Ebhikorwa bhya Abhatumwa 26

Pawuro keebhagira ku-mukama Agiripa

1Agiripa ˆnaabhwira Pawuro ati, “Owiikirisibhwa okwibhagira omwene.” Mmbe, Pawuro ˆneemusha okubhoko, ˆnaamba okwibhagira ˆnaaika ati, 2“Ee omukama Agiripa, reero eniiyungwa kujomu okuyambaara imbere waawo okwibhagira ku-mangʼana goone ganu Abhayawudi abhansitaakya. 3Anye enaaika kutyo, kwa okubha awe umenyere kujomu gintungwa gya Abhayawudi, na giimamba gyebhwe gyone kutyo. Mmbe woori, enikwisaasaama wiikomeeshe okunyiitegeeresha.

4“Abhayawudi bhoone kutyo, bhaammenyere kujomu muno kwambira obhumura bhwani na woori, kutyo ꞉naariga niri, mu-kyaro kyasu, na Yerusareemu eyo. 5Emyaka gyaturire myafu bhaammenyerega kujomu. Raabhe bhakeenda, abhatura okwaika abheene, anye ꞉naariga niri Mufarisaayo ninseetaga gintungwa gyone kutyo egya Abhafarisaayo. Na Abhafarisaayo bhayo nibho abhaseeta ebhiraagiro bhya Nyamuwanga okukira giidiini egindi gyone kutyo egya Ekiyawudi. 6Na woori eniyambaara anu, niramurirwe ku-nsonga ya obhwisige bhwani ku-ganu Nyamuwanga ꞉aaragire bhaajaaji bheeswe. 7Nawe amangʼana gayo nigo abhaanu bha ekyaro kyeswe, mayito ekumi na gabhiri, abheesiga okugayika-ko, enu ku-nsiku mbaramya Nyamuwanga mu-mwisi na mu-ngeta. Riingʼana riyo niryo erikora Abhayawudi abhansitaakya reero mukama waani! 8Angu mukama, kubhaki emwe omutoga ati Nyamuwanga atakutura okusuura abhafuuye?

9“Kimari, okwamba anye noone ꞉naariga nindora ati ni kujomu nikore njira yooneyoone okukora abhaanu bhareme okwikirisha riisiina rya Yeesu Omunaajareeti. 10Yerusareemu eyo woone ꞉naakorere kutyokutyo. Mu-bheeyigira bha Yeesu ꞉naabhoyere bhataakatiifu bhaafu mu-jeera, na abhashengesi abhakuru nibho ꞉bhaambwiraga ati nibhabhoye. Na abhandi, anye noone neekirishaga ati bheetwe. 11Akaafu ni anye ꞉neengiraga mu-masunagoogi goone kutyo aga Abhayawudi nimbayaana ebhirusho, nimbabhwiraga bheegaane Yeesu. ꞉Naariga nikabharora riisungu eriinyita muna musasi, nimbafwimaga na mu-misi gya ebhyaro ebhindi.”

Pawuro kaaikira kutyo ꞉eerusiibhwe

(Ebhikorwa bhya Abhatumwa 9:1-19, 22:6-19)

12“Orusuku rumwi ꞉naariga niri ku-njira ningenda mu-musi gwa Dameesiki okunyansha Abhakiriisitu, na orugendo runu ꞉naariga niragiriiywe na abhakuru bha abhashengesi. 13Mukama Agiripa, bhunu ꞉naariga niri ku-njira iri mu-mwisi, kimwi nindora obhweru bhururu mbumesha okusooka iiguru. ꞉Bhwamesiishe bhukakira obhweru bhwa riisuubha, obhweru bhuyo mbukimirika mbaara gyone kutyo, anye na abheejaasu bhanu ꞉kyaribhataga kiri nabho ku-njira. 14Kyone kutyo nkigwa ansi. Nuungwa obhuraka mbumbwirira mu-nyaaika yaasu eya Ekiebhuraaniya mbwaikaga ati, ‘Awe Saawuri! Awe Saawuri! Kubhaki owuunyansha? Ikomeeye muno ku-awe okubhara okuguru kwawo ku-bhusoongʼoke bhwa riitimu!’

