Kolosse 2
2
1Pakuya nilonda kukita mumanye kugima wuli kukulungu niyii nako pa mihalo ya mwenga, na ya wala wa ku Laodikea, na ya wombe woha wangakiwona kyene kyangu pa nyama; 2nausi mioyo yawe yinyamasike, pa kuwunganisika pa kiganano, ni kwa ukafi woha wa kufwilana kwa kuwalalila, kukita wamanye ngani kya kuhyetu kyake Mulungu, 3kiki Kristo, pa uyu fiyii fikokoli fyoha fya luhala ni fya kumanya fifihiki mumu. 4Iki nijowa, nausi haka mundu asiwachenjesa pa kukopesa. 5Pakuya haka niyilepe nu mwenga pa nyama, pa roho koma niyii baho, kuhekelela ni kulolela matendekeseko ginu, ni ukiki wa kiyitakiso kinu mwa Kristo.
6Mumu umu mukanjupili Kristo Yesu Bambo, mwa yombe mugendegende, 7pakupelewa mikiga ni kujengeleka mwa yombe, ni pa kukangamasika pa kiyitakiso, umu muyigilasiwi, pa kuyoloka mumu pa kusengusa.
8Mulolaye kukita mundu asiwafufula mwenga ni filosofia fyake ni kukongesa kwa waka, kwa ndingo wa mawungu ga wandu, kwa ndingo wa mayigaliso gakutumbula ga ndima, nukuya kwa ndingo wa Kristo: 9ndawa pa yombe kitamasika kifwilanilo kyoha kya Umlungu nu mbili, 10ni mwa yombe muyii wakufwilanasika, uyu ayii mutu wa fya kutumbulisa fyoha ni mbafu syoha: 11mwa yombe mwenga kawili mwasilimwiki ni kusilimuka nukukitika na mawoko, pa kufula mbili wa nyama, pa kusilimuka kwake Kristo; 12pakuwikika pa manyinja pamonga nuyombe pa ubatiso, pa uwu mwasyusiki kawili pa kiyitakiso pa kuhenga kwake Mulungu, uyu akansyusiti yombe pa wakufwa. 13Nu mwenga, pakuya wakufwa ni mapatuliko ni pangali kusilimuka kwa pa nyama yinu, mwenga namu akawalamisi pamonga nuyombe, pa kutilekelekesa mapatuliko goha gitu; 14apa asungwili ngani lilembo lya kupindika tenga ili lilembiki pa mimbi, ili lyayili kutikilawusa: ni akaliwusiti, apa akalipagiki ni misomali pa msalaba; 15apa afuliti ngani fyakutumbulisa ni machengo, akagalasiti pa kwelu, apa akagagihili mumu.
16Mumu mundu asiwapaula pa kulya, ni pa kunywa, pangi pa muhana wa ligono likulungu pangi mwesi wa hino pangi sabato: 17ifi fiyii kifwili kya fila fiyii mu kuyicha; leka mbili uyii wake Kristo. 18Mundu asiwanyaka fupo yinu pa kugana kwiselesa ni kugwilakimbo wakamalaika, kuholakesa ifi afiwoneye, 19kutupisika waka ni maholo gake ga nyama, ni wangakukamulila pa Mutu, kipitile pa uyu mbili wa mfilimila, kuyeneleseka ni kukangamasika ni fifundo ni fya kukunga, uyonjekeseka ni liyonjekeso lyake Mulungu.
20Wona mufwili pamonga nu Kristo pa fyakutumbulisa fya ndima, kwa kiki, ngati wakulama mu ndima, muyii wakuwikika pasi pa mimbi, 21Musipapasa, musilosa, musikwafya 22(ifi fyoha fiyii mu kutagika pakutumika nafyo), kwa ndingo wa mimbi ni mayigaliso ga wandu? 23Ifi nafyo fiyii ni ntundu wa luhala pa kugwilakimbo pa kilondo, ni maseleseko ni kuunota mbili; koma nukuya ni liginiko liyi lyoha kusiwilikisa fya kulutila fya nyama.
Currently Selected:
Kolosse 2: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
