Chullu 25

Bena yarepɛ bene dem

Nwoŋim 23:10-11; Nia Gulim 15:1-11

1Moses déem na wo Sinayi peo kom yuu ne to, Baŋa Wɛ ma ta ded‑o o we:

2“Ta de Isarele tiina bam we: Abam ná zo tega kalo amo Baŋa Wɛ na lage a pa abam se á ta‑á tei to wone, se á pa tega kam sii bene delo maama na ke yarepɛ to wone. 3Kwei-na bena yaredo se á du á kadwi, de á kare sem wone. Nam ta fɔge-na á kwɛ á Vini teeni, se á daare á la á wodiiru á zo diga bena yaredo wone. 4Se ko ná ye bena yarepɛ bene dem, yage-na tega kam se ka de sii. De wó taa ye siu bene mo de pae Baŋa Wɛ. Yé du-na á kadwi de á kare wone, nam yé kwɛ-na á Vini teeni dem. 5Ko ná ye wodi-twaro telo na ke te tete yerane to, yé la-te á ja á zo diga. Ta yé gwori-na Vini tio-bia balo teeni dem na leiri de tete yerane to. Bene dem maama wone, tega kam wó yɔɔre ka sii mo. 6De ko de, ka ta wó ke wodiiru ka pa abam, pa se abam tete, de á kabɛ, baara de kaana maama, de balo á na jene se ba toŋe ba pa abam to, de veira balo na zoore abam tei ne to, 7de á sɔŋɔ vara, de kago-vara maama di te wone mo. Á jege chwoŋa se á di wodiiru telo maama tega kam na ke to.

Wonnu yirim bene dem

8Yeini á jeeli bena yarepɛ yarepɛ kuni berepɛ, se bena finna-nogo kɛ.#Chullu 27:17-24 9Bena finnu bene dem ne, ko ná yi chane serepɛ chana kam da fuga dɛ ne, á wó pa se ba taa kare tega kam jei maama ne ba wui nabwanno. Wɛleera saarem dɛ dem ne mo á wó ke konto. 10Abam wó pɔɔre bene dem konto se de taa ye de yera Wɛ ŋwaane. Á wó taa kare tega kam maama ne á tɔɔle á bere nɔɔna maama we wonnu yirim bene dem mo yia. De ye ywoni dim bene mo de pae abam. Abam wolo maama ya ná kwei o nabaara tega o yeigi, se kotu jwoori o taa tei-ka. Ba ná yeigi wolo se o ji kabaa, se kotu de jwoori o chorro tei zɛɛra. 11Bena finnu bene dem na ye ywoni dim bene de pae abam to ŋwaane, yé du-na á kadwi de á kare wone, nam yé la-na wodi-twaro á ja á zo diga. Ta yé gwori-na Vini tio-bia balo teeni dem na leiri de tete yerane to. 12Bene dem konto maama ye de yera mo Wɛ ŋwaane. Nam di-na á kadwi de á kare wodiiru telo na ke te tete yerane to.

13Wonnu yirim bene dem konto wone, abam wolo maama ya ná kwei o nabaara tega o yeigi, se kotu jwoori o taa tei-ka. 14Konto ŋwaane abam ná lage á yeigi tega á pa daane, nam lɔre-na se á yé pini daane. 15Nmo ná boŋe se n yeigi tega n dwoŋi tei ne, se n jeeli ka sabu se ko maŋe de bena yalo na maŋe ya kɛ ya gaale wonnu yirim bene dem to. N dwoŋi wom maa wó jwoŋi sabu se ko maŋe de bena yalo ta na daare se á ta‑á zage wodiiru ye wonnu yirim bene dem daa yi to. 16Bena yalo na daare to ná daga, se tega kam sabu ke ko ke yiga ne. Wonnu yirim bene delo nam daa na beene to ná twɛ se de yi, se á pa sabu kom tu tega. Kokuri to, tega kam tu lage o yeigi wodiiru zagem bena mo o pa o dwoŋi wom. 17Ta‑á kɔre-na á Tu Wɛ wom, se á yé pini daane. Amo mo ye abam Tu Baŋa Wɛ wom.

18Nam tɔge-na amo nia yam, de a bera yam maama se á ta‑á ke-ya. Konto wó pa se á ta‑á zoore tega kam wone de wo-zuru. 19Tega kam de nam wó ke wodiu lanyerane ka pa abam, se á ta‑á di á sui ye á jege yazura.

