Hebrayo 10
10
1Pakuya torah ndawa ni kifwili kya finofu fiyii mu kuyicha, nukuya kihwanakiso kyene kya findu, nukuhotola lukumbi luyi lwoha ni nyambiko sisisi wasilekela mwaka nu mwaka kilekalile, kuwakita wakumalakilana wala wakuwandamila kuku. 2Ndawa pangi sikapumwili lepa kulekeleka, ndawa wala wakugwilakimbo pakuguyulika kamonga waka, ngawatemi lepa kawili ni mhalo wa sambi pa chengo kyawe kya pa mwoyo. 3Koma pa sila kiyili kikumbukumbu kya sambi mwaka nu mwaka. 4Pakuya nukuhotoleka kukita mwasi wa ng’ombe nu wa mene usiwusa sambi. 5Kwa iki pakuyingila pa ndima, ajowa,
Nyambiko ni kya kulekalela ukasilonditi lepa,
Koma mbili ukatendakisi ngani kwa nenga;
6Pa fya kukwelesa fya mfilimila ni nyambiko kwa sambi ukaganiki lepa:
7Bahalapala nikajowiti, Lola, nichiti,
(Pa kya kuniengeka kya kitabu kilembiki ya nenga)
Kukita kila ukilonda Mulungu.
8Pakujowa panani kukita, Fya kulekelela ni nyambiko ni fya kukwelesa fya mfilimila ni nyambiko kwa sambi ukasilonditi lepa, haka kwiganasila nasyo nukwiganila lepa (isi silekaleka kwa ndingo wa torah), 9bahalapala akajowiti, Lola, nichiti kukita kila ukilonda. Awusa kya kutumbula, nausi akiyimike kya kawili. 10Pa kilondo kikilakila tiwalasiki pakulekaleka kwake mbili wa Yesu Kristo nyambiko kamonga waka. 11Ni kasisi ayi yoha ayima ligono ni ligono kilindalilile ni kilekalile kawili kawili nyambiko sisilasila, isi nukuhotola lepa lukumbi luyi lwoha kusiwusa sambi: 12koma yombe, pakalekili nyambiko kamonga waka pa mihalo ya sambi kilinganile woha, akatemi pasi pa kiwoko kya ndilo kya Mulungu; 13kitumbulile apa kilolalele mpaka wa mitumba wake yawawikike kitihu kya njayo syake. 14Pakukita ni nyambiko yimonga waka awakiti wakumalakilana wala wakuwalasika. 15Ni atilasa kawili ulungamakiso Roho Mbalafu: ndawa panyuma pa kujowa,
16Aga ni malagano yanilagane nawo,
Panyuma pa magono gala, ajowa Bambo;
Yanipeleke mimbi syangu mu mioyo yawe,
Na pa maholo gawe yanisilembe;
17Ni sambi syawe ni upulipuli wawe yanikumbukile lepa kawili.
18Leka pala payili kulekelekesa sambi, nukuya kawili kya kulekela kwa sambi.
19Mumu, walongo, pakuya nu usindimafu kuyingila pawalafu pene pa mwasi wa Yesu, 20pa ndila yila akatitumbulisi, ya hino ni ya kulama, kuluta pa kindemula, iki kiki pa nyama yake; 21ni pakuya ni kasisi nkulungu panani pa nyumba ya Mulungu; 22tiwandamile nu mwoyo wa chakaka pa kiyitakiso kya kulinganila, tilapulasika mioyo yitu kuhuma pa mihalo ya usokosi, nu mbili witu wakuyoseka na machi mawalafu: 23tikamule ngani kufumbula kwake kihuwalilo kitu kisiganagana; ndawa ayii wakukeleka uyu akakiti kilago: 24ni tiholalelane kuyumbatisa kuganana ni kwa makitiko manofu; 25nukukotoka makokano ga tawete, umu wangi wayii ni nkuwu, koma kukilana; ni kulutila pa kulola kukita ligono lila liyii mu kuwandamila.
26Pakuya wona tikita sambi nausi, panyuma pa kuyupa kufimanyisa fya chakaka, nukusigala kawili nyambiko ya sambi, 27koma kuyii baho kulindalila kwa kuyogofya kwa kupaulika, nu mwoto wakukalipa wakulonda kutinisa wakupindikana. 28Mundu uyu akadumwili torah ya Musa afwa pangali lipyana pa malowe ga walungamakiso wawili pangi wadatu: 29muholalela wuli, ati si ngapawuliki kuyambulasika kukulungu kulutila yula aliwatili pasi pa njayo Mwana wa Mulungu, ni awalangiti mwasi wa kilagano, wula akawalasiki nawo, kindu kya waka, ni ahepiti Roho wa neema? 30Pakuya timmanya uyu akajowiti, Kukilawusa kuyii kwangu, nenga yanikilawusile. Ni pakawili, Bambo yapaule nsafi wake. 31Kiyii kya kuyogofya kugwa pa mawoko ga Mulungu wakulama.
32Mukumbukile magono ga mwandi, pa aga, apa mukalekaliki lulangalila, mukayili nu luyumalakilo pa makani makulungu ga mahumbuso; 33pangi mukayili kyakulasika lukonji kwa fyakudoga ni kwa mahumbuso; ni pangi wakuhasangana na wala wakakitiki wila. 34Pakuya kuyufwana mukayufwini na wala wa mu migoyi, ni mukayitakili pa kiheko kunyakika findu fila mukayili nafyo, pakumanya kukita mwawene muyii nafyo finofu kulutila ni fya kuhwela miaka. 35Musitaga mumu usindimafu winu, uwu nuwombe uyii ni njombe ngulungu. 36Pakuya mulonda luyumalakilo, nausi, baho mukakiti kila Mulungu akilonda, muyupe kilago kila.
37Pakuya kutama pachokope naha,
Wakuhicha yahiche, nukusyela lepa.
38Koma wakugoloka wangu yalame pa kiyitakiso:
Ni wona ayepa, wumi wangu nukuganika pa yombe.
39Koma tenga nukuya wa wakuyepa mpaka pa kutagika; koma wa wala wene kiyitakiso mpaka pa kuyokola wumi.
Currently Selected:
Hebrayo 10: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
