Mafunukuliko 22
22
1Ni akanilasiti nkuka wa machi ga kulama, wakung’ala ngati krustalo, kipitile pa kitihu kya kiutwa kya Mulungu ni pa Mwana ling’osi, pagati pa ndila yake mumu. 2Ni pa muhana umonga wa nkuka ni pa muhana wungi, nkongo wakulama, wakupambika fipambiko fyake mwesi uyi woha: na mahamba ga nkongo wula gakayili kwa kuponesa mihuku. 3Ni yakiye lepa kawili baho kyakulapalasika: ni kitihu kya kiutwa kya Mulungu, ni kya Mwana ling’osi yakiye mumu: 4na wawanda mundu yawantumakile; na yawakiwone kyene kyake; ni lihina lyake yaliye pa fiwungi fyawe. 5Ni kilo yakiye lepe kawili; ni walonda lepa lulangalila lwa nyali, haka lwa lijuwa; pakuya Bambo Mulungu yamulike pa wombe: ni yawaye watwa kwa miaka ni miaka.
6Ni akajowiti kwa nenga, Malowe aga gayii gakukeleka ni ga chakaka: nu Bambo, Mulungu wa roho sya wakulweta, akampeliki malaika wake awalase wawanda mundu ifi yafikitike nyata. 7Na lola, nihicha nyata. Wakusengwa wakugagoha malowe gakulweta ga kitabu iki.
8Nu nenga Yohana niyii wakufiyufwana ni wakufilola ifi. Na pala nikayufwini ni kulola, nikagwili pasi ni kugwilakimbo pa magulu ga malaika uyu akanilasiti ifi. 9Nakajowiti kwa nenga, Ulole kukita usikita wiwi: niyii mbanda njinu nu wenga nu ndongowo wakulweta, ni wala wagagoha malowe ga kitabu iki: ungwilekimbo Mulungu.
10Ni akanijowili, Usikomalela malowe ga kulweta ga kitabu iki; pakuya lukumbi luyii papipi. 11Uyu nakugoloka aye wangagoloka mpaka hino: ni uyu wa wafu akitike kiyilile wawafu: ni uyu wakugoloka, akite fya ugolofu mpaka hino; nu uyu ayii mbalafu, akitike mbalafu mpaka hino. 12Lola, niyicha nyata; ni njombe yangu yiyii pamonga nu nenga, kunkilawusila mundu ayi yoha kwa ndingo wa makitiko gake. 13Nenga niyii Alpha ni Omega, wa palongolo ni wa panyuma, wakutumbula ni wakumalakila. 14Wakusengwa wala wakuchapa mingila yawe, nausi walinganile wa nkongo wakulama, ni wayingile pa milyango ya likaya. 15Kunja mabwa, ni wahawi, ni wa fiyaka, ni wakuyananga, ni wakugwilakimbo fifwilifwili, ni ayi yoha uyu agana ni akita mageya.
16Nenga Yesu nikatumiti malaika wangu awalase mwenga ulungamakiso wa findu ifi kwa makanisa. Nenga niyii ndela ni kihogosi kya Daudi, lutondo lwakung’ala lwa lukela.
17Ni Roho ni mhanumundu wa nduusi wajowa, Yicha. Nuyombe wakuyufwana, ajowaye, Yicha. Nu uyu ayii ni nywita, ayiche: uyu alonda, ayupe machi ga kulama ga waka.
18Nenga nindasa ulungamakiso ayi yoha wakugayufwana malowe ga kulweta ga kitabu iki. Wona mundu ayi yoha yalekele ndemuko pa ifi, yalekele Mulungu ndemuko pa yombe mitowo iyi yilembiki pa kitabu iki: 19ni wona mundu ayi yoha yawuse pa malowe ga kitabu kya kulweta uku, Mulungu yawuse lilundu lyake kuhuma pa nkongo wakulama, ni pa likaya liwalafu, filembiki pa kitabu iki.
20Ajowa wakulasa ulungamakiso wa ifi, Ena: niyicha nyata. Amen: Yichaye, Bambo Yesu.
21Neema ya Bambo Yesu yiye pamonga na wawalafu. Amen.
Currently Selected:
Mafunukuliko 22: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
