Mafunukuliko 20
20
1Ni nikaweni malaika aselela kipitile kunani, ayii ni funguo ya china kila, ni nyololo ukulungu pa kiwoko kyake. 2Ni akakamwili liyoka likulungu lila lwa mwandi, ili liyii Diabolo ni Shetani, 3ni akankungiti kwa miaka elfu, ni akandekili kiyingalile mu china, ni akadinditi, ni akakikomalili panani pa yombe, nausi asikonga kawili mihuku, mpaka miaka elfu yayimalakile ngani: panyuma pa iyi yaawopoleke kwa lukumbi luchoko.
4Ni nikaweni fitihu fya kiutwa, na wala wakutama pa ifi, ni lipaulo likapelakiki kwawe: ni nikaweni mawumi ga wala wakadumuliki mitu kwa ndawa ya ulungamakiso wa Yesu, ni kwa ndawa ya lilowe lya Mulungu, na wala wakagwili‐kimbo kilugu lepa, haka kifwilifwili kyake, ni wakayupiti lepa kihwanakiso pa kiwungi kyawe haka pa kiwoko kyawe; ni wakalamiti ni wakayili ni utwa pamonga nu Kristo miaka elfu. 5Wakusigala wa wakufwa wakalamiti lepe mpaka miaka elfu yayimalakile ngani. Uku kusyuka kwa kutumbula. 6Wakusengwa ni wangali wafu uyu ayii ni lilundu pa kusyuka kwa kutumbula: pa awa kufwa kwa kawili nakuya ni chengo; koma yawaye makasisi wa Mulungu ni wa Kristo, ni yawaye watwa nuyombe miaka elfu.
7Ni pala miaka elfu yayimalakile ngani, Shetani yawopoleke kipitile pa kukungika kwake, 8ni yapite kuwasowesa mihuku iyi yiyii pa songo ncheche sya ndima, Gog ni Magog, kuwawunganisa pamonga kwa ngondo: wala kawalangiko kawe kayii ngati muhanga wa pa nyanja. 9Ni wakakweliti panani pa kitando kya ndima ni wakasyungutisi masakasa ga wawalafu, ni likaya lila lyakuganika: nu mwoto ukaselili kunani ni ukawalilili ngani. 10Ni diabolo wakuwasowesa akalekeliki mu liliwa lya mwoto ni lya kiberiti, bahalapala kilugu kila ni wakulweta wa mageya yula kawili; ni yawang’ahike musi ni kilo kwa miaka ni miaka.
11Ni nikaweni kitihu kikulungu kya kiutwa, ni uyu wakutama pa kila, uyu pa kyene kyake ndima ni kunani kukakimbili; ni pandu pa fila pakakolaliki lepa. 12Ni nikaweni wakufwa, wakulungu ni wachoko, wayimiti pa kyene pa kitihu kya kiutwa; ni fitabu fikadinduliki; ni kitabu kingi kikadinduliki, iki kiyii kya kulama: ni wakufwa wakapauliki kipitile pa ifi filembiki pa fitabu, kwa ndingo wa makitiko gawe. 13Ni nyanja yikawapeliki wakufwa wala wakayili mugati mwake; ni kifwa ni Pandu pa mahoka pakapeliki wakufwa wala wakayili mugati mwawe: ni wakapauliki ayi yoha kwa ndingo wa makitiko gawe. 14Ni kifwa ni Pandu pa mahoka pakalekaliki mu liliwa lya mwoto. Iki kiyii kifwa kya kawili, liliwa lya mwoto. 15Ni mundu wona akolaliki lepa wakulembeka pa kitabu kya kulama, akalekaliki mu liliwa lya mwoto.
Currently Selected:
Mafunukuliko 20: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
