á dàa ɛ́ dɛ̃̀. 3Ɛ́ nìnbírɔ lɛ ɛ́ hìé kɛ̀amu nɛ mí ɓén mi-ɛ pe Kirisa ɛ́ wóò tiɛ míte à ce kɛ̀a bòo lɛ ápe Kirisa ɛ́ dàa ɛ́ ce.

4Nìnbírɔ lɛ wóò wé bɔ̀koohɔ́ ɛ́ iè ninbírɔ lɛ ɛ́ pɛ̃́ Dɔfĩn ɲunù tɛmu; iè hɔ̀ lɛ ɛ́ hɔ́ bɔ̀koohɔ́ wénlɔ́ ɛ́ iè Dɔfĩn ɲunù tɛmu pĩ́nlɔ́. 5Ɛ́ mí lò wo dũ kɛ́ á Yiezu Kirisa ɛ́ ɓɛrɛ bòo lɛ ɛ́ wé ɛ̀ ɓɛ́ nìnbirìe bɔ̀koohɛ̃ á leń ɛ̀ lé peɓɛ̀ lɔ̀n; ɛ́ bɔ̀koohɔ́ dɔ̀ ɛ́ mí-ɛ pe ǹ wɛ̀. 6Ɛ́ sí iè hɔ̀pe ɛ́ nìnbírɔ lɛ ɛ́ canɓán àá ɔ̀ ɛ́ yáà bĩní wé bɔ̀koohɔ́ wɛ̀. Kɛ́ nìnbírɔ dɔ̀ ɛ́ pe wóò pɛ mí híɛhɔ́ à wé hɔ́ bɔ̀koohɛ̃, ɛ̀ hɔ̀ iè bòo lɛ ɛ́ zɛ̃́ní kɛ́ ɓàasɔ ɛ́ ɲɛùn yí mi-ɛ à lò ɛ́ yí dũ a wɛ̀.

7Niǹ nìɛ, mì bí nɛ nìnbírɔ dɔ̀ khɛ̃̀ní miɛ ɛ̀ vĩ́iní wɛ̀. À nìnbírɔ lɛ ɛ́ wóò wé hɔ́ bòo lɛ ɛ́ cã̀aní ɛ́ kùusɔ ɛ́ cã̀aní, kɛ̀a bòo lɛ ápe Yiezu Kirisa ɛ́ dàa ɛ́ cã̀aní. 8À nìnbírɔ lɛ wóò pɛ mí híɛhɔ́ à wé hɔ́ bɔ̀koohɛ̃ ɛ́ bòo sɛ̃̀ Sitũanɛ ǹ, iè hɔ̀ lɛ á Sitũanɛ ɛ́ temu ɛ́ hɔ̀ bɔ̀koohɛ̃ ɛ̀ wé ɛ̀ vɛ mìí àá hɔ́ bòo míkùi fĩ̀i ɓánlén. Á Dɔfĩn Zuú ɛ́ den ɓɛrɛ ɛ́ mii ɓen yáakɛ a Sitũanɛ bòo lɛ á wóò wé míkùi. 9Nìnbírɔ lɛ ɛ́ wɔ́ Dɔfĩn yɛ̀nù ɛ́ pe yáà bĩní wé bɔ̀koohɔ́ wɛ̀, iè hɔ̀ lɛ ɛ́ Dɔfĩn mɛkɛ̃nì ɛ́ wi è ǹ, á wo yí dɛ̀ bɔ̀koohɔ́ ɛ́ yá bĩní wé iè hɔ̀ lɛ ɛ́ Dɔfĩn ɛ́ iè ɓà Yàá. 10Ɛ́ lɛ iè hɔ̀ bòo lɛ ɛ́ temu wóò lɛ́ ɛ̀ Dɔfĩn nìɛ ɛ̀ dàá dũń ɛ̀ lí-e Sitũanɛ nìɛ ǹ: Nìnbírɔ íe nìnbírɔ lɛ ɛ́ yáà wé bòo lɛ ɛ́ cã̀aní à lò ɛ́ yí wɛ ɓá ńkɔnù ɛ́ bòo ɛ́ yí sĩ̀ Dɔfĩn wɛ̀.

