Mafunukuliko 21
21
1Ni nikaweni kunani kwa hino nu ndima wa hino: pakuya kunani kwa kutumbula nu ndima wa kutumbula kulutiti; ni yiyilepe kawili nyanja. 2Ni nikaweni likaya liwalafu, Yerusalem wa hino, liselela kipitile kunani kuhumila pa Mulungu, lifwatakiwi ngati ndala wa nduusi wakwiwikili ngani kwa ngwanamundu. 3Ni nikayufwini njowelo ngulungu kipitile pa kitihu kya kiutwa, kujowa, Lola, hema ya Mulungu yiyii pamonga na wandu, na yahwele nawo, na yawaye misafi yake, nu Mulungu mwene yaaye pamonga nuwombe, Mulungu wawe: 4ni yasungulile ngani lisoli liyi lyoha pa miho gawe; ni kifwa yakiye lepa kawili; haka muni malilo, haka njwawila ya kulila, haka kuwina payilepe kawili: findu fya kutumbula filutilingani. 5Ni akajowiti uyu atama pa kitihu, Lola, nikita fyoha kuya fya hino. Ni akajowiti, Ulembe: pakuya malowe aga gayii gakukeleka ni ga chakaka. 6Ni akajowiti kwa nenga, Gapatiti kuya. Nenga Alpha ni Omega, wakutumbula ni wakumalakisa. Nenga yanipeleke kwa uyu wakuwona nywita kipitile pakulapukila machi ga kulama ga waka. 7Uyu wakuhotola yayingile pa findu ifi lipwela; ni yaniye Mulungu wake, nuyombe yaaye mwanangu. 8Leka kwa wakuyogopa, ni wangakela, ni wa usokosi, ni wakuwakoma wandu, ni wa fiyaka, ni wahawi, ni wakugwilakimbo fifwilifwili, ni wa mageya woha, lilundu lyawe liyii pa liliwa lila lya kutinyisika nu mwoto ni kiberiti; kiki kifwa kya kawili.
9Nakachiti yumonga wa wakamalaika saba wala wakayili ni fisayi saba fila fikamemiti ni mitowo saba ya kumalakila; ni akalongili nu nenga, kujowa, Yicha kuni, yanikulase ndala wa nduusi, mhanumundu wa Mwana ling’osi. 10Ni akanitoliti mwa Roho ku kidunda kikulungu ni kilacho, ni akanilasiti likaya liwalafu Yerusalem, liselela kipitile kunani kihumile pa Mulungu, 11lyakuya ni kukwisika kwake Mulungu: lulangalila lwake lukayili ngati liganga lya uhemesi muni, ngati liganga lya yasper, lya kuwalala ngati krustalo: 12lyakuya ni luwumba lukulungu nu lwakugenda munani; lyakuya ni milyango kumi ni yiwili, ni pa milyango wakamalaika kumi ni wawili; ni mahina galembiki mumu, gaga mahina ga mitangilo kumi ni yiwili ya wana wa Israel: 13ku mpungu milyango yidatu; ni ku lulinga milyango yidatu; ni ku nkachi milyango yidatu; ni ku chombe milyango yidatu. 14Nu luwumba lwa likaya lukayili ni fyakuwikila pasi kumi ni fiwili, ni pa ifi mahina kumi na gawili ga maapostolo kumi na wawili wa Mwana ling’osi. 15Ni wakulongela nu nenga akayili nu ndingo wa lidete lya zahabu nausi alingile likaya ni milyango yake nu luwumba lwake. 16Ni likaya liyii lya lugelo, mihana ncheche, ni utali wake kimongamonga ni kitando kyake kawili: ni akalilingiti likaya ni lidete lila, stadia elfu kumi ni siwili; mkitali mwake ni mkitando mwake ni mukugenda munani mwake kimongamonga. 17Na akalilingiti luwumba lwake, mikono mia ni makumi ncheche ni ncheche, kwa ndingo wa kimundu, uwu wa malaika. 18Na kajengeko ka luwumba kakayili yasper: ni likaya likayili zahabu yakuguyulika, ngati lilolelo lyakuguyulika. 19Fyakuwikika pasi fya luwumba lwa likaya fipambiwi ni liganga lya uhemesi liyi lyoha. Kyakutumbula kikayili yasper; kyakawili, sapfiro; kyakadatu, kalkedoni; 20kya ncheche, smaragdo; kya kahano, sardonuko; kya sita, sardio; kya saba, krusolitho; kya nane, berulo; kya kenda, topazo; kya kikumi, krusopraso; kya kumi ni kamonga, yakintho; kya kumi na kawili, amethusto. 21Leka milyango kumi ni yiwili yikayili lulu kumi ni siwili; leka ndyango uyi woha pa wakape ukayili wa lulu yimonga: ni ndila ya likaya yikayili zahabu yakuguyulika, ngati lilolelo lyakuguyulika. 22Ni nikaweni lepa hekalu mumu: pakuya Bambo Mulungu Mwene mbafu syoha, ni Mwana ling’osi, wayii hekalu mumu. 23Ni likaya lilonda lepa lijuwa, haka mwesi, kulimulikila: pakuya kukwisika kwake Mulungu kukalimulikili, nu mwenge wake Mwana ling’osi. 24Leka mihuku yayigendegende pa lulangalila lwake: ni watwa wa ndima watuwula kukwisika kwawe kiyingalile mumu. 25Na matanga gake yagadindike lepe musi (pakuya yakiye lepe kilo baho): 26ni yawatuwule kukwisika ni liginiko lya mihuku kiyingalile mumu: 27leka yakiyingile lepa mumu kindu kiyi kyoha kya waka, haka uyu wakukita upulipuli pangi mageya: lema wala wakape walembiki pa kitabu kya kulama kya Mwana ling’osi.
Currently Selected:
Mafunukuliko 21: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
