Josua 6
6
1Jeriko teo kom maama déem pe mo ko zega Isarele tiina bam ŋwaane. Nɔɔna daa ba jege chwoŋa se ba zo teo kom wone naa ba nwoŋi pwooni. 2De konto maama, Baŋa Wɛ ta tage de Josua mo o we, “Amo kwei Jeriko teo kom, de ko pɛ, de o jar-keira bam maama a ke nmo jeŋa ne. 3Abam maama de á jar-keira bam jege se á vo mo á kaare teo kom bedwe dɛ maama, se ko yi da yaredo. 4Kaanem tiina barepɛ mo wó taa jege nabwanno ba tɔge Wɛ ni-gwonim dakaa kam yiga ne ba kɛa. Da yarepɛ dɛ dem ne, á wó vo á kaare teo kom kuni berepɛ mo, ye kaanem tiina balo na zei nabwanno tem to de maa wó taa wui-te. 5Kaanem tiina bam wó ba ba tiini ba wu nabwanno tem ba dáane. Ko ná ke konto, se n pa nɔn-kɔgɔ kom laare de tiguri-kaasa, se teo kom kabiri-dɛɛro tem wó to tega ne buri-buri. Nɔɔna bam maama laam wó duri ba yɔɔre ba zo teo kom ba jage jei maama.”
6Nun bu Josua ma bwoŋi kaanem tiina bam ye o ta-ba o we, “Kwei-na Wɛ ni-gwonim dakaa kam á zeŋe. Ta kuri-na kaanem tiina barepɛ se ba taa wo ni-gwonim dakaa kam yiga ne ba taa zei nabwanno.”
7O ma daare o pa nɔɔna bam maama ni we, “Ta‑á vei á kaare teo kom na. Jar-keira bam nam mo wó taa wo Wɛ ni-gwonim dakaa kam yiga ne.”
8Josua na yɔɔre o ŋɔɔne de nɔɔna bam o ti to, mo kaanem tiina barepɛ bam kwei ba nabwanno terepɛ tem ba wui ye ba via. Kaanem tiina badwonna ma zeŋe Baŋa Wɛ ni-gwonim dakaa kam ba tɔge ba kwaga. 9Jar-keira bam maa wo Wɛ ni-gwonim dakaa kam kwaga ne ye ba badwonna de wo kaanem tiina bam yiga ne. Kaanem tiina barepɛ bam ma yɔɔre ba jege ba nabwanno tem ba wui.
10Josua nam ya pɛ nɔn-kɔgɔ kom ni mo o we, “Nɔɔn-nɔɔno ba jege se o bage tiguri-kaasa, nam yé ŋɔɔne-na taane á bere daane, se ko taa nii maŋa kalo amo na wó bere abam we á ke tei maama to!” 11Ba ma sɛ Josua ni dem maama, ye ba zeŋe Wɛ ni-gwonim dakaa kam ba kaare teo kom ni bedwe. Ba na kaare bedwe konto to, ba laam ma jwoori ba na chwi ba vwoa yam mɛ to ba peini se tega poore.
12Josua ma zaŋe te-pora ni ne, ye kaanem tiina bam de daa kwei Wɛ ni-gwonim dakaa kam ba zeŋe. 13Kaanem tiina balo de na jege nabwanno tem to tɔge dakaa kam yiga mo ye ba wui-te. Jar-keira bam de ma tɔge dakaa kam kwaga, ye badwonna wo kaanem tiina bam yiga ne. Maŋa kam konto maama ne, kaanem tiina bam lɛɛre ba wui ba nabwanno tem mo. 14Da yalei dɛ dem ne nɔn-kɔgɔ kom maama de ma saŋe ba kwaga ba vo ba kaare teo kom ni bedwe, ye ba laam jwoori ba vwoa yam ne. Ba ke konto mo taa, se ko yi da yaredo.