20Nɔɔno nam wae o bwei we, ‘Bɛ mo dé nam wó di bena yarepɛ bene dem wone, ye dé ba jege chwoŋa se dé du tega ne, dé maa dae se dé zage wodiu dé zo diga?’ 21Ko na ye tei to, amo Baŋa Wɛ wó swɛ tega kam swolim pa se bena yaredo bene dem wone, abam kare sem, de á kadwi sem ke wodiu kolo na wó yi bena yatɔ to. 22Bena nana bene dem ná yia ye á lage á du tega kam ne, á ta wó ta‑á jege wodiu kolo á na zage bena yaredo bene dem wone to á di. Á ta wó di wodiu kom konto se ko yi bena nogo bene dem wodiiru zagem maŋa kam.

23Abam dae se á kwei tega á yeigi á pa nɔɔno se kotu taa tei-ka taa wuu. Tega kam ye amo Baŋa Wɛ nyem mo. Abam ye veira mo amo na sɛ se á ta‑á jege-ka á toŋa. 24Á ná jege tega jei selo maama ne ye á yeigi-ka á pa daane, chwoŋa wó taa tigi mo se tega kam tu jwoori o yeigi-ka.

25Yiniga ná tiini ka ja abam wolo, pa se konto tu kwei o tega o yeigi, o yera nɔɔno wolo na maŋe se o nii‑o to wó jwoori o yeigi tega kam se ba taa tei-ka.#Ruf 3:12 26Yiniga tu nam ná kwei o tega o yeigi, ye o ná ba jege yera nɔɔno se kotu jwoori o yeigi-ka, kotu jeŋa ná tu ka gara pa se o boŋe se o jwoori o yeigi o tega kam o ya na kwei-ka o yeigi o pa wolo to tei ne, 27o jege chwoŋa se o ke konto. O nam wó jeeli bena yam se ko zege maŋa kalo o ya na yeigi-ka o pa nɔɔno wom to, ye o laam ŋwe tega kam sabu o pa‑o se ko maŋe de bena yalo ta na daare to. O daa maa wó jwoori o taa tei tega kam. 28Kotu nam ná ba jege sabu se o ŋwe ne ko na maŋe tei to, wolo na yeigi tega kam o tei ne to nam mo wó taa tei-ka se ko yi wonnu yirim bene dem. Maŋa kam konto ne mo ba laam wó kwei tega kam ba jwoori ba pa ka tu.

29Wolo ná jege o sɔŋɔ teo kolo na lɔge ko pe to wone, ye o kwei-ko o yeigi o pa nɔɔno wodwoŋi, o jege chwoŋa se o kwei bene dedwe o jwoori o yeigi-ko nɔɔno wom tei ne. 30Bene dedoa nam ná kɛ, ye kotu ná ware se o jwoori o yeigi o sɔŋɔ kom, chwoŋa daa tera se o jwoori o yeigi-ko. Ko lɛɛre ko ye wolo na yeigi-ko to de o dwi dem nyem mo se ko taa vei wuu. Wonnu yirim bene dem ná yia, sɔŋɔ kom daa bá jwoori ko ji wolo na yeigi-ko o pa to nyem. 31Ko daare sam na wo te-balwa balo na wo lɔge ba pe to wone, dento kikia nye de tega yeiga na ye tei to mo. Wolo ná kwei o sɔŋɔ kom konto o yeigi, kotu jege chwoŋa se o jwoori o yeigi-ko maŋa de maŋa. Ko maa ná yi wonnu yirim bene dem, ba wó jwoori ba kwei-ko ba pa kotu mo.

32Ko nam ná ye Levi dwi tiina na zoore teene delo wone to, Levi dwi tu wolo ná yeigi o sɔŋɔ o pa nɔɔno wodwoŋi, kotu jege chwoŋa se o jwoori o yeigi-ko nɔɔno wom tei ne maŋa de maŋa. 33Ba ná yeigi sɔŋɔ kolo maama na wo Levi tiina teene dem wone to, chwoŋa wora se ba jwoori ba yeigi-ko maŋa de maŋa. Wonnu yirim bene dem ná yia, sɔŋɔ kom wó jwoori ko ji Levi dwi tu wom nyem mo. Kokuri to, sam delo na wo Levi dwi tiina teene dem wone to yerane mo ye banto jejegero Isarele dwi tiina tega kam maama wone. 34Ko daare ko ná ye vara pwoli selo na kaare Levi tiina teene dem to, chwoŋa tera se ba kwei-se ba yeigi. Tega kam konto ye ba nyem mo se ko taa vei wuu.

