Kolosse 3
3
1Mumu wona mukasyusiki pamonga nu Kristo, mulondelonde fya kunani, apa Kristo ayili, na atama pasi pa kiwoko kya ndilo kya Mulungu. 2Mutamasike maholo ginu pa fila fya kunani, nukuya pa fila fya pa ndima. 3Pakuya mukafwili, ni kulama kwinu kufihiki pamonga nu Kristo mwa Mulungu. 4Pala Kristo, kulama kwitu, yalasike pa kwelu, bahalapala mwenga namu yamulasike pamonga nuyombe pa kukwisika.
5Mumu mufikomese fipingili finu fya pa ndima; fiyaka, uwafu, unyonyelo, kilondo kiwifu, nu ung’eng’ena, uwu nuwombe uyii kugwilakimbo fifwilifwili; 6kwa ndawa ya ifi kudada kwake Mulungu kuhicha panani pa wana wangali kuyufwana; 7pa ifi mwenga kawili mukagenditi‐genditi mwandi, apa mukalamiti mumu. 8Leka hino muwike patali pa mwenga kawili findu ifi fyoha; kudada, kufyoma, kuwipa, blasfemia, kujowa machafu, kipitile pa ndomo pinu: 9musideta ni wayinu, pakuwona kukita mufuliti mundu wa mwandi pamonga na makitiko gake, 10ni mwifwatiki mundu wa hino, uwu uyii mu kukitika wa hino kikitile kwa ndingo wa kifwilifwili kya uyu akampangiti: 11pa uyu pawaka mGriki nu mYehudi, wakusilimuka ni wangasilimuka, wakumamatila, mSkutho, mbanda, nkamba: koma Kristo yuyu fyoha, ni mwa fyoha.
12Mumu mwifwatike ngati wakuhagulika wake Mulungu, wawalafu ni wakuganika, mwoyo wa lipyana, lukolo, kwiselsea, uwololo, kwisinga; 13kuhegelelana wangi na wayawe, ni kulekelesana, wona ayi yoha ayii nu mhalo kumpindika yungi; umu Bambo nuyombe akawalekelakisi mwenga, wiwi mwenga kawili: 14ni ndemuko pa ifi fyoha mwifwatike kiganano, iki kiyii kyakukungisana kyakumalakilana. 15Ni kindamba kya Kristo kiye kyakuwapaulila pa mioyo yinu, kiyingalile mumu mukakemaliki pa mbili umonga; ni muye wakusengusa. 16Lilowe lya Kristo liye pa mwenga pa luhala lwoha pa ukafi; kuwulisana ni kukilana ni saburi ni nyimbo ni sumu sya mwa roho, kuyimba pa mioyo yinu ni neema kwa Mulungu. 17Ni kiyi kyoha wona mukita, pangi pa malowe pangi pa makitiko, mukitaye fyoha pa lihina lya Bambo Yesu, kunsengusa Mulungu Dadi pa yombe.
18Wadala, mwiwike pasi pa wangwana winu, umu kulinganila pa Bambo. 19Wagosi, muwagane wahanu winu, ni musiheha kwa wombe. 20Wana, muwayufwanile awa wakuwahogola pa fyoha, pakuya iki kya kunganisa mwa Bambo. 21Wakadadi, musiwalakalila wana winu, nausi wasitaga mwoyo. 22Wawanda, muwayufwanile pa fyoha wabambo winu kwa ndingo wa nyama; nukuya pa miho, ngati wakuwaganisa wandu, koma nu mwoyo wakulasa kumonga, pa kunjogopa Bambo: 23kiyi kyoha iki mukita, mukitaye kipitile pa mwoyo, ngati kwa Bambo, nukuya ngati kwa wandu; 24pakumanya kukita yamuyupe kwa Bambo kya waka kya lipwela: muntumakila Bambo Kristo. 25Pakuya uyu akita kiwifu yayupe kawili ndawa ya kiwifu kila akikiti: ni payilepe kuhagula kwa fyene.
Currently Selected:
Kolosse 3: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
