Chullu 27
27
Nɔɔno na wó kwei ni Baŋa Wɛ tei ne to
1 Baŋa Wɛ daa ma ta de Moses o we:
2“Ta de Isarele tiina bam we: Wolo ná kwei o yera nɔɔno se o ma gwoni ni o pa Baŋa Wɛ, kotu wó wane o ŋwe sabu se ko leiri o nɔɔno wom yuu ne. Nɔɔno de nɔɔno kwora na maŋe de lu-nyenno sɛkɛle na ye chekke to mo tento:
3Baaro ná maŋe de bena finlei se ko yi bena fuseredo, se á ŋwe lu-nyenno sabu-dala finnu o ŋwaane.
4Kaane nam ná maŋe de bena yam konto, se á ŋwe lu-nyenno sabu-dala fintɔ o ŋwaane.
5Bakeira ná maŋe de bena yanu se ko yi bena finlei, se á ŋwe lu-nyenno sabu-dala finlei o ŋwaane.
Busankana nam ná maŋe de bena yam konto, se á ŋwe lu-nyenno sabu-dala fuga o ŋwaane.
6Bakeira ná maŋe de chana dedoa se ko yi bena yanu, se á ŋwe lu-nyenno sabu-dala yanu o ŋwaane.
Busankana bena nam ná maŋe de bena yam konto, se á ŋwe lu-nyenno sabu-dala yatɔ o ŋwaane.
7Baaro ná kwe o yi bena fuseredo o daŋe, se á ŋwe lu-nyenno sabu-dala fuga-yanu o ŋwaane.
Kaane nam ná maŋe de bena yam konto, se á ŋwe lu-nyenno sabu-dala fuga o ŋwaane.
8Nɔɔno wolo ná ke ni-gwonim dem konto, ye o ba jege sabu kolo na maŋe de ni dem to, se kotu ja o nɔɔno wom o yi kaanem tu tei. Kaanem tu wom ná nii nɔɔno wom, o laam wó jeeli ni-gwonim tu wom na wó ŋwe bagera se ko maŋe de o dam na wae tei to.
9Wolo nam ná kwei vara balo na maŋe de kaanem to se o ke ni-gwonim o pa Baŋa Wɛ, vara bam konto dwoŋi maama wó ji wose mo Baŋa Wɛ ŋwaane. 10Chwoŋa tera se kotu kwei vare-gaa o leiri wodwoŋi wom yuu ne. Ko ná maŋe ko ye o kwei vare-ŋom mo o leiri vare-nabwom yuu ne, o dae se o ke konto. Wolo nam ná ke konto, vara balei bam maama wó ji Baŋa Wɛ nyem mo. 11Ko nam ná ye varem wolo na wo maŋe de kaanem o pa Baŋa Wɛ to mo kotu lage se o ma o gwoni o ni dem, o nam wó ja varem wom o vo kaanem tu wom tei ne mo. 12Kaanem tu wom ná nii varem wom na jege lam tei to, o wó ta o bere nɔɔno wom o na wó ŋwe bagera to. O nam ná tage tei, ko zege konto mo. 13Varem wom tu nam ná lage se o jwoori o yeigi o varem wom, se o ŋwe varem wom sabu kom, ye o ta woli sabu kom popɔra dedoa senu maama wone.
14Nɔɔno nam ná kwei o sɔŋɔ se o ke-ko Baŋa Wɛ jeŋa ne, kaanem tu mo wó yi da se o nii ko dunni na mae tei to. Kaanem tu nam ná bere ko sabu se ko taa ye tei, ko zege konto mo. 15Sɔŋɔ kom tu nam ná lage se o jwoori o yeigi-ko, se o ŋwe ko sabu kom, ye o ta woli sabu kom popɔra dedoa senu maama wone. O ná ke konto, sɔŋɔ kom wó jwoori ko taa ye o nyem.
16Nɔɔno wolo ná fɔge o nabaara tega wone se o ke-ka Baŋa Wɛ jeŋa ne, ba wó jeeli ka kwora se ko maŋe de wo-dwa na wó maŋe tei se ba du ka wone to mo. Ba wó maŋe lu-nyenno sabu-dala finnu mo mena ywollu tetɔ maama ŋwaane. 17Ko ná ye wonnu yirim bene dem wone mo kotu kwei tega kam o pa Baŋa Wɛ, o wó ŋwe ka sabu jeelim maama na ye tei to mo. 18Se ko ná ye wonnu yirim bene dem kwaga ne mo o kwei-ka se o pa Baŋa Wɛ, ba wó jeeli ka sabu ni se ko maŋe de bena yagera ta na daare se wonnu yirim bene delo na beene to laam yi mo. Kotu bá ŋwe se ko yi ka sabu kom maama. 19Nɔɔno wom ná boŋe se o jwoori o yeigi o tega kam, se o ŋwe ka sabu kom, ye o ta woli sabu kom popɔra dedoa senu maama wone. O ná ke konto, tega kam wó jwoori ka taa ye o nyem. 20Kotu nam ná wo jwoori o yeigi-ka Baŋa Wɛ tei ne, ye o ná kwei-ka o yeigi o pa nɔɔno wodwoŋi, o daa ba jege chwoŋa se o jwoori o yeigi-ka. 21Wonnu yirim bene dem ná kaare de yi, ye ba lage ba kwei tega kam konto ba pa, ka wó yɔɔre ka ji wose mo Baŋa Wɛ ŋwaane. Ba jege se ba pɔɔre-ka ba pa Wɛ kaanem tiina se ba taa tei-ka taa wuu.
