Hebrayo 12
12
1Mumu tenga kawili, pakuya ni lifundi lya ntundu uwu wa walungamakiso wakutisyungutila, tifule kiyi kyoha kyakutopesa, ni sambi yila yitisingila, ni tikimbile kwa luyumalakilo kintali kila kiwikiki palongolo pa tenga, 2kundolela Yesu wakutumbulisa ni wakumalakisa kiyitakiso, uyu kwa ndawa ya kiheko kila kiwikiki palongolo pake akauyumalakili msalaba, pakahepiti lihamu, ni atemi pasi pa kiwoko kya ndilo kya kitihu kya Mulungu. 3Pakuya muholalele yuayumalakili mapindikano ga ntundu uwu ga wene sambi kipindakile wene, nausi musitopeka kusinduka mu mioyo yinu. 4Mukona nukupindika lepa sambi kigimbile mpaka mwasi: 5ni muyiwiti malowe ga kukila gala gakujowa na mwenga ngati na wana,
Mwana wangu, usihepa kuyambulika kwake Bambo,
Haka kusinduka usisinduka wona ukapisiki mbifu nuyombe;
6Pakuya uyu Bambo angana anjambulisa,
Ni aswatula mwana ayi yoha uyu anjitakila.
7Muyumalakila kiyingalile pa kuyambulika; Mulungu awakitila ngati wana; pakuya nani mwana uyu dadi mundu nakunjambulisa? 8koma wona mulema kuyambulasika, umu woha wapatili kuya nako, muyii wa ku dasi, nukuya wana. 9Kawili wakadadi wa mbili tikayili nawo wakutiyambulisa, ni tikawaginiki: ati si kulutila mbanga tiwikike pasi pa Dadi wa maroho, ni yatilame? 10Pakuya wala chakaka kwa magono gakuwalangika wakatiyambulisi umu kwawonakili kunofu; koma yombe kwa mbendo yitu, nausi tihasangane pa kuwalafu kwake. 11Kuyambulila kwoha kwa lukumbi lwake nakuwoneka kwa kuhekelesa, koma kwa kudadisa: leka panyuma pake kupeleka kipambiko kya kindamba kwa wombe wakugendesa nako, kuku kugoloka. 12Mumu mugolose mawoko gakusinduka, na mafugamilo gakukita kindengu‐ndengu; 13ni mukitile njayo sinu ndila syakulingana, nausi kila kyakuchipila kisipatulika pa ndila, koma mbanga kipolaseke.
14Mukise kindamba na wandu woha, ni kuwalasika kula kwangali uku mundu yambone lepa Bambo: 15kulolalela wicho nausi haka mundu asilemuka neema ya Mulungu; nkiga uyi woha wa kuwawa usihumbusa pa kutuka, ni pa uwu wingi wawipisika; 16haka mundu wa fiyaka, pangi wakukitika wa waka ngati Esau, uyu kuyandungana ni kyakulila kimonga akahemili fya uwele fyake. 17Pakuya mumanya kukita apa panyuma pake akalonditi kuyingila pa kihomo mu lipwela, akayitikaliki lepa (ndawa pandu pa kupela akakolili lepa), haka akapalonditi‐londiti ni masoli.
18Pakuya mwafiki lepa pa kidunda kya kupapasika, ni kya kupambika nu mwoto, ni pa kutotopala tototo, ni pa lwisi, ni limbupulu, 19ni kulindima kwa mbata, ni njwawila ya kujoweka, yila wala wawayufwanili baho wakapembisi kukita lilowe lisiyonjakasewe kwawe: 20pakuya wayili ni kutwika ili lyapelakiwi, Haka nyama wona yikikwafya kidunda, yilekelewaye maganga; 21ni kuyogofya kukayili kuwoneka kula, mpaka Musa akajowiti, Wakuyogopa nyamhope nenga ni wakudigida: 22koma mwafikili kidunda Sion, ni likaya lya Mulungu wakulama, Yerusalem wa kunani, ni maelfu gakuyoloka ga wakamalaika, 23pa mbonangano ni kanisa lya wa kiwele wala walembiki kunani, ni Mulungu wakuwapaula wandu woha, ni roho sya wakugoloka wakukitika wakumalakilana, 24nu Yesu wa pagati wa malagano ga hino, nu mwasi wakulapulila wakulongela kinofu kulutila wake Habil. 25Mulolaye musinkana uyu alongela. Pakuya wona wala wakayokwiki lepa wakankaniti uyu akawakiliti pa ndima, wuli tenga ting’anamukila uyu ahumila kunani: 26uyu njowelo yake yinyukunywisi ndima lukumbi lula: koma hino akiti kilago, kujowa, Kamonga waka nenga yaninyukunyise nukuya ndima wakape, koma kunani nukwombe. 27Ni lilowe ili, Kamonga waka, lilasa kuwusika ifi fyakunyukunyika, ngati fyakupangika, nausi fifwele ngani fila fyanganyukunyika. 28Mumu, pakuya utwa wanganyukunyika, tiye ni neema, pa iyi timtumakile Mulungu mwakuganikila, ni kumginikisa ni kunjogopa: 29ndawa Mulungu witu ayii mwoto wakunyeta.
Currently Selected:
Hebrayo 12: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