Ńwɛníɓán kɛ̀a zɛ̀ɓɛ̀ bòo sí

11Ɛ́ lɛ iè lè bienù lɛ ɛ́ mí ɲɛ́ àá pehɔ̀ fìi ɓánlén: Mì nɛ ke wɛní ɓán kè kùi àá ké nì-cóohɛ̃. 12Mì bí nɛ ke wé kɛ̀a ie Kaɲɛ wɛ̀. À hàarí bòo sɛ̃̀ à Sitũanɛ ǹ á dàa hàarí ɓɔ́ ɓá zuú. Ɛ́ ńɓúò temu lɛ́ á dàa hàarí ɓú-o? Hɔ̀ den hàarí iè hɔ̀ lɛ ápe Kaɲɛ bɔ̀werà ɛ́ den hàarí ɛ́ yí sãa wɛ̀; hɔ́rɔsí kɛ́ ɓà zuú ɛ́ pe bɔ̀werà ɛ́ hàarí ɛ́ cã̀aní. 13Kìe zɛ̀ɓɛ̀, kɛ́ ɓɛ́ dímíɲɛ́ nìɛ ɛ́ ɓen hɛ́rɛ miɛ, ɛ̀ mì bí nɛ hɔ yòokɛ mi lɔ̀n wɛ̀. 14Ké lò wo dũ kɛ́ ké dɛ̃̀ kɛ̀a nìɛ lɛ ɛ́ lɔ́ hɔ́ húmú hũn ɛ́ kíe van zɔn lè mɛkɛ̃nì hũn iè hɔ̀ lɛ ɛ́ ké wɛ kìe zɛ̀ɓɛ̀. Ɛ́ nìnbírɔ lɛ kɛ́ á yí wɛ ɓá ńkɔnù à pɛ́wi ɛ́ wi hɔ húmú pànkɛ́ núnú hũn. 15Nìnbírɔ lɛ kɛ́ á hɛ́rɛ ɓá ńkɔnù à iè nìɓé. Ɛ́ mí lò wo dũ kɛ́ hɛ̀rí nìɓé dɔ̀ ɛ́ yí dàa mɛkɛ̃nì lɛ ɛ́ yá vé lɛ ɛ́ wi mí ǹ wɛ̀. 16Ɛ́ lɛ iè hɔ̀ bòo lɛ temu lɛ́ ɛ́ ké dàa dũ le wanminu: Yiezu Kirisa ɛ́ lɛ́ mí mɛkɛ̃nì kè bòo hũn. Ɛ́ képe ɛ́ ɓiɛ̀ sãawi ɛ̀ kè tɛ̀ ɛ̀ lɛ́ ké mɛkɛ̃nì kìe zɛ̀ɓɛ̀ bòo hũn. 17Kɛ́ nìnbírɔ dɔ̀ lɛ ɛ́ dàa le dímíɲɛ́ yírɛ́ bɔ̀kùi ɛ́ loo ɓá zuú dɔ̀ lɛ ɛ́ hɔ́ bòo ɛ́ pɔ, kɛ́ ɓà zuú sɔ miinɛ̀ ɛ́ yí ɓaà ɔ̀, á wo wiɛ dàa ɛ́ dɛ̀ ɛ́ bie nɛ mípe ɛ́ wɛ Dɔfĩn? 18Niǹ nìɛ, mí bí nɛ ke wɛní ɓán àá ɲunù àá mí bentĩɛ̀ bierɔ́ mí dòonún wɛ̀; kɛ́ mí nɛ ke wóo wé bòo lɛ ɛ́ zɛ̃́ní kɛ́ ké hɛ̀ wɛ ɓán àá bɔ̀bín.

19Ɛ́ sí iè bòo lɛ temu ɓén zɛ̃́ní kɛ́ ké iè bɔ̀berà nìɛ, ɛ̀ kè tĩɛ̀ ɛ́ wo ɛ́ kań vi-cóoní Dɔfĩn híɛhɔ́. 20Ɛ́ hɛ̀rí kɛ́ ké tĩɛ̀ ɛ́ fi àá kie nɛ ké ɛ́ wɔ́ khɔn, ɛ̀ Dɔfĩn ɛ́ pe ɓàń pɔ ke tĩɛ̀, ɛ̀ Hɔ̀ ɛ́ dũ bòo míkùi. 21Kìe nìɛ lɛ ɛ́ ń wɛ, kɛ́ ké tĩɛ̀ ɛ́ ɓen yá fi àá kie nɛ ké wɔ́ khɔn, hɔ́rɔsí ɛ̀ kè dɛ̀ ɛ́ húi àá Dɔfĩn viì kɛ́ ké fɔhĩ́ɛ ɛ́ tánkɛa. 22Ɛ́ hɔ́ bòo lɛ ɛ́ ké wóò hɛ̃un pehɔ̀ viì míkùi ɛ́ Hɔ́ wóò lɛ́ kie ǹ iè hɔ̀ lɛ ɛ́ ké ɓɛ́ɓɛ́a pehɔ̀ ɲunu tɛmu ǹ, ɛ̀ kè lò ɛ́ wóò wé hɔ́pe bòo lɛ ɛ́ tĩ Hɔ̀ ǹ. 23Ɛ́ lépe Dɔfĩn ɲunu tɛmu ɛ́ iè lè lɛ: Nɛ ke dɛsĩ̀ mí Zuú Yiezu Kirisa yèrè lɔ̀n, ɛ̀ kè lò wɛní ɓán kèpe àá ké nì-cóohɛ̃ kɛ̀a bòo lɛ ɛ́ Hɔ́ dàa khɛ́ hɔ́ ɛ́ lɛ́ kie ǹ. 24Álɛ kɛ́ á ɓɛ́ɓɛ́a lèpe Dɔfĩn ɲunù tɛmu ǹ, ɛ̀ ɓàasɔ ɛ́ can dɛ̃̀ hɔ̀pe Dɔfĩn, ɛ̀ Dɔfĩn ɛ́ ɓiɛ̀ wi àá ɔ́. Ɛ́ lɛ iè hɔ̀ bòo lɛ temu lɛ́ ɛ́ ké dàa dũ kɛ́ Dɔfĩn ɛ́ wi àá kie: hɔ̀ den iè lè Mɛkɛ̃n-Sãanu lɛ ɛ́ hɔ́ ɛ́ lɛ́ kie ǹ bòo hũn.

Currently Selected:

1 Zãn 3: bwj

Highlight

Copy

Compare