Feesito ˆnaamara nsiku raabhe gitari munaana ni ekumi, ari amwi na abhaanu bhayo, kweki ˆnaatebhera okusubha Kayijaariya. Orusuku rwa akabhiri, ˆneekara ku-kitebhe kyaye ekya okuramurira-ko abhaanu okuriingʼaana na ebhiraagiro. ˆNaasiiga ati Pawuro areetwe amurore. Bhunu Pawuro ꞉aayikire ayo, ˆnaanyoora-wo Abhayawudi bhanu ꞉bhaariga bhasookereeye Yerusareemu. Abhayawudi bhayo mbayambaara enu bheeyindire Pawuro, mbaamba okumusitaakya masitaakyo maafu makomeeye. Nawe mbatamwa okweresha ekimari kyago.