Mafunukuliko 9
9
1Ni malaika wa mhano akakuwiti mbata, ni nikaweni lutondo lugwili kipitile kunani kiyingalile nu ndima: ni ikapelekiki kwake funguo ya liwumba lya kina; 2Ni akalidindwili liwumba lya kina; ni likakweliti lyosi kipitile pa liwumba, ngati lyosi lya litende likulungu; ni lijuwa ni hewa likalekaliki lwisi kipitile pa lyosi lya pa liwumba. 3Ni mapalasi gapititi pa lyosi kiyingalile pa ndima; ni yikapelakiki chengo kwa wombe, umu fipilili fya pa ndima fiyii ni chengo. 4Ni kukajowiki kwa wombe kukita gasiyananga linyasi lya pa ndima, ni haka kindu kiwisi kiyi kyoha, haka nkongo uyi woha, lema wandu wala nawombe wayilepe ni kyakukomeleka kyake Mulungu pa fiwungi fyawe. 5Ni kukapelekiki kwa wombe kukita gasiwakoma wombe, koma kukita wang’ahike miesi mhano: ni kung’ahika kwawe kukayili ngati kung’ahika kwa kipilili, pala kinduma mundu. 6Ni pa magono gagalagala wandu yawakilonde‐londe kifwa, ni yawakikolele lepa; ni yawanyonyele kufwa, leka kufwa kuwakimbila. 7Ni mahwanakiso ga mapalasi gakayili ngati mafarasi gawikakili ngani kubita ku ngondo; ni pa mitu yawe fikayili baho ngati fikupiku fyakuhwanangana ni zahabu, ni fyene fyawe ngati fyene fya wandu. 8Ni wakayili ni liyunju ngati liyunju lya wadala, ni mino gawe ngati mino ga mahimba. 9Ni gakayili ni fikopa pa kifimba ngati fya kyuma; ni njwawila ya mapapatilo gawe yikayili ngati njwawila ya magareta ga ngondo, ya mafarasi mingi gakukimbila mu ngondo. 10Ni gayii ni mikila ngati ya fipilili ni milomo; ni pa mikila yawe gayii ni mbafu kuwinisa wandu kwa miesi mhano. 11Gayii ni mutwa panani pa gombe yuyu malaika wa kina kila; lihina lyake pa kiHebrayo liyii Abaddon, ni pa kiGriki lihina ayii nalyo Apolluon.
12Yoyo yakutumbula yilutiti: lola, sihicha kawili Yoyo siwili panyuma pa iyi.
13Ni malaika wa sita akakuwiti, ni nikayufwini njowelo kuhumila pa manyelo ga mathbahu ga zahabu aga gayii palongolo pa Mulungu, 14kunjowela malaika wa sita, wakuya ni mbata, Uwopole wakamalaika ncheche wala nawombe wakungiki pa nkuka ukulungu Euphrates. 15Na wakawopoliki wakamalaika ncheche wala wakawikiki ngani kwa saa ni ligono ni mwesi ni mwaka, nausi wakome lilundu lya kadatu lya wandu. 16Ni kawalangiko ka malibanja ga wandu wa pa farasi kakayili elfu makumi gawili marra elfu kumi: ni nikayufwini kawalangiko kawe. 17Ni wiwila nikaweni mafarasi pa kiloto, ni wala wakutama bahapa pa gombe, wakuya ni fikopa pa kifimba fya mwoto ni matitu ni kibiriti: ni mitu ya mafarasi yikayili ngati ya mahimba; ni kipitile pa ndomo pawe papita mwoto ni lyosi ni kibiriti. 18Kipitile pa mitowo iyi yidatu lilundu lya kadatu lya wandu likakomiki, lili pa mwoto ni lyosi ni kibiriti, yila yikapititi pa ndomo pawe. 19Pakuya makakala ga mafarasi gayii pa ndomo pawe ni pa mikila yawe: pakuya mikila yawe yihwanangana ni mayoka, gene mitu; ni pa aga wawinisa. 20Ni wakusigala wa wandu awa wakakomiki lepa ni mitowo iyi, wakapeliti lepa ndawa ya mahengo ga mawoko gawe, kukita wasiya kugwilakimbo madaimon, ni fifwilifwili fya zahabu, ni fya ndalama, ni fya ngenge, ni fya maganga, ni fya mikongo; ifi nakuhotola kuwona, haka kuyufwana, haka kugendagenda: 21ni wakapeliti lepa ndawa ya kukoma wandu kwawe, fya uhawi fyawe, haka ndawa ya fiyaka fyawe ni fyakuyiwa fyawe.
Currently Selected:
Mafunukuliko 9: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
