Chullu 26

Ni-sɛɛm na wó ja Wɛ swolim delo de ba to

1“Yé zaŋe-na á ke jwona se á zuli-ya. Nam yé mɔ-na kamwaro, naa se á cheili kandwa, naa a sare-ya á pa se ya ji wa-yɔɔro se á zuli-ya. Amo mo ye abam Tu Baŋa Wɛ wom.

2Ta‑á yei-na amo siu da yam ni ne, se á daare á ta‑á nege amo wara-jei sem. Amo mo ye Baŋa Wɛ wom.

3Abam ná sɛ amo bera yam, ye á toŋe á tɔge amo nia yam, 4amo de wó toŋe doa se ka ne ka maŋa ne, se á wodiiru ke lanyerane. Abam teeni dem de maa wó lei bia dedɛ. 5Abam wodiiru na wó puli dedɛ konto to, abam ta wó ta‑á zage wodiiru mo ye á Vini tio-bia maŋe ba yi se á gwori-ba. Abam nam bá gwori á teeni bia á ti, de duum maŋa na yi se á du á wo-dwa. Abam wó ta‑á jege á di á sui á boboŋa, ye á zoore á tega kam ne de wo-zuru.

6Amo wó pa se á ta‑á zoore tega kam ne de yazura. Á maa wó peini á dɔ ye foone ba jege abam. Amo wó le kago-vara se ba yé taa wo abam tega kam wone, ye a daare a che á dona. 7Chega to, abam wó zeili á dona á di dam ba baŋa ne, ye á go-ba. 8Abam nɔɔna banu wó na dam se á zeili á dona bam nɔɔna bi. Abam nɔɔna bi de wó zeili ba nɔɔna morro fuga ye á wane-ba á go.

9Amo yiga wó taa wora de abam, pa se á na bia dedɛ ye á puli de dam. A maa wó su ni-gwonim delo a na tiŋi de abam to. 10Abam wodiiru na wó tiini te gaale to ŋwaane, ko ná yi se á zage wodiiru, ben-dwoori dem wodiu ta wó taa wo á tuli ne, pa se á dole-ko á yage se á na jei á ke á wodi-doŋo da.

11Amo maa wó ba a taa zoore abam tetare ne.#Ezekeli 37:27; Gurim 21:3 Amo bere a bá yaale abam. 12Amo wó taa wo á tei ne. A maa wó taa ye abam Tu Wɛ wom, ye abam de wó taa ye amo nɔɔna. 13Amo mo ye abam Tu Baŋa Wɛ wom. A ma ja abam a nwoŋi Ejipti ne, se á daa yé ta‑á ye Ejipti tiina kabɛ. A ma chɔge dam delo ya na nye abam de se tega ne to, ye a jwoŋi abam pa se á vei ye á yuni wo wɛɛne.”

Zwabania taane

14“Abam nam ná ba sɛ amo kwora, ye á ba tɔge a nia yam maama, 15á ná nwoŋi amo bera yam kwaga ne, á daare á chɔge ni-gwonim delo a na ke de abam to, 16amo laam wó waare abam tento mo: lɛɛro wó yi abam lela, nenɛɛne jawe-chɛɛro, de sesa-dwonnu, de paa. Tento mo lage te dwei á yia, se á daare á bugi á jei. Abam ná dugi wodiiru, ko bá jwoŋi abam. Kokuri to, á dona mo lage ba vere-te á tei ne ba di ba daare abam. 17Amo tete mo lage a nwoŋi abam kwaga ne, pa se á dona di abam jara wone. Nɔɔna balo na chuli abam to wó di dam á baŋa ne. Á ta wó kwaane se á duri á lu ye nɔɔn-nɔɔno ba zeili abam.

18Tento maama nam ná yi abam ye á ta ve se á sɛ amo kwora, a laam wó pa se á waarem dem puli de ke da kuni berepɛ mo á wɛleera yam ŋwaane. 19Amo maa wó pa se á kamunim dem ba de tu tega. Amo wó che se doa yé ne ka pa abam, se á tega kam ko ye ka taa dana nenɛɛne luu na ye tei to. 20Abam totoŋ-dɛɛra yam maama bá ja kuri ya pa abam. Kokuri to, tega kam bá ke wodiiru ka pa abam, á teeni dem de nam bá lei bia.

21Konto maama nam ná kea, ye abam ta ná ve-ne, ye á ba sɛ a kwora kam, amo laam wó pa se á cham dem puli mo de ke kuni berepɛ de woli da. 22Amo wó saase kago-vara a yage abam yera ne mo. Ba maa wó go á bia, ye ba daare ba chɔge á vara bam. Á kɔgɔ kom wó ba ko mɔ, pa se nɔɔna daa bá taa wo á chwei sem yuu ne ba via.

