Hebrayo 11
11
1Ni kiyitakiso kiyii utamo wake wa findu fila fihuwalalika, kya kupisa kyake fila nakulolaleka. 2Pakuya pa iki wakuluwakulu wakalasiki kwawe ulungamakiso. 3Kwa kiyitakiso tiwalalila kukita miaka yikawikiki ni lilowe lya Mulungu, mpaka kya kuwoneka kipatiti lepa kuya kipitile fya kuwoneka. 4Kwa kiyitakiso Habil andekalili Mulungu nyambiko yinofu kulutila ya Kain, kwa iyi akalasiki ulungamakiso kukita ayii wakugoloka, Mulungu kilasile ulungamakiso kwa fiyetulo fyake: ni kwa iyi, haka afwili ngani, ayii kilongalile. 5Kwa kiyitakiso Enok akatoliki pangi, asiwona kufwa; ni akakolaliki lepa ndawa Mulungu akantoliti pangi: ndawa akona nukutoleka, akalasiki ulungamakiso kukita amaliti kunganila Mulungu: 6ni pangali kiyitakiso kyangahotoleka kunganila yombe: pakuya uyu amchilila Mulungu nakulekeka kukela kukita ayii baho, ni kukita ayii wakuwalipila wala wakundondandonda. 7Kwa kiyitakiso Noah pakakiliki nu Mulungu panani pa findu fyakona kuloleka, pa kukamulika nu woga wake Mulungu, akawikili ngani ligalawa kiyingalile pa uyokosi wa nyumba yake; kwa iki akaupisiti ndima uwu uwifu, ni akapatiti kuya wakuyingila lipwela pa ugolofu wula uyii kwa ndingo wa kiyitakiso. 8Kwa kiyitakiso Ibrahim, pakakemaliki akayitakili kuluta kiyingalile pandu pala yapayupe baho lipwela: ni akapititi, pangali kumanya uku aluta kuku. 9Kwa kiyitakiso akihadisi pandu pa ndima wa kilago, ngati pa ndima nukuya wa mwene, kutamasika pa mahema pamonga nu Isaak nu Yakobo, wakuyingila lipwela pamonga nuyombe pa kilago kikilakila: 10pakuya akalindalili likaya lyakuya ni fyakukungika pasi, ili wakulitumbulisa ni wakulipanga yuyu Mulungu. 11Kwa kiyitakiso haka Sara akayupiti mbafu kuyima luleme pakuluta lukumbi lwake, pakuya akambalingi wakukeleka uyu akakiti kilago: 12kwa iki, kuhuma pa yumonga, nuyombe ngati mundu amaliti kufwa, wakahogoliki wa mahele ngati ndondo sya kunani pa wingi wawe, ni ngati muhanga, uwu uyii mu makigi mwa nyanja nukuwalangika.
13Awa woha wakafwili kwa ndingo wa kiyitakiso, wangali kufiyupa filago, koma kuhuma patali wakafiweni, ni kufilamusa, ni kufumbula kukita wageni ni wakwihadisa pandu wayii pa ndima uwu. 14Pakuya wala wakujowa malowe ga ntundu uwu wapisa pa kwelu kukita wayi mu kulondalonda ndima wene wene. 15Na wona wakayili mukukumbukila wuwulawula wakapititi baho, ngawatemi nu lukumbi lwa kukilawuka kuku. 16Koma hino wahuwalila ndima unofu kulutila, wuwu wa kunani: kwa iki Mulungu nukutoleka lihamu lepa pakukemeleka Mulungu wawe: ndawa akawawikili ngani likaya.
