Gurim 5
5
Wɛ Pipeila kam taane
1Amo laam ma na tɔnɔ na wo wolo wom na jei paare yituŋu kom baŋa ne to jazem ne. Tɔnɔ kom dɛ sem maama maa jege poponem. Ko ni dem ma meeni de maaro kuni berepɛ.#Izaya 29:11 2A ma daare a na Wɛ maleka na dana to ye ka tɔɔle de kwor-dɛa ka we, “Wɔ mo yi se o wane o kore maaro telo na meeli tɔnɔ kom ni dem ne to, se o daare o puri-ko?”
3Nɔɔn-nɔɔno tera telaao ne, naa tega baŋa ne, naa tega kuri jei ne, o na wó wane o puri tɔnɔ kom o daare o ga-ko. 4A wo ma tiini ko chɔge de ba na wo nɛ nɔɔn-nɔɔno wolo na yi se o puri tɔnɔ kom o daare o ga-ko to. 5Nakwa finlei-bana bam wo dedoa ma ta de amo o we, “Yé pa se n wo chɔge. Nii. Judah dwi tu wolo na dana ne nywoŋo tei to mo wora, ye o kuri nwoŋi Pɛ David dwi dem wone. Wonto mo wane o dona maama o di, ye o na chwoŋa se o puri tɔnɔ kom de ko maaro terepɛ tem.”#Gurim 22:16
6Amo daa ma na Pipeila, ka na zege paare yituŋu kom, de wonnu tena tem na ŋwe to, de nakwa bam tetare laŋa ne. Ka maa nye de ba ya gwoni-ka mo ba go.#Izaya 53:7; Jɔn 1:29 Ka jege nyea yarepɛ mo dedaane yia yarepɛ. Ka yia yarepɛ yam mo bere Wɛ dedɛɛra barepɛ bam na ye tei to, ye banto mo Wɛ toŋe logo baŋa ni maama ne.
7Pipeila kam laam ma vo wolo na jei paare yituŋu kom baŋa ne to tei ka jwoŋi tɔnɔ kom na wo o jazem ne to. 8Ka na jwoŋi-ko konto to, wonnu tena tem na ŋwe to dedaane nakwa finlei-bana bam ma kuni dwoona ka yiga ne. Ba maama dedoa dedoa maa jege kɔnɔ, ye ba zei sabu-seŋa zwe se ni na su de talwoŋ-ywoŋa. Ka lwom dem na zaŋe tei to bere Wɛ tete nɔɔna bam na ware‑o tei to mo. 9Ba ma daare ba leeni leiŋ-doŋa ba seini Pipeila kam ba we:
“Nmo yi se n jwoŋi tɔnɔ kom
se n daare n kore ko maaro tem.
Kolo ŋwaane ba ya gwoni nmo ba go,
ye n tɔge n toone jana bam ŋwaane mo
n ŋwe nabiina wɛleera jene
n daare n jwoŋi-ba n ke Wɛ jeŋa ne.
Balo nmo na jwoŋi to nwoŋi
nabiina dwi maama wone,
de taana dwi maama tiina wone,
de teene maama wone,
de paare dim jei sem maama wone mo.
10Nmo ma‑n daare n pa ba ji dwi delo
na wó zege dé Tu Wɛ wom yiga ne
ye ba zuli‑o ne kaanem tiina to.
Ba maa wó taa tei nɔɔna logo baŋa ne.”
11Amo daa ma nii a na Wɛ malese kɔgɔ dedɛ, ye a ni se kwori. Se daga lanyerane ne morro kuni morro dedɛ mo tei. Se maa zege se gilimi paare yituŋu kom, dedaane wonnu tena tem na ŋwe to, de nakwa bam.#Danyeli 7:9-10 12Se laam ma leeni baŋa baŋa se we:
“Pipeila kam ba na go to seene ka maŋe
se ka jwoŋi dam, de nadunni, de swa, de baare,
ko woli de seinim, de zula, de teem.”
13Amo daa ma ni wonnu maama na wo Wɛ telaao ne to, de telo maama na wo logo baŋa ne de tega kuri jei ne to, ko woli de wonnu maama na wo naneo wone to de. Ko maa ye wonnu telo maama Wɛ na ke to mo leeni te we:
“Wolo na jei paare yituŋu kom baŋa ne to,
dedaane Pipeila kam
maŋe de teem, de seinim, de zula, de dam,
se ko taa vei wuu.”
14Wonnu tena tem na ŋwe to ma sɛ ye te we, “Ameena. Ko ye konto mo.” Ko daare nakwa bam ma kuni dwoona ba zuli Wɛ.
Currently Selected:
Gurim 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