15“Kimwi noone nimbuusha ati, ‘Ee Raatabhugenyi, ni awe niga?’ Niwe weeki ˆnaansubhya ati, ‘Ni anye Yeesu, ni anye owunyansha. 16Nawe woori iimuka uyambaare! Eneenda awe ubhe mujuuma waani, ubhe mwaiki wa amangʼana gaani ganu waarora, na agandi ganu eniija okukweresha, kiyo nikyo kyakora niije ku-awe. 17Eniija okukuwonʼya mu-bhusoko bhwa Abhayawudi bheejaanyu, na obhwa abhaanu bha ebhyaro ebhindi. Nawe, abhaanu bhayo nibho anye enikutuma-ko. 18Eneenda ubheeshe ameeso, ubhayindure bhasige okwikara mu-kisuute, bheekare mu-bhweru. Bhasooke mu-bhuturo bhwa Sitaani, bhayindukire ku-Nyamuwanga. Bhakakora kutyo bhaabhirwe ebhikayo bhyebhwe, na bhayaanwe omugabho amwi na abhandi bhanu bheesiibhwe okuturira ku-kunyiikirisha.’

19“Ee omukama Agiripa, anye noone ꞉nitaajeerere ganu ꞉naarorere okusooka mu-rwire. 20Nnaamba okwiyigisha abhaanu bha Dameesiki, Yerusareemu, Ebhuyawudi na abhaanu bha ebhyaro ebhindi ati, bhanuge ebhikayo bhyebhwe, bhabhe bhaanu bhanu abheesiga Nyamuwanga. Bhakore bhikorwa bhijomu ebhya okweresha ati bhanugire ebhikayo bhyebhwe. 21Gayo nigo ꞉gaakorere Abhayawudi mbangwata bhunu ꞉bhaanyoorere niri mw-ibhanja rya riiyekaru, mbeenda na okunyita. 22Nawe, Nyamuwanga ˆnaansakira okuyikira ku-rusuku rwa reero runu. Amangʼana gayo nigo agakora niyambaaye anu ku-bhakuru na abhatooto, okubhabhwira ganu ꞉naarorere. Gatariwo amangʼana agandi ganu enaaika, tari ni garyagarya ganu ꞉gaaikirwe na Musa na abharagi abhandi ati garibha-wo. 23Kwa okubha abharagi bhoone kutyo ꞉bhaaikire ati Kiriisitu eesire anyansibhwe, na aribha owa okwamba okusuuka okusooka mu-bhafuuye, insonga araashe obhukama bhwa Nyamuwanga ku-Bhayawudi, na ku-bhaanu bha ebhyaro ebhindi.”

24Pawuro bhunu ꞉aariga ˆneebhagira, Feesito ˆnaatusha-mo amangʼana enu aamuuye obhuraka bhwaye ˆnaaika ati, “Awe Pawuro! Kana uri musasi! Kaana okusoma kwawo muno, kukukorere nuubha musasi!”

25Pawuro ˆnaamusubhya ati, “Ee Feesito owa ekibharo, anye nitari musasi. Amangʼana ganu enaaika ni ga kimari, na gari na obhwera. 26Na omukama Agiripa woone amenyere kujomu amangʼana gayo. Noone enitura okwaika nawe niimaririiye, kwa okubha nimenyere ati ritariwo engʼana na rimwi ku-ganu, rinu atakumenya. Enaaika kutyo kwa okubha amangʼana ganu ꞉gaakorekaga ku-bhweru. 27Angu omukama Agiripa, owiikirisha goone kutyo ganu ꞉gaaikirwe na abharagi? Anye nimenyere kujomu ati owugeekirisha.”

28Kimwi Agiripa ˆnaabhwira Pawuro ati, “Kana owutoga ati owutura okuyindura anye nibhe Mukiriisitu ku-mangʼana gaawo matooto gayo?” 29Pawuro weeki ˆnaamusubhya ati, “Amangʼana gabhe matooto, gabhe maafu, enisabha Nyamuwanga ati, ubhe rwa kutyo niri, atari awe era, na abhandi bhoone kutyo bhanu abhanyiitegeeresha reero. Tari musige okunyoora iinyanko rwa inu niri nayo.”

30Niwe omukama Agiripa, omutungi Feesito, Bherinike, na abhandi bhanu ꞉bhaariga bheekaaye amwi ayo, mbayambaara. 31Na bhunu ꞉bhaariga mbeemuka ayo, mbaaikana ati, “Omuunu unu, akyari kukora engʼana rya okukora eetwe. Na okubhoywa kwone akyari kukora engʼana rya okukora abhoywe.” 32Omukama Agiripa ˆnaabhwira Feesito ati, “Omuunu unu, akabheeye atasabhire ati indamuro yaaye iramurwe ku-Kayijaari, akataatiiywe.”

Currently Selected:

Ebhikorwa bhya Abhatumwa 26: kya

Highlight

Copy