Gurim 7
7
Wɛ kɔgɔ kom taane
1Konto na kɛ to, a ma na Wɛ malese sena na zege tega baŋa sapala yana yam ne. Malese sem maa jege logo baŋa vio kom maama se ko yé taa fula ko pae jei de jei tega baŋa ne naa naneo wone, se ko yé fuli ko pa logo baŋa tio de.
2A daa ma na Wɛ maleka kadwoŋi na zaŋe ka nwoŋi wɛ-puli jei ne ka maa beena. Ka nam tu se ka la gwona mo ka pa balo na ye Ŋwea Tu Wɛ nyem to. Ka ma bage ka ta de Wɛ malese sena sem, Wɛ na pɛ-se dam se se wane se chɔge tega baŋa de naneo kom to, ka we, 3“Zege-na. Á yé chɔge tega baŋa, naa naneo kom, naa teeni dem de. Nam cheigi-na se dé ná tu dé la dé Tu Wɛ tontoŋena bam gwona ba tira ne, se dé daare.”#Ezekeli 9:4; Gurim 9:4
4Amo laam ma ba a lɔre balo na lage Wɛ gwona yam to ni na mae tei to. Ko ye nɔɔna morro bi de finna-tena (144,000) mo laga Isarele tiina dwi dem maama wone. 5Nɔɔna bam konto maa ye:
Nɔɔna morro fuga-telei (12,000) Judah dwi dem wone.
Nɔɔna morro fuga-telei (12,000) Ruben dwi dem wone.
Nɔɔna morro fuga-telei (12,000) Gad dwi dem wone.
6Nɔɔna morro fuga-telei (12,000) Asere dwi dem wone.
Nɔɔna morro fuga-telei (12,000) Nafitali dwi dem wone.
Nɔɔna morro fuga-telei (12,000) Manasɛ dwi dem wone.
7Nɔɔna morro fuga-telei (12,000) Simeon dwi dem wone.
Nɔɔna morro fuga-telei (12,000) Levi dwi dem wone.
Nɔɔna morro fuga-telei (12,000) Isakara dwi dem wone.
8Nɔɔna morro fuga-telei (12,000) Zebula dwi dem wone.
Nɔɔna morro fuga-telei (12,000) Josɛf dwi dem wone.
Nɔɔna morro fuga-telei (12,000) Benjamin dwi dem wone.
9Konto na kɛ to, a ma daa nii a na nɔn-kɔgɔ na tiini ko wora, ye nɔɔn-nɔɔno bá wane nɔɔna bam o ga o ti.
Nɔɔna bam konto nwoŋi
paare dim jei sem maama wone,
de nabiina dwi maama wone,
de teene maama wone,
de taana dwi maama tiina wone mo.
Ba maa zege paare yituŋu kom de Pipeila kam yiga ne. Ba zo gare-napwon-dedwaaro mo, ye ba daare ba zei konkwara vɔɔro ba jea ne. 10Ba laam maa ŋɔɔne baŋa baŋa de kwor-dɛa ba we:
“Debam Tu Wɛ mo jei paare yituŋu kom baŋa ne.
Pa-na dé tei‑o, o na vere debam lɛɛro wone o yage to ŋwaane,
ye dé tei Pipeila kam de.”
11Wɛ malese sem maama maa zege se gilimi paare yituŋu kom, de nakwa bam, dedaane wonnu tena tem na ŋwe to. Malese sem laam ma chɔɔle se yuni tega ne se yɔɔre paare yituŋu kom se zuli Wɛ se we:
12“Ko ye chega mo. Debam Tu Wɛ maŋe de teem, de zula, de swa, de lei keim,
ko woli de seinim, de dam, de baare,
se ko taa vei wuu. Ameena.”
13Konto na kɛ to, nakwa bam dedoa ma bwei amo o we, “Nɔɔna bam na zo gare-napwon-dedwaaro tem to ye bera mo? Ba nwoŋi yei ne mo?” 14Amo ma leiri‑o a we, “Amo tu, ta n bere-ne, se nmo mo yei-ba.”
O laam ma ta o bere amo o we, “Nɔɔna banto mo ye balo na wo logo baŋa ne maŋa kalo lɛɛro na tiini te wora ye ba nwoŋi te wone to. Ba nam zare ba gwaaro tem de Pipeila kam jana bam mo pa te peere.#Zekaria 3:4 15Konto nam mo pɛ banto ba ba zege Wɛ paare yituŋu kom yiga ne, ye ba toŋe ba pa‑o wea de tete maama o sɔŋɔ kom ne. Wolo wom nam na jei paare yituŋu kom baŋa ne to wó pa ba jeini o woro ne.
16Kana daa bá fɔge ka ja banto.
Na-nyɔm de nam bá ja-ba.
Wea nam daa bá ja-ba, naa fonyogo.#Izaya 49:10
17Kokuri Pipeila kam na wo paare yituŋu kom jei sem tetare ne to wó taa nii ba baŋa ne, ne ka ye nayero mo tei.
Ka nam wó tɔge ba yiga ka ja-ba ka vo buli selo na na pae ŋwea to se ba nyɔ.#Lei 23:2
Wɛ nam wó weeri nɔɔna bam maama yi-na,
se ba daa yé taa jege yi-nyɔna.”
Currently Selected:
Gurim 7: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
