Mafunukuliko 19
19
1Panyuma pa findu ifi nayufwini lilowe ngati njowelo ngulungu ya lipuga lingi kunani, kujowa, Halleluya; Uyokosi, nu kukwisika, nu mbafu, kuyii kwake Mulungu witu: 2pakukita ga chakaka ni ga kugoloka mapaulo gake; pakuya akampawili wa kiyaka yula nkulungu, uyu nayombe akayaningi ndima pa fiyaka fyake, ni akalipisili mwasi wa wawanda wake pa kiwoko kyake. 3Ni pakawili wajowa, Halleluya. Ni lyosi lyake likwela kikwelile pa miaka ni maika. 4Ni wakuluwakulu makumi gawili nu ncheche, ni fyakulama ncheche fikagwili pasi ni kungwilakimbo Mulungu uyu atama pasi pa kitihu kya kiutwa, kujowa, Amen; Halleluya. 5Ni njowelo kihumile pa kitihu kila kujowa, Mundumbaye Mulungu, mwenga wawanda wake mwawoha, mwenga wakunjogopa, wachoko ni wakulungu. 6Ni nayufwini ngati njowelo ya lipuga lingi, ni ngati njowelo ya machi mingi, ni ngati njowelo ya mbamba ya kuwuluma sya makakala, kujowa, Halleluya: pakuya Bambo Mulungu witu, Mwene mbafu syoha, ayii mutwa. 7Ni tihekelele ni kuyangala, ni kumpelekela kukwisika: pakuya nduusi ya Mwana ling’osi yifiki, nu mhano mundu ayii tayari. 8Ni kukapeliki kwa yombe kukita ayifwike nguo yakutipitala, yakung’ala ni yakuguyulika: pakuya nguo yakutipitala yiyii makitiko magolofu ga wawalafu. 9Ni anijowela, Ulembe, Wakusengwa wala wakemaliki kuyingila pa kyakulya kya kugonela kya Mwana ling’osi. Ni anijowela, Aga malowe ga chakaka ga Mulungu. 10Ni nikagwili palongolo pa magulu gake kungwilakimbo. Ni anijowela, Lola, ukotoke: mbanda njinu nenga ni wa walongowo, awa wayii ni ulungamakiso wa Yesu: ungwilekimbo Mulungu: pakuya ulungamakiso wa Yesu uyii roho ya kulweta.
11Ni nikaweni kunani kudinduliki; na lola, farasi mbalafu, ni wakutama pa yombe wakukemaleka, Wakukeleka ni Wa chakaka; ni pa ugolofu apawula ni akita ngondo. 12Leka miho gake gayii lilambi lya mwoto, ni pa mutu wake fikupiku fya utwa fingi; ni ayii ni lihina lilembiki, ili pa waka mundu alimanya lema yombe mwene. 13Ni afwatakiwi ni kifwato kilapuliki nu mwasi: ni likemeleka lihina lyake Lilowe lya Mulungu. 14Ni mabanja ga ngondo ga kunani gakankisiti, pa mafarasi mawalafu, wafwatakiwi nguo yakutipitala, yiwalafu ni yiguyuliki. 15Leka kipitile pa ndomo pake upita upanga wakutema, nausi na wula yatowele mihuku: nuyombe yawadime nu ndonga ya kyuma: ni aliwatila pakuminyila pa mvinyo pa makeko ga kudada kwake Mulungu Mwene mbafu syoha. 16Ni ayii ni lihina lilembiki pa mwingila ni pa safu yake, mutwa wa watwa, nu bambo wa mabambo.
17Ni nikambweni malaika nakayimiti mugati mwa lijuwa, ni akakuwiti ni njowelo ngulungu, kugajowela madege goha gakuwuluka pagati pa nyingalila, Muhichaye mukokanaseke kuyingila pa kyakulya kya kugonela kya Mulungu; 18nausi mulye nyama sya watwa, ni nyama sya makapitao, ni nyama sya wene makakala, ni nyama sya mafarasi ni sya wala wakutama pa gombe, ni nyama sya wandu woha, sya wakamba ni wawanda, sya wachoko na wakulungu.
19Leka nikakiweni kilugu kila, ni watwa wa ndima, na mabanja ga ngondo gawe, gakokanasiki pamonga kukita ngondo pamonga nu yula atama pa farasi, ni pamonga ni libanja lyake lya ngondo. 20Ni kilugu kila kikakamuliki, pamonga nuyombe wakulweta wa mageya uyu akafikiti fiwalalilo pa kyene kyake, ni ifi akawasowisi awa wayupiti kihwanakiso kya kilugu, na wala wakugwilakimbo kifwilifwili kyake: woha wawili kilamile wakatagiki kiyingalile mu liliwa lya mwoto ili litinyika ni kiberiti: 21leka wakusigala wakakomiki nu upanga wa uyu wakutama pa farasi, upanga wula wakupita kipitile pa ndomo pake: na madege goha gatupili kililile nyama yawe.
Currently Selected:
Mafunukuliko 19: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
