Mafunukuliko 8
8
1Ni pala akakidindwili kyakukomelela kya saba, kikayili kinunu kunani ngati nusu ya saa. 2Ni nikaweni wakamalaika saba wala wayima palongolo pa Mulungu; ni sikapelakiki kwawe mbata saba.
3Ni malaika yungi akachiti ni akayimasiki kugayinamila mathbahu, wakuya ni kiwiga kya lubani kya zahabu; ni yikapelakiki kwake lubani yingi, nausi ayipeleke kuyonjakesa pa maluwo ga wawalafu woha gala gayii panani pa mathbahu ga zahabu gayii palongolo pa kitihu kya utwa. 4Ni likakweliti lyosi lya lubani, pamonga na maluwo ga wawalafu, pa miho ga Mulungu kipitile pa kiwoko kya malaika. 5Ni malaika akitola kiwiga kya lubani; ni akakimemisi nu mwoto kipitile pa mathbahu, ni akakitumalili mu ndima: ni sikapatiti kuya mbamba sya kuwuluma, ni njwawila, ni mbamba sya kumulika, ni kinyukunyuku.
6Ni wakamalaika awa saba wakuya ni mbata saba wakayiwikili ngani wakuwe.
7Ni wakutumbula akakuwiti mbata, ni fikapatiti kuya baho fula ya maganga nu mwoto, wakuhasangana nu mwasi, ni fikalekelakiki mu ndima: ni lilundu lya kadatu lya ndima likatinyasiki, ni lilundu lya kadatu lya mikongo likatinyasiki, ni linyasi lyoha liwisi likatinyasiki.
8Ni malaika wa kawili akakuwiti mbata, ni ngati kidunda kikulungu kya kutinyika nu mwoto likalekeliki mu nyanja: ni lilundu lya kadatu lya nyanja likapatiti kuya mwasi; 9ni likafwili lilundu lya kadatu lya fyakupangika fya mu nyanja, fila fyakuya nu wumi; ni lilundu lya kadatu lya magalawa likayanangiki.
10Ni malaika wa kadatu akakuwiti, ni lukagwili lutondo lukulungu kipitile kunani, lwakutinyika kihwanakiso kya mwenge, ni lukagwili pa lilundu lya kadatu lya mikuka, ni pakulapukila machi; 11ni lihina lya lutondo lula lukemeleka Absintho: ni lilundu lya kadatu lya machi likapatiti kuya absintho; na wandu wingi wakafwili pakunywa machi gala, pakukita gakawawasiki.
12Ni malaika wa ncheche akakuwiti mbata, ni lilundu lya kadatu lya lijuwa likaliwatiki, ni lilundu lya kadatu lya mwesi, ni lilundu lya kadatu lya ndondo; nausi lilundu lya kadatu lya isi lilekalike lwisi, ni musi usilasika pa kwelu lilundu lyake lya kadatu, ni kilo wiwilawila.
13Ni nikaweni, ni nikayufwini kapungu, yiwuluka pagati pa nyingalila, kujowa ni njwawila ngulungu, Yoyo, yoyo, yoyo, kwa wala wakuhwela pa ndima, kwa ndawa ya njowelo sya kusigala sya mbata sya wakamalaika wadatu, wala nawombe wakona nukukuwa.
Currently Selected:
Mafunukuliko 8: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