Yiniga tiina wolim taane

35Abam chorro Isarele tiina bam wolo ná ware se o nii o tete baŋa ne o yiniga ŋwaane, se á woli kotu ne á na wó ke tei de veira balo na zoore abam tei ne to. Konto wó pa se o de wane o zo de abam. 36Nmo ná jene sabu n pa yiniga tu, se n yé pa se o ŋwe sabu-daŋɔ o pa‑m. Nam kɔre-na á Tu Wɛ wom! Woli-na á dwonna bam se ba taa zoore á tei ne. 37Ko dae se á dɔne nyɔɔre á chorro tem baŋa ne de á na jene kolo maama á pa-ba to, ne ko ná ye sabu, naa wodiu de.

38Amo mo ye abam Tu Baŋa Wɛ wom. A déem jaane abam a nwoŋi Ejipti ne se a daare a pa abam Kanaan tega kam, se a taa ye abam Tu Wɛ wom mo.

39Abam chorro Isarele tiina bam wolo yiniga ná jaane‑o pa se o kwei o tete o yeigi o pa‑m se n ta‑n tei‑o, ko dae se nmo pa o taa toŋa o pa‑m ne kabaa tei. 40Yage se o taa zoore nmo tei ne, ne o ye veiru naa wolo n na jene se o toŋe o pa‑m to. O nam wó taa toŋa o pa‑m se ko taa nii wonnu yirim bene dem maŋa mo. 41Bene dem konto ná yia, se n yage o de o bia se ba viiri. O wó jwoori o sɔ-yuu tiina bam tei mo se o taa zoore o nabaara tega kam baŋa ne. 42Chega to, Isarele tiina bam ye amo Baŋa Wɛ tontoŋena mo. Amo mo jaane-ba a nwoŋi Ejipti wone a ba ywo-seeni. Konto ŋwaane ko dae se nɔɔno yeigi-ba ne kabɛ tei to. 43Yé bɛɛse-ba-na! Nam kɔre-na á Tu Wɛ wom se á ta‑á sɛ o ni.

44Abam nam jege chwoŋa se á vo teene delo na gilimi abam to wone á yeigi kabɛ, á pa á tete. 45Ko ta ná ye dwi-gɛ tiina balo na tu ba zoore abam jei sem ne to, de ba bia, á ta jege chwoŋa se á yeigi-ba se ba ji á kabɛ se á ta‑á tei-ba. 46Á ná tega á daare-ba, á wó wane á pa se ba ji á bia kabɛ, se ba toŋe ba pa banto de se ko taa vei ba toone. Ko daare ko ná ye á chorro Isarele tiina bam, yé bɛɛse-ba-na.

47Dwi-gɛ tu wolo na zoore abam jei sem ne to ná duni, ye yiniga ná jaane Isarele tu wodwoŋi pa se o kwei o tete o yeigi o pa dwi-gɛ tu wom naa o sɔŋɔ tiina, 48chwoŋa wora se ba jwoori ba yeigi Isarele tu wom veiru wom tei ne. Isarele tu wom choro mo wó jwoori o yeigi‑o. Ko ná ye o nyaane, naa o zembaaro, 49naa o kwo choro, naa wonto bu, naa o yera nɔɔno wodwoŋi mo, banto jege chwoŋa se ba jwoori ba yeigi‑o se o taa tei o tete. Ko nam dáa ná dae konto, kotu jeŋa ná tu ka gara, o wó wane o jwoori o yeigi o tete. 50Kotu wó jeini de wolo na yeigi‑o to, ye ba jeeli bena yam se ko zege maŋa kalo o na yeigi o tete to, se ko yi wonnu yirim bene delo na wó ba to. Sabu kolo kotu na wó ŋwe to jege se ko maŋe de ba na yeini ba jene nɔɔna ba toŋe ye ba ŋwe-ba tei to mo. 51Bena dedɛ nam ta ná dɔra se wonnu yirim bene dem yi, nɔɔno wom wó jwoori o ŋwe se ko maŋe de konto mo o pa veiru wom. 52Bena yalo na daare to nam ná ba daga, se o jwoori o ŋwe sabu fenfee ne ba na jeeli-ko tei to.

53Kotu ta ná wo veiru wom tei ne o toŋa, veiru wom jege se o ke‑o ne ba na jene nɔɔno bene de bene wone pa se o toŋe tei to mo. Yé sɛ-na se veiru wom taa jege Isarele tu wom o bɛɛsa. 54Nɔɔn-nɔɔno ná wo wane se o tɔge chwei sento maama wone se o jwoori o yeigi o dwoŋi Isarele tu, wonnu yirim bene dem ná yia, ba nam jege se ba yage Isarele tu wom se o de o bia viiri zɛɛra mo.

55Isarele tiina bam ye amo Baŋa Wɛ tontoŋena mo. Amo mo jaane-ba a nwoŋi Ejipti wone. Amo mo ye abam Tu Baŋa Wɛ wom.”

Currently Selected:

Chullu 25: KBG

Highlight

Copy

Compare