Gurim 6

Tɔnɔ kom maaro pulim taane

1Amo daa ma nii a na Pipeila kam laam na bobo se ka puri tɔnɔ kom. Ka ma kore boboa maao kolo na meeli-ko to. Amo ma ni wonnu tena tem na ŋwe to dedoa kwora na dɔna, ne doa na mumuna tei to, ye ko we, “Ba ywo.” 2Amo ma nii a na siseiŋ-pwoŋa na zege da. Wolo na dɔge ka baŋa ne to maa zei taŋa. Ba ma pu paare yipuga o yuu ne. O laam ma nwoŋi se o vo o mage jara o di.

Tɔnɔ kom maao 2

3Pipeila kam daa ma kore maao kolo na ke telei to. A ma ni woŋo kolo na ŋwe ye ko saŋe to na tage ko we, “Ba ywo.” 4Amo daa ma na siseiŋa kadwoŋi ka na nwoŋi ye ka ye naseŋa muri-muri. Wolo na dɔge ka baŋa ne to ma jwoŋi dam se o ba o chɔge ywoni logo baŋa ne, se nɔɔna bam taa mage jara ba go daane. Ba ma kwei se-zɔɔ-polɔgɔ ba ke o jeŋa ne.

Tɔnɔ kom maao 3

5Pipeila kam daa ma kore maao kolo na ke tetɔ to. A ma ni woŋo kolo na ŋwe ye ko ke tetɔ to na tage ko we, “Ba ywo.” A ma nii a na sisein-zwono na zege da. Wolo na dɔge ka baŋa ne to maa zei luu kolo ba na maa maŋe wonnu dunni ba nii to. 6Amo ma ni dɔnem na nye de kwora ye ka nwoŋi wonnu tena tem na ŋwe to tetare ne ka we:

“Nmo ná lage bworobworo muni#6:6 bworobworo muni = wheat bɔŋa dedoa yerane,

n wó ma n dɛ wone ŋweero maama mo n yeigi.

Kamaana muni#6:6 kamaana muni = barley bwɛ setɔ de maa wó yeigi konto dwoŋi.

Ko nam ná ye nuga kam de sana bam,

se n yé ja konto n chɔge.”

Tɔnɔ kom maao 4

7Pipeila kam daa ma kore maao kolo na ke tena to. A ma ni woŋo kolo na ŋwe ye ko kweeli te wone to na tage ko we, “Ba ywo.” 8A ma nii a na sisein-fufunu na zege da. Wolo na dɔge ka baŋa ne to yere mo ye Toone. Wolo yere na ye Churu to maa tɔge‑o o nɔne o nagwola. Ba ma jwoŋi dam se ba go nɔɔna bana maama wone nɔɔno dedoa. Ba jege dam se ba pa jara mo go nɔɔna badaara, se ba pa kana de go badaara, se jaweo de go badaara, se ba daare ba pa kago-vara de go badaara.

Tɔnɔ kom maao 5

9Pipeila kam laam ma kore maao kolo na ke tenu to. Amo laam ma na Wɛ kaanem bimbini dem, ye a na balo ba déem na go Wɛ chwoŋa kam tɔgem ŋwaane to jworru na wo de teiŋa ne. Banto na kwaane ba bere Wɛ chega kam to ŋwaane mo ba déem go-ba. 10Ba ma ŋɔɔne baŋa baŋa ba we:

“Dam-fɔrɔ Tu Baŋa Wɛ, nmo ye wo-pwoŋo tu mo de chega tu.

Yé dáane se n laam di logo baŋa nabiina taane,

se n daare n waare-ba, ba na go debam to ŋwaane.”

11Ba laam ma kwei gare-napwon-dedwaaro ba pa ba maama. Ba ma ta-ba ba we, “Zuri-na á yera se á kɔgɔ kom laam ba ko puli ko ti. Kokuri á dwonna ta daare logo baŋa ne, balo na maŋe se ba woli á kɔgɔ kom wone to. Banto ye balo de na toŋe ba pa Wɛ to, ye nɔɔna wó go-ba, ne ba na go abam tei to.”

Tɔnɔ kom maao 6

12A ma na Pipeila kam daa na kore maao kolo na ke teredo to.

Tega kam laam maa tiini ka ziziŋa.

Wea kam ma ji nazwono tim-tim,

ne gare-zwono tei.

Chana kam maama ma ji nasoŋo chwɛ-chwɛ,

ne jana tei.

13Chalechwe sem ma siiri se toe tega ne,

ne vo-dɛɔ mo na sugi kapera ko pa ya siiri tei to.

14Wɛyuu kom ma piri ko kɛ,

ne nɔɔno na piri sara tei to.

Ko daare logo baŋa peero maama

de tega kalo maama na wo naneo tetare ne to

ma fɔɔre te tiga jei ne.#Izaya 34:4

15Logo baŋa nɔɔna maama laam ma kɔre foone. Ko ná ye logo baŋa pwa, de dedɛɛra, de jar-keira yiga tiina, de naduna, de nɔn-kamuna, ko woli de kabɛ, de balo na tei ba tete to maama, ba maama fona ye ba duri ba vo ba seigi ba tete peero bɔɔna de gugworru wone. 16Ba laam ma lwoori kandwa yam de peero tem ba na seigi te wone to se te to ba baŋa ne te kwoli-ba.#Hosea 10:8 Ba maa we, “Kwoli-na debam, se wolo wom na jei paare yituŋu kom baŋa ne to daa yé na debam. Ta‑á cho-na debam de Pipeila kam ban-zɔŋɔ kom na wo debam baŋa ne to. 17Kokuri to, dɛ dem yia se ba bane zaŋe debam nabiina baŋa ne, ye nɔɔn-nɔɔno daa bá wane o lu.”

Currently Selected:

Gurim 6: KBG

Highlight

Copy

Compare