23De konto maama de, abam ta ná ve amo koresem dem konto, 24amo de wó ve abam. A ta wó waare abam kuni berepɛ mo a daa woli da á wɛleera yam ŋwaane. 25A lage a pa se jara mo zaŋe abam de á dona tetare ne, abam na chɔge ni-gwonim delo amo na ke de abam to ŋwaane. Abam ná duri se á zo á te-kamunnu tem wone á seigi da se á lu, amo wó pa se jawe-chɛɛro ja abam dáane. Abam dona laam maa wó na chwoŋa se ba wane abam. 26Amo wó pa se á ga wodiu se á di. Bworobworo wɔɔm jeiga dedoa wone mo kaana fuga wó lare muni ba wɔ bworobworo se ba di sem tiina di. Ba nam ná chɛ bworobworo kom se ba pa daane, diga maama wó na fenfee yerane mo. Á ná nɛ wodiu, á bá wane-ko á di á su.

27De konto maama de, abam ta ná ba sɛ amo kwora kam ye á ve-ne, 28amo laam wó yɔɔre a le a bane mo se de zaŋe abam baŋa ne. Amo ta wó waare abam á wɛleera yam ŋwaane kuni berepɛ mo. 29Kana wó tiini ka ni abam mo pa se á ja á tete bia á di. 30Amo nam wó chɔge wara-jei bimbina yam mɛ á na vei da á kaane á wa yam to. A ta wó yigi á bimbina yalo á na zwɛ talwoŋa ya baŋa ne to a de tega ne. A laam wó dogele á twa a daŋe á jwona yam baŋa ne, ya na ye wo-yɔɔro to ŋwaane. Amo wó chuli abam. 31A maa wó pa se á teene dem ji di-dwonnu yerane, ye a daare a chɔge wara-jei selo á na vei da á zuli á wa yam to. Á ná zwɛ wonnu á pa-ne, te lwom bá pwoli a wo. 32Amo tete nam mo lage a chɔge á tega kam. Abam dona ná tu se ba zo ka wone, ko wó so-ba dedɛ. 33Amo wó zeili abam a jage a yage teene dedwonna wone, jara-keim ŋwaane. Abam maama wó nwoŋi á daare á tega kam mo se ka ji di-dwonnu yerane.#2 Tigisim 36:20-21; Danyeli 9:11 34-35Ko maa wó pa se tega kam na siu, ne ko ya na maŋe se ka na bena yarepɛ maama wone to. Abam ná zoore ka wone ye á wo pɔɔre siu bene dem á pa-ka, ka laam wó sii bena yalo maama abam na wó jage á ta‑á wo á dona bam teene dem wone to.

36Abam balo na wó wori to, amo wó pa á vɔna pare ye foone ja abam á dona teene dem wone. Vɔɔ tete ná siiri tega ne á wó duri mo ko dɔnne ŋwaane. Á wó boŋe we nɔɔna mo pare abam se ba ja ye á duri se á lu. Á wó to tega ne, ye nɔɔn-nɔɔno tera. 37Abam nam wó duri á tiri á to á daŋe da-baŋa ne, ye nɔɔn-nɔɔno ba pare abam. Abam bá ta‑á jege dam se á wane á dwoni de á dona. 38Á wó te á dona teene dem wone, pa se á dwi dem jei dáane. 39Abam wone balo fenfee na wó daare á dona teene dem wone to de maa wó bugi ba jei. Ko nam wó taa ye wɛleera yalo ba de ba nabaara na ke to ŋwaane mo ba lage ba bugi ba jei konto.

40Ko kwaga seeni, ba nam wó wane ba sɛ we ba de ba nabaara bam seene ba tusi, ye ba daare ba chuli ba wɛleera, de ba na ywori amo kwaga ne ye ba ve amo, 41pa se amo de ve banto ye a daare a zeili-ba a ja vo ba dona teene dem ne tei to. Ba ná seene ba tu ba tete ba daare ba leiri ba boboŋ-balwaaro tem, ye ba sɛ waarem delo amo na pɛ-ba to, 42amo de wó guli a ni-gwonim dem a na ke de ba nabaara Jakob, de Izaak, de Abaraham to. Amo ta wó guli ba tega kam gula se a fɔge-ka. 43Amo nam wó zeili-ba ba tega kam ne se ka wane ka na siu, ne ko ya na maŋe se ka sii bena yarepɛ maama wone tei to. Ba ná viiri ba daare tega kam, ka laam wó na siu konto dwoŋi. Ba jege se ba na waarem delo na wó maŋe de ba wɛleera yam to mo, ba na yɔɔre ba ve amo nia yam de a bera yam to ŋwaane.

44De ko de, ba ná maŋe ba wo ba dona teene dem wone, amo bá yɔɔre a ve-ba. Amo bá yiri ni-gwonim delo a na ke de-ba to ye a daare a chɔge-ba a ti. Amo mo ye ba Tu Baŋa Wɛ wom. 45A nam daa wó jwoori a guli ni-gwonim delo a na ke de ba nabaara bam to, ye a woli-ba. Amo déem jaane ba nabaara bam konto a ja nwoŋi Ejipti ne se a taa ye ba Tu Wɛ wom, ye dwi-gɛ tiina bam zege ba nia. Amo seene a ye Baŋa Wɛ wom mo.”

46 Baŋa Wɛ déem zege Sinayi peo kom yuu ne o tɔge Moses baŋa o pa Isarele tiina bam o nia yam, de o bera yam, de o chullu tem konto mo, se ba taa tɔga.

Currently Selected:

Chullu 26: KBG

Highlight

Copy

Compare