Popular Bible Verses from Mafunukuliko 21

Share

ni yasungulile ngani lisoli liyi lyoha pa miho gawe; ni kifwa yakiye lepa kawili; haka muni malilo, haka njwawila ya kulila, haka kuwina payilepe kawili: findu fya kutumbula filutilingani.

Ni akajowiti uyu atama pa kitihu, Lola, nikita fyoha kuya fya hino. Ni akajowiti, Ulembe: pakuya malowe aga gayii gakukeleka ni ga chakaka.

Ni nikayufwini njowelo ngulungu kipitile pa kitihu kya kiutwa, kujowa, Lola, hema ya Mulungu yiyii pamonga na wandu, na yahwele nawo, na yawaye misafi yake, nu Mulungu mwene yaaye pamonga nuwombe, Mulungu wawe

Ni akajowiti kwa nenga, Gapatiti kuya. Nenga Alpha ni Omega, wakutumbula ni wakumalakisa. Nenga yanipeleke kwa uyu wakuwona nywita kipitile pakulapukila machi ga kulama ga waka.

Uyu wakuhotola yayingile pa findu ifi lipwela; ni yaniye Mulungu wake, nuyombe yaaye mwanangu.

Leka kwa wakuyogopa, ni wangakela, ni wa usokosi, ni wakuwakoma wandu, ni wa fiyaka, ni wahawi, ni wakugwilakimbo fifwilifwili, ni wa mageya woha, lilundu lyawe liyii pa liliwa lila lya kutinyisika nu mwoto ni kiberiti; kiki kifwa kya kawili.

Ni nikaweni kunani kwa hino nu ndima wa hino: pakuya kunani kwa kutumbula nu ndima wa kutumbula kulutiti; ni yiyilepe kawili nyanja.

Ni nikaweni likaya liwalafu, Yerusalem wa hino, liselela kipitile kunani kuhumila pa Mulungu, lifwatakiwi ngati ndala wa nduusi wakwiwikili ngani kwa ngwanamundu.

Ni likaya lilonda lepa lijuwa, haka mwesi, kulimulikila: pakuya kukwisika kwake Mulungu kukalimulikili, nu mwenge wake Mwana ling’osi. Leka mihuku yayigendegende pa lulangalila lwake: ni watwa wa ndima watuwula kukwisika kwawe kiyingalile mumu.