Mafunukuliko 12
12
1Ni kiwalalilo kikulungu kikawoniki kunani; ndala afwikiki ni lijuwa, ni mwesi pasi pa njayo syake, ni pa mutu wake kikupiku kya ndondo kumi ni siwili; 2ni akayili nu luleme: ni akakwesiti pa kwibimbatisa pa kuhogola, kuhumbusika mpaka kuhogola mwana. 3Ni kikawoniki kiwalalilo kingi kunani; na lola, liyoka likulungu likele, liyii ni mitu saba, ni manyelo kumi, ni pa mutu wake fikupiku fya kiutwa saba. 4Ni nkila wake ukwekweta lilundu lya kadatu lya ndondo sya kunani, ni ukasilekili pa ndima: ni liyoka likulungu likayimiti palongolo pa ndala uyu akayili papipi kuhogola, nausi apa kamwana kake yakahogoleke yaandile ngani. 5Ni akahogwili mwana ngosi, uyu alonda kudima mihuku yoha ni ndonga ya kyuma: ni mwana mundu akanyakiki kwa Mulungu, kwa kitihu kyake kya kiutwa. 6Nu ndala akakimbili kiyingalile mu mapululu, pala ayii ni pandu pawikiki ngani, kuhuma pa Mulungu, nausi bahalapala wandele ni kyakulya magono elfu ni mia siwili ni setini.
7Ni ikayili ngondo kunani: Mikael ni wakamalaika wake kukita ngondo ni liyoka; ni liyoka likakiti ngondo ni wakamalaika wake; 8ni wakahotwili lepa, haka pandu pawe kunani pakakoleliki lepa kawili. 9Ni liyoka likulungu lila likalekaliki pasi, liyoka lya mwandi, uyu akemeleka Diabolo ni Shetani, wakuukonga ndima woha; akalekaliki pa ndima, ni wakamalaika wake wakalekaliki pamonga nuyombe. 10Ni nikayufwini njowelo ngulungu kunani, kujowa, Hino upatiti kuya uyokosi, ni mbafu, ni utwa wa Mulungu witu, ni chengo kya Kristo wake: pakuya alekaliki pasi wakukupikisila wa walongo witu, wakuwapisa mhalo pa kyene kya Mulungu witu musi ni kilo. 11Ni wombe wakamhotwili ndawa ya mwasi wa Mwana ling’osi, ni ndawa ya lilowe lya ulungamakiso wawe; ni wakaganiti lepa wumi wawe mpaka kufwa. 12Mumu musangaluke, Kunani, ni mwenga wakuhwela mumu. Yoyo mu ndima ni nyanja, pakuya diabolo aselili kwa mwenga, wakuya ni kudada kukulungu, pa kumanya kukita ayii ni lukumbi lwakukepa.
13Ni pala liyoka likulungu likaweni kukita lilekaliki pa ndima, likamhyungiti ndala uyu akamhogwili mwana ngosi. 14Ni gakapeliki kwa ndala mapapatilo gawili ga kapungu lila likulungu, nausi awulukile kuyingila mu mapululu pandu pake, pala aleleke kwa lukumbi, ni kwa ngumbi, ni kwa nusu ya lukumbi, kiwukile pa kyene kya liyoka. 15Ni liyoka likalekalili kipitile pa ndomo pake machi ngati nkuka panyuma pa ndala nausi yombe atoleke nu nkuka. 16Nu ndima ukantangatili ndala, nu ndima ukadindwili pa ndomo pake, ni ukamiliti nkuka wula liyoka likalekiti kipitile pa ndomo pake. 17Ni liyoka likadadasiki nu ndala, ni likalutiti kukita ngondo ni wala wakusigala wa mbeyu yake, wakugoha mimbi sya Mulungu, ni wakuya ni ulungamakiso wa Yesu:
Currently Selected:
Mafunukuliko 12: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