17Kwa kiyitakiso Ibrahim, pakugeseka, akalekili Isaak nyambiko: ena, uyu akayupiti filago kihekalile akayili mu kundekela mwana mundu wakape nyambiko; 18kwa uyu kukalongaliki, Pa Isaak mbeyu yako yayikemeleke: 19pakawalangiti kukita Mulungu ahotola kunsisamusa haka kipitile pa wakufwa; kuhumila uku akanjupiti ngati pa ngongo. 20Kwa kiyitakiso Isaak akawapili Yakobo nu Esau kihomo, haka pa fila fiyii mu kuhicha. 21Kwa kiyitakiso Yakobo mu kufwa akawapili wana wa Yosefu ayi yoha kihomo; ni akagwili‐kimbo pa lusongo lwa nkongocho wake. 22Kwa kiyitakiso Yosefu, mu kumalakila, akakokwisi kuluta kwawe wana wa Israel; ni akatawiki ya mafupa gake. 23Kwa kiyitakiso Musa, pakahogoliki, akafihiki ni wakumhogola wake miesi yidatu, pakuya wakaweni kukita ayii mwana wakuniamba; ni wakayogwipi lepa luwimbi lwa mutwa. 24Kwa kiyitakiso Musa, pakakuliti, akakaniti kukemeleka mwana wake mwana ndala wa Farao; 25kuhagula koma kukitika fiwifu pamonga nu nsafi wa Mulungu, nukuya kuyangala ni sambi kwa lukumbi; 26pakawalingi kudogeka kwake Kristo kyuma kikulungu kulutila fibani fya pa Egupto: pakalolili fila fikilawusila fya njombe. 27Kwa kiyitakiso akawukiti pa Egupto, nukuyogopa kufyoma kwake mutwa: pakuya akakangamili ngati wakumbona uyu nukuwoneka. 28Kwa kiyitakiso akalikiti pasaka, ni kulapulila mwasi, nausi wakuwayananga wana wa kiwele asiwakwafya. 29Kwa kiyitakiso wakalutiti pa Nyanja ngele ngati pa ndima; iyi wakayigesili wa Egupto wakamiliki. 30Kwa kiyitakiso maluwumba ga Yeriko gakagwili pasi, apa gakasyungusiki magano mhano ni gawili. 31Kwa kiyitakiso Rahab wa kiyaka akatagiki lepa pamonga na wala wangayufwana, pakakemelakisi wakusela ni kindamba. 32Ni yanijowe kiki ndemuko? pakuya yanikepekeke lukumbi wona niwalangila ndumi sya Gideon, Barak, Samson, Jephthah; ndumi sya Daudi ni Samuel ni wakulweta: 33awa kwa kiyitakiso wakagimbiti mautwa, wakakiti fya ugolofu, wakayipatili filago, wakadinditi pa milomo ya mahimba, 34wakasimisi mbafu sya mwoto, wakayokwiki pa wugi wa upanga, kuhuma pa ulegelefu wakipatili makakala, wakitiki wa makakala pa ngondo, wakawakimbisi wa masakasa ga wageni. 35Wadala wakayupiti wakufwa wawe kipitile pa kusyuka: ni wangi wakatowiki mpaka kufwa, nukuyupila uyokosi: nausi wayipatile kusyuka kunofu kulutila: 36ni wangi wakayupiti mageseko ga kudogeka ni maswatu, ena kawili ga migoyi ni kukungika: 37wakalekaliki maganga, wakadumwiki ni misumeno, wakagesiki, wakakomiki ni upanga: wakagendileye waka pa fikumba fya mambelele, ni fikumba fya mene; wakupelewela fyoha, wakuhumbusika, wakukitika fiwifu (awa ndima uwu nukuwalinganila lepa), 38wakusoweka pa mapululu ni pa fidunda ni pa makolo ni pa maukweme ga ndima. 39Ni awa woha, wakalasiki ulungamakiso wa kiyitakiso kyawe, wakayupili ngani lepa kilago, 40Mulungu pakalolili ngani palongolo kinunuyu kinofu kulutila panani pa tenga, kukita pangali tenga wasikitika wombe wakumalakilana.
Currently Selected:
Hebrayo 11: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
