Ebhikorwa bhya Abhatumwa 24

Pawuro kaasitaakibhwa imbere ya omwinangwa Feriki

1Bhunu ꞉gyaturire nsiku etaanu, omukuru wa abhashengesi Ananiya ˆnaatebhera mu-musi gwa Kayijaariya ayo, ari amwi na abhakaruka abhandi abha Ekiyawudi, na omuunu wumwi owa okubhaaikira, riisiina ryaye ˆnaatogwa Terituro. Bhoone kutyo mbareetera omutungi Feriki amangʼana ganu ꞉bhaariga mbasitaakisha-ko Pawuro. 2Kimwi Pawuro ˆnaareetwa, Terituro ˆnaamba okwaika amangʼana ganu ati Pawuro ꞉aariga akayire, ˆnaaika ati, “Awe Feriki owa ekibharo, ni awe owukora kibhe na omurembe ku-nsiku ginu gyone kutyo. Na ku-bhutangasha bhwawo, owumara-wo amangʼana amabhiibhi ku-kyaro kunu. 3Ebhaga ryone kutyo, na woonewoone anu kiri, ekikukumya muno na okuramira amangʼana ganu enu kijomeeywe. 4Woori naasiga okukora uyigwe muno. Kutyo woori, enikwisaasaama ukiitegeereshe ku-mangʼana geeswe ganu matooto era.

5“Eswe kirorere ati omuunu unu ni mukana, kaasooyeresha Abhayawudi mu-bhyaro bhyone kutyo, na niwe kaambisha inkungu mu-Bhayawudi. Ukasiga riyo, niwe omutangasha wa iidiini ya Abhanaajareeti, na iidiini iyo itakwaikaga ekimari. 6꞉Aariga ˆneenda okunaabhiyasha#24:6 Okunaabhiyasha. Ringira riingʼana Obhunaabhi mu-Mangʼana Amakomeeye. riiyekaru, kimwi nkimugwata. [Nkyenda okumuramurira okuseetana na ebhiraagiro bhyeswe. 7Nawe Riisiya omukuru wa abhasirikare, ˆnaamukiteesha kwa amanaga, 8ˆnaasiiga ati bhanu abhamusitaakya bhamusitaakye ku-awe enu.] Na awe omwene anu uraamubhuusirishe, niwe uraarore ekimari kya amangʼana goone kutyo ganu ekimusitaakisha-ko ku-awe.” 9Mmbe, Abhayawudi abhandi abheejaabho Terituro bhoone mbaamba okwaika ati, amangʼana gayo Terituro aaika ni kimari.

Pawuro keebhagira ku-mwinangwa Feriki

10Mmbe, omutungi ˆnaasomeeresha Pawuro woone aaike. Pawuro ˆnaamba okwaika ati, “Anye nimenyere ati myaka myafu gyaturire ubheeye muramusi ku-kyaro kinu. Woori anye noone ku-awe, eniibhagira nijomeeywe mu-mutima. 11Awe omwene owutura okumenya kujomu ati, gikyari kwambuka nsiku ekumi na ebhiri, okwambira bhunu ꞉naariinyagisiishe okugenda Yerusareemu okuramya Nyamuwanga. 12Abhaanu bhanu abhansitaakya, nawe ꞉bhataanyoorere nibhambashaanyaga na muunu woonewoone wurya, na okureeta inkungu mu-masangi ga abhaanu, mw-ibhanja rya riiyekaru, mu-masunagoogi, amwi ati woonewoone mu-musi muyo, ꞉bhataanyoorere ninkora kutyo. 13Amangʼana ganu abhansitaakisha-ko woori, bhatakutura okukweresha ati nigo ekimari.