15Da yarepɛ dɛ dem ne, Isarele tiina bam gwoni tega mo ba zaŋe. Ba ma tɔge naga kalo ba na yeini ba tɔga ba kaare teo kom to. Dento dɛ dem ne ba za kaare kuni berepɛ mo. 16Kaarem berepɛ tu wom baŋa ne, mo kaanem tiina bam wugi nabwanno tem ba dáane. Josua de ma pa ni o we, “Laare-na de tiguri-kaasa, kokuri Baŋa Wɛ mo kwei teo kom o ke á jeŋa ne! 17Teo kom de kolo maama na wo ko wone to ye Baŋa Wɛ nyem mo. Zwɛ-na te maama á pa‑o. Ka-bworo Rahaba, de balo na wo o sɔŋɔ kom ne to yerane mo wó lu. Kokuri wonto mo ye wolo na seigi dé na toŋe balo se ba ŋɔ ba nii tega kam to. 18Wonnu maama teo kom ne to zege se á yɔɔre á chɔge-te mo. Konto to, yé kwei-na teo kom kolokolo, se á ná ke konto, á de wó da á na chɔgem mo. Ko kwaga ne, á wó ja cham á ba á pa Isarele tiina bam maama. 19Teo kom sabu-seŋa dedaane lu-nyenno de ko channa de ko luuru tem maama ye Baŋa Wɛ nyem mo. Tento maama ye se á la-te mo á pa Baŋa Wɛ.”
20Nɔɔna bam na yɔɔre ba ni nabwanno tem kwori to, mo ba tiini ba laare tiguri-kaasa. Jeriko kabiri-lilirru tem ma to tega ne maama vim! Nɔɔna bam maama ma duri ba zo teo kom wone ba jwoŋi-ko ba tei. 21Ba ma kwei teo kom maama ba pa Baŋa Wɛ ye ba ma se-zɔɔro ba go nɔɔna balo maama na wo ko wone to. Baara, de kaana, de nɔn-kwe, dedaane nɔn-donno, wolowolo wo daare. Ba ta ma chɔge varem dwi maama, naane de pei de bonɛ maama.
22Josua ma ta nɔɔna balei balo ba déem na toŋe se ba ŋɔ ba nii teo kom to o we, “Véi-na ka-bworo kom sɔŋɔ, se á kwei ni delo á na gwoni o yiga ne to. Véi á ja-na wonto, de o sɔŋɔ tiina maama á ba ywo-seeni.” 23Nɔn-donno telei tem ma vo ba ja Rahaba de o nu de o kwo, ko woli de o dwi delo maama na zoore ded‑o to ba ja ba nwoŋi.#Josua 2:13 Ba ma pa ba jeini ba twɛ de Isarele nɔɔna bam maama na wo mɛ to.
24Isarele tiina bam ma zwɛ teo kom dedaane kolo maama na wo ko wone to. Teo kom sabu-seŋa dedaane lu-nyenno de ko channa de ko luuru tem maama, ba ma la tento ba pa Baŋa Wɛ. 25Se ko ná ye ka-bworo Rahaba, ko dɛ chwoŋa kanto mo ye Josua woli pa se o de o diga kam daa wo tege nenɛɛne Jeriko nɔɔna bam. Wonto déem mo seigi nɔɔna balo Josua na toŋe se ba vo ba ŋɔ ba nii teo kom to. O ma lɛɛre o zoore dedaane Isarele tiina bam se ko yi zem maama.
26Kanto maŋa kam ne Josua ma zege o du duuri dento o we, “Baŋa Wɛ wó pa se wolo maama na boŋe se o jwoori o lɔ Jeriko teo kom to na o lɛɛro.
Kotu bu-kwea mo wó te
se teo kom biri-beira laam zege.
Se wolo maama na wó ke ko bworru-kamuna yam da to
de ga o jeŋa bu.”#1 Pwa 16:34
27 Baŋa Wɛ déem maa wo Josua tei ne maŋa maama. O yere ma zaŋe jei sem maama ne.
Currently Selected:
Josua 6: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