22Nɔɔno wolo nam ná kwei tega kalo na dae o nabaara tega ye o tete yeigi-ka nɔɔno wodwoŋi tei ne to mo se o ke-ka Baŋa Wɛ jeŋa ne, 23kaanem tu wom mo wó jeeli ka sabu ni se ko maŋe de bena yagera ta na daare se wonnu yirim bene dem yi to. Nɔɔno wom laam maa wó ŋwe ka sabu kom dɛ dem konto wone nɔɔ. Sabu kom konto ye Baŋa Wɛ nyem mo. 24Wonnu yirim bene dem ná yia, se nɔɔno wom kwei tega kam konto o jwoori o pa o na yeigi-ka wolo tei ne to, se wonto dwi dem taa tei-ka.#Chullu 25:8-55
25Sabu kom konto maama dunni jege se ko tɔge wara-jei sem maŋem chekke mo. Sɛkɛle dedoa maa ye gɛra kuni finlei.
26Nɔɔn-nɔɔno ba jege se o kwei wo-kwea kalo o varem na loge to o ke Baŋa Wɛ jeŋa ne, ka na maŋe ka ye Baŋa Wɛ nyem to ŋwaane. Ko ná ye á naane dem wone, naa á pei sem wone, naa á bone dem wone, tento wo-kwe selo maama na ye wo-bɛ to ye Baŋa Wɛ nyem mo. 27Ko nam ná ye vara balo na wo maŋe de kaanem to wone wo-kwea, ka tu wom jege chwoŋa se o jwoori o yeigi-ka. O wó ŋwe ka sabu kom ye o ta woli sabu kom popɔra dedoa senu maama wone. Kotu nam ná wo jwoori o yeigi varem wom konto, ba jege chwoŋa se ba kwei‑o ba yeigi ba pa nɔn-gaa se ko maŋe de varem wom sabu na ye tei to.
28Wolo nam ná yɔɔre o kwei o woŋo kolo maama o ke Baŋa Wɛ jeŋa ne, ko ná ye o choro, naa o varem, naa o nabaara tega mo, woŋo kom konto yɔɔre ko ye wose mo Baŋa Wɛ ŋwaane. Nɔɔno wom daa ba jege chwoŋa se o jwoori o yeigi-ko, naa o kwei-ko o yeigi o pa nɔn-gaa, ko na ye Wɛ nyem taa wuu to ŋwaane.
29Ba nam ná pɔɔre nabiinu wolo ba yɔɔre ba ke Wɛ jeŋa ne chɔgem ŋwaane, chwoŋa daa tera se ba jwoori ba yeigi konto tu Baŋa Wɛ tei ne. Ba jege se ba go‑o mo.
30Tega kam wodiu popɔre fuga maama wone popɔra dedoa ye Baŋa Wɛ nyem mo, ne ko ná ye wodiiru, naa tio-bia de. Abam nam wó pɔɔre-ko se ko taa ye wose Baŋa Wɛ ŋwaane.#Nia Gulim 14:22 31Nɔɔno nam ná boŋe se o jwoori o yeigi wodiiru tento telo, se o ŋwe te sabu kom ni ne ye o ta woli sabu kom popɔra dedoa senu maama wone. 32Sɔŋɔ vara fuga maama wone dedoa ye wose mo Baŋa Wɛ ŋwaane. Nam jeeli-na á vara bam maama se á le wolo na ye fuga tu maama to á pa Baŋa Wɛ. 33Abam ba jege se á paale á kuri á vare-ŋona de á vare-balwaaro wone, naa se á leiri balo á na maŋe á le to yuu ne. Abam ná kwei varem se á leiri wodwoŋi yuu ne á pa Baŋa Wɛ, vara balei bam maama nam wó taa ye Baŋa Wɛ nyem mo. Á ba jege chwoŋa se á jwoori á yeigi-ba de sabu.”
34 Baŋa Wɛ déem zege Sinayi peo kom yuu ne mo o ta o nia yam konto o bere Moses Isarele tiina bam ŋwaane.
Currently Selected:
Chullu 27: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
