Ebhikorwa bhya Abhatumwa 25

Pawuro ari ku-mwinangwa Feesito

1Feesito ˆnaamara nsiku esatu era egya obhutangasha ari mu-kyaro kiyo, ˆnaasooka Kayijaariya ayo, ˆnaariinyagisha okugenda Yerusareemu. 2Bhunu ꞉aariga ari Yerusareemu ayo, abhashengesi abhakuru na abhakuru abhandi abha Abhayawudi mbamuuja-ko, mbamubhwira amangʼana goone kutyo ganu ꞉bhaasitaakyaga Pawuro. Mbamwisaasaama 3abhasakire, aragirire bhasubhye Pawuro Yerusareemu, kwa okubha Abhayawudi ꞉bhaariga bhakorere ekiina kweki ati, akasubha Yerusareemu bhamwitire mu-njira. 4Feesito ˆnaabhasubhya ati, “Pawuro abhoyerwe Kayijaariya eyo, na anye omwene gitari nsiku nyafu enija-yo. 5Mmbe nikagende, musige kigende na abhakuru bheemwe abhandi, bhaje okwaika amasitaakyo geebhwe ku-Pawuro, kirore raabhe akayire engʼana ryoneryone.”

6Feesito ˆnaamara nsiku raabhe gitari munaana ni ekumi, ari amwi na abhaanu bhayo, kweki ˆnaatebhera okusubha Kayijaariya. Orusuku rwa akabhiri, ˆneekara ku-kitebhe kyaye ekya okuramurira-ko abhaanu okuriingʼaana na ebhiraagiro. ˆNaasiiga ati Pawuro areetwe amurore. 7Bhunu Pawuro ꞉aayikire ayo, ˆnaanyoora-wo Abhayawudi bhanu ꞉bhaariga bhasookereeye Yerusareemu. Abhayawudi bhayo mbayambaara enu bheeyindire Pawuro, mbaamba okumusitaakya masitaakyo maafu makomeeye. Nawe mbatamwa okweresha ekimari kyago. 8Kimwi Pawuro woone ˆnaamba okwibhagira ˆnaaika ati, “Anye nitayabhire kyonekyone ku-bhiraagiro bhya Abhayawudi, kw-iyekaru, na ku-Kayijaari.”

9Kwa okubha Feesito ꞉aariga ˆneekumbirisha ku-Bhayawudi, ˆnaabhuusha Pawuro ati, “Angu oweenda uriinyagishe Yerusareemu, uramurirwe eyo amangʼana gayo noone niriwo?”

10Pawuro ˆnaasubhya ati, “Anye niyambaaye imbere wa omuramusi wa ebhiraagiro unu atuuywe-ko na Kayijaari,#25:10 Kayijaari. Ringira riingʼana rinu mu-Mangʼana Amakomeeye. anu niwe yeenderwe niramurirwe okuriingʼaana na ebhiraagiro. Ritariwo engʼana rinu nikayire ku-Bhayawudi, rwa kutyo awe woone umenyere. 11Raabhe kiriwo ekikayo kinu nikorere kinu kiisire anye niitwe, nitakurema okwitwa. Nawe raabhe Abhayawudi bhanu abhankuurisha era, atariwo omuunu unu kaatura okuntuura mu-mabhoko geebhwe. Anye enisabha ati amasitaaka gaani ganu garamurwe na Kayijaari.”#25:11 Abhaanu bhoone kutyo bhanu ꞉bhaariga bhari Bharuumi, ꞉bhaariga mbeekirisibhwa okusitaakibhwa Ruumi, ku-mukama omukuru unu ꞉aatogwaga Kayijaari.

12Kimwi Feesito ˆnaaikana na abhakaruka bha riibharaja, ˆnaasubhya Pawuro ati, “Waasabha ati amasitaaka gaawo garamurwe na Kayijaari, mmbe woori owugenda ku-Kayijaari.”

