Josua 5

Isarele tiina pein-gwoŋa kam

1Amori tiina pwa bam déem wo Jɔdan buga kam wɛ-zoore seeni mo, ye Kanaan tiina pwa bam de zoore Mediterania naneo kom nia yam ne. Banto maama ma ni we Baŋa Wɛ pɛ se Jɔdan buga kam we mo pa se Isarele tiina bam bɛ. Ba na nigi konto to, ba vɔna maama ma pare, ye ba nagwola te. Ba daa ba lage se ba jeeri Isarele tiina bam de jara.

2Kanto maŋa ne mo Baŋa Wɛ tage de Josua o we, “Ke fane se n ma n gwoni Isarele tiina balo na daare to peina.”#Pulim 17:10-11 3Josua ma seene o ke fane ye o gwoni nɔɔna bam peina zwoŋo kodwoŋi yuu ne, ko yere mo Gibeaf-Haaralof.

4Ko déem ye fefeo mo se Josua gwoni nɔɔna bam peina, kokuri baara balo na bege ba yi jara keim ye ba de da ba nwoŋi Ejipti teo kom ne to maama tege kagoa kam yuu ne mo. 5Balo maama nam na tɔge ba nwoŋi Ejipti ne to mo gwoni ba peina, se ko ná ye balo maama ba na loge kagoa yuu ne, maŋa kalo ba na beeri ka wone to, banto peina wo gwoni. 6Isarele tiina bam nam ya kare kagoa kam yuu ne mo ba beera bena finna. Ba déem ke konto mo se ko taa nii maŋa kalo nɔn-kweero telo na dɛ ba zege Ejipti ne ba nwoŋi ye ba yi jara keim to maama na tege ba ti to. Banto déem ve Baŋa Wɛ ni mo pa se o du duuri we, ba bá da ba zo tega kalo o na gwoni ni se o pa debam, ye ka tiini ka ywomma de varem de kɔnɔ to.

7Josua gwoni nɔɔna bam konto bia peina mo. Banto mo leiri ba kwoa yuu ne. Ba peina nam ya ta wo gwoni, ba na loge-ba kagoa kam yuu chwo-veili dem baŋa ne to ŋwaane. 8Nɔɔna bam na gwoni ba peina yam konto to, Isarele kɔgɔ kom ma maŋe dáane pa ba ŋɔna yam jei.

9 Baŋa Wɛ laam ma ta de Josua o we, “Amo zem lɔɔre Ejipti teo chaveera yalo maama ya na wo abam baŋa ne to a yage dáa ne.” Isarele tiina bam ma bwoŋi jei sem konto yere we Giligal#5:9 Giligal kuri mo ye Ba lɔɔre ba yage.. Dedaane zem maama, ba ta bwoi yere dem konto mo.

10Isarele tiina bam déem ma chwi ba vwoa yam Giligal na wo Jeriko te-kampare laŋa kam ne to. Ba na wora to, ba maama ma di Atɔgebabaŋa kuri dem. Ba di-de boboa chana kam da fuga-yana dɛ dem ne mo se ko maŋe de chana kalo ba na nwoŋi Ejipti ne to. 11Ba na di Atɔgebabaŋa kuri dem ba ti ye tega poore to, mo ba bobo se ba di tega kam wodiiru. Ba déem di bworobworo kolo na ba jege sabɔle ko wone to, de mena yalo ba na wɔge to mo. 12Dento dɛ dem ne, ba na di tega kam baŋa wodiu to, mo Baŋa Wɛ chege se Manna yam daa yé zege wɛɛne ya to se Isarele tiina bam pɛ.#Nwoŋim 16:35 Ko na zege kanto maŋa ne to, Isarele tiina bam laam lɛɛre ba di Kanaan tega kam wodiiru mo.

Isarele tiina bam di Jeriko

13Dɛ dedwe Josua na twɛ Jeriko to, mo o tole o na nɔɔno na zege o yiga ne. Kotu zei se-zɔɔ mo o jeŋa ne. Josua ma fɔɔre o yi nɔɔno wom tei ye o bwei‑o o we, “Nmo tɔge n woli debam kɔgɔ kom wone mo naa n woli dé dona bam wone mo?”

14Nɔɔno wom ma leiri‑o o we, “Amo ba tɔge á wolowolo! Chega ŋwaane to, amo mo ye Baŋa Wɛ jar-keira bam yiga tu. Konto ŋwaane mo a nam tu ywo-seeni.”#Nwoŋim 23:23; Lei 24:8

Josua na nigi konto to, mo o to o vwi o yibia tega ne ye o jɔɔne‑o. Josua ta ma ta ded‑o o we, “Amo tu, a ye nmo tontoŋeno mo. Ta n bere-ne kolo a na jege se a ke to.”

15 Baŋa Wɛ jar-keira yiga tu wom laam ma ta ded‑o o we, “Le n natera yam, se nmo na zege mɛ to ye wose mo.” O ma seene o ke konto.

Currently Selected:

Josua 5: KBG

Highlight

Copy

Compare