14“Tari, rinu eniigamba ku-awe, ni ati eniramya Nyamuwanga wa bhaajaaji bheeswe na okuseeta ameeyigisho ga Raatabhugenyi Yeesu, ganu abhaanu bhanu bheeki abhaaika ati iidiini iyo itakwaika ekimari. Anye eniikirisha amangʼana goone kutyo ganu ebhiraagiro bhya Musa ebhyenda, na aga abharagi. 15Noone obhwisige bhwani bhuri ku-Nyamuwanga, rwa kutyo abhaanu bhanu bhoone abheekirisha ati Nyamuwanga arisuura abhafuuye bhoone kutyo, abharengeresi, na bhanu bhatari bharengeresi. 16Ku-nsonga iyo, noone eniikomeesha nsiku gyone kutyo, nibhe muunu wa mutima mweru ku-Nyamuwanga na ku-bhaanu.

17“Emyaka gyaturire myafu nikyari kuuja Yerusareemu anu. Woori niijire na ebhiinu okusakira abhaanu bha mu-kyaro kyasu bhanu bhatari na bhuturo, na okusoosha ekimweso ku-Nyamuwanga. 18Bhunu abhaanu bhanu ꞉bhaanyoorere ninkoraga gayo mw-iyekaru, ꞉naariga naamarire okwiyesha, ꞉bhataanyoorere na bhaanu mw-iyekaru, na itariwo nkungu yooneyoone inu ꞉naakorere muyo. Nawe mw-iyekaru muyo ꞉bhaariga bharimo Abhayawudi abhandi bhasookereeyega mu-kyaro kya Asiya. 19Abhayawudi bhayo, nibho bheesire okubha anu, raabhe ꞉naabhakoreeye engʼana ryoneryone erya okunsitaakisha-ko ku-awe.

20“Raabhe itari kutyo, abhaanu bhanu bhari anu, abheene bhaaike bhikayoki bhinu ꞉bhaarorere ati naabha nabhyo bhunu ꞉bhaayambaasiishe mw-ibharaja ryebhwe. 21Tari amwi ꞉bhaarorere kubhiibhi bhunu ꞉neeririiye niri mu-bhaanu agati, nnaaikaga ati, ‘Ganu agakora anye niramurirwe mu-meeso geemwe reero, ni kwa okubha eniikirisha ati abhafuuye bharisuuka.’ ”

22Mmbe, Feriki ꞉aariga amenyere kujomu obhwikirisha bhwa abheeyigira bha Yeesu, kimwi ˆnaabhwira bhayo ꞉bhaasitaakyaga Pawuro ati, “Eniija okuramura amangʼana ganu bhunu Riisiya omukuru wa abhasirikare akaaje anu.” 23Niwe Feriki ˆnaabhwira omukuru wa abhasirikare ati, “Yangarira Pawuro, nawe siga okugaanya bhanu abhaaja okumukeesha, na ubheekirisishe okumusakira ku-bhinu keenda.”

Pawuro ari ku-mwinangwa Feriki na Durusiira

24Bhunu ꞉gyaturire nsiku ntooto era, Feriki ˆnaaja ari amwi na mukaaye Durusiira Omuyawudi, ˆnaabhirikira Pawuro. Bhunu Pawuro ꞉aayikire, ˆnaamba okubhabhwira amangʼana ga okwikirisha Kiriisitu Yeesu. 25ˆNaagenderera okubhabhwira iiguru ya obhurengeresi, okwiyiinya, na indamuro ya Nyamuwanga inu iriija. Feriki bhunu ꞉oonguuywe amangʼana gayo, ˆnaayaya, ˆnaabhwira Pawuro ati, “Woori owutura okugenda. Nikanyoora omwanya eniija okukubhirikira kweki.” 26Kimwi Feriki ˆnaagenderera okubhirikiraga Pawuro, insonga aaikega nawe, kwa okubha ꞉aariga ˆnaatoga ati amwi Pawuro kaaja okumuyaana-ko amasooya.

27Anu ꞉gyaturire myaka ebhiri, Porikiyo Feesito ˆnaagega obhwinangwa okusooka ku-Feriki. Na kwa okubha Feriki ꞉aariga ˆneenda Abhayawudi bharore ati ni mujomu, ˆnaasiga abhoyere Pawuro mu-jeera.

Currently Selected:

Ebhikorwa bhya Abhatumwa 24: kya

Highlight

Copy