Feesito kaaikana na omukama Agiripa

13Nsiku ntooto era ngitura, omukama Agiripa#25:13a Omukama Agiripa. Ringira riingʼana Yerode Agiripa mu-Mangʼana Amakomeeye. ari amwi na omusubhaati waaye Bherinike mbaaja Kayijaariya, okutaarira Feesito.#25:13b Feesito ꞉aariga ari Muruumi, na Agiripa ꞉aariga ari Muyawudi. 14Mbamara-yo nsiku nyafu. Ku-nsiku giyo Feesito ˆnaabhwira omukama amangʼana ga Pawuro ati, “Anu ariwo omuunu wumwi riisiina ryaye kaatogwa Pawuro, Feriki ꞉aamusigire abhoyerwe. 15Bhunu ꞉naagendere Yerusareemu, abhakuru bha abhashengesi, na bhakaruka bha Abhayawudi, mbambwira amangʼana ganu ꞉bhaariga mbamusitaakisha-ko. Mbansabha ati nimuramurire.

16“Anye nimbasubhya ati, Abharuumi eswe kitakuramura omuunu eetwe, akyari okwibhagira ku-bhanu abhamusitaakya. 17Mmbe, bhunu ꞉naasubhire anu niri amwi na abhasitaakya bha Pawuro uyo, ꞉nitaakoorere, bhukyeye mwejo yeende-ko, niikara ku-kitebhe kyani kya okuramurira, nindagirira Pawuro areetwe, 18bhoone mbamureeta. Bhanu ꞉bhaamusitaakyaga mbayambaara, mbaamba okumusitaakya. Nawe kutyo anye ꞉naarorere, ku-mangʼana ganu ꞉bhaamusitaakyaga, ꞉ryariga ritariwo engʼana ryoneryone ebhiibhi. 19Tari abheene, ꞉bhaariga mbabhambashaanya na Pawuro iiguru ya amabhuusho ga iidiini yeebhwe era, na iiguru ya omuunu wumwi riisiina ryaye kaatogwa Yeesu. Yeesu unu, arafuuye. Nawe Pawuro weeki ꞉aariga ˆnaaikaga ati Yeesu uyo ariwo keesha omwoyo. 20Noone nniitimaata kutyo niraanyoore obhwima bhwa amangʼana ganu, kimwi nimbuusha Pawuro raabhe keekirisha okugenda Yerusareemu okuramurirwa mangʼana gayo eyo. 21Nawe Pawuro ˆnaasabha ati asigare, arinde okuramurirwa na omukama weeswe omukuru Kayijaari. Mmbe, noone nniikirisha, nnisiiga ati aangarirwe, okuyikira anu nikature okumusira ku-Kayijaari.”

22Kimwi Agiripa ˆnaabhwira Feesito ati, “Anye noone naaneenda okwitegeeresha omuunu unu anye omwene.” Feesito ˆnaamusubhya ati, “Mutondo ukamwitegeereshe.”

Pawuro ari ku-mukama Agiripa

23Bhunu ꞉bhwakyeye, Agiripa na omusubhaati waaye Bherinike, mbaaja bheepambire, mbaribhataga mbeegerya. Mbeengira mw-ibharaja bhari amwi na abhakuru bha abhasirikare na abhakuru abhandi bha mu-musi guyo. Feesito ˆnaasiiga ati Pawuro areetwe. 24Niwe Feesito ˆnaamba okwaika ati, “Ee omukama Agiripa, na bhaanu bhoone kutyo bhanu muri anu amwi na eswe. Omuunu unu omurora anu, Abhayawudi bha Yerusareemu eyo na abheenda anu, ꞉bhaamusitaakiishe ku-anye ati nibhasakire, mbamwayaga ati omuunu unu ateesire kugenderera okurama ku-kyaro kunu.

25“Nawe anye omwene ꞉nitaarorere-wo engʼana rinu rikaturire okukora eetwe. Na kwa okubha ꞉aasabhire ati indamuro yaaye iramurwe Ruumi ku-mukama weeswe omukuru, noone nindamura asirwe Ruumi. 26Anye omwene, nitari na engʼana rya ekimari erya okumwaikira, rinu nikakaamiiye omukama weeswe omukuru. Na ku-nsonga iyo naamureeta anu mu-meeso geemwe mwone kutyo, ekinene iri ku-awe omukama Agiripa, insonga Pawuro unu akamara okubhuusibhwa, ninyoore riingʼana rya okukaama. 27Kwa okubha anye enirora ati nitakubha nikorere kyonekyone nikatuma omubhoywa nitakaamire masitaakyo ganu agakora asitaakibhwe.”

Currently Selected:

Ebhikorwa bhya Abhatumwa 25: kya

Highlight

Copy