Josua 7

Akane na ke wɛleere delo to

1Isarele tiina bam déem toŋe vwa mo wonnu telo Baŋa Wɛ na we te maŋe de chɔgem to baŋa ne. Akane déem mo ŋɔge wonnu tem tedwonna. O déem ye Karimi bu mo, ba maa ye Zabidi diga tiina. Ba ta ye Judah dwi dem nɔɔna mo na ye Zera sɔ-yuu tiina. Akane kikia yam ŋwaane mo Baŋa Wɛ bane zaŋe de Isarele tiina maama.

2Josua ma zege Jeriko ne o toŋe nɔɔna badwonna se ba vo ba ŋɔ ba nii Ayi teo kom na ye tei to. Ko déem wo Bɛtel wɛ-puli seeni mo se ko maŋe dedaane Bɛte-Aven.

3Ba ma vo ye ba jwoori ba ta dedaane Josua ba we, “Teo kom konto ye te-balaŋa mo. Dé ná jaane nɔɔna morro telei naa morro tetɔ dé vo se dé jeeri-ba, dé wó di-ba. Yé toŋe kɔgɔ kom maama.” 4Konto ŋwaane, ba déem le nɔɔna morro tetɔ mo pa ba vo se ba jeeri Ayi tiina bam. Ayi tiina bam ma wane Isarele tiina bam ba di pa ba pipiri ba duri. 5Ba zege ba teo kom manchwo-peena ni ne ba de Isarele tiina bam, se ko yi peero tem laŋa. Ba ma go Isarele tiina bam nenɛɛne nɔɔna fintɔ-baredo zwoŋo kom teiŋa ne. Keim dem konto so Isarele tiina bam mo. Ba vɔna ma pare, ye foone zo-ba.

6Josua wo ma pɛ. O déem ma kaare o gwaaro, ye o daare o to o vwi o yibia tega ne. O déem ta bibili Wɛ ni-gwonim dakaa kam yiga ne taa, se ko yi dedaan-ni maŋa. Isarele nakwa bam de déem ke konto mo ye ba pɛ kasolo ba taare ba yuni maama. 7Josua laam maa we, “Tento maama ye bɛ? Yuu-tu Baŋa Wɛ, bɛŋwaane mo nmo jaane debam n bɛ buga kam n ba ywo-seeni? N lage n kwei debam mo n ke Amori tiina bam jeŋa ne na? Nmo we ba chɔge debam mo na? Debam ya ná maŋe Jɔdan buga daa kakam kam ne, ko ba gare tento na? 8Amo Teiru, kɔ mo amo daa jege se a ta, ye dé dona pa se dé pipiri dé duri tento? 9Kanaan tiina bam dedaane dwia yalo maama na zoore ywo-seeni to laam ná nigi tento, ba wó na baare se ba ba ba gilimi debam ba ke tetare ne. Ba laam maa wó pa se dé yere jei tega baŋa ne. Konto ná kea, nmo yere-kamunu nenɔŋ-fɔrɔ kom nam daa bɛ?”

10 Baŋa Wɛ ma ta Josua o we:

“Zaŋe wɛɛne! Ko ke tetɛ mo ye n vwi n yibia tega ne konto? 11Isarele tiina bam mo tusi, ye ba ve ni-sɛɛm delo na wo amo de banto tetare ne to. Ba ma ŋɔ wonnu telo a na we te ye amo nyem to. Ba ŋweene dem kwaga ne, ba ta fɔge vwa. Ba ta daare ba kwei wonnu tem konto ba woli ba tete wonnu wone. 12Konto ŋwaane nam pa se á duri á dona bam yiga ne. Lɛɛro nam wo Isarele yuu ne ye ba maŋe de chɔgem. Abam nam ná wo chɔge wonnu telo ya na ye se te chɔge ye á kwei-te to, amo daa bá taa wo á tetare ne.

13Zaŋe n vo n ta se nɔɔna bam kwɛ ba tete se ba jwa jeeri-ne! Kokuri Isarele tiina Baŋa Wɛ wom tage tento mo: ‘Abam kwei wonnu telo na jege se te taa ye Baŋa Wɛ nyem to mo á woli á wonnu wone. Abam nam ná wo le-te á wonnu tem wone, á bá wane á dona bam á di.’

14Abam kɔgɔ kom maama jwa wó jeeri Baŋa Wɛ yiga ne. Baŋa Wɛ maa wó le Isarele dwi delo na tusi to. Dwi dem laam maa wó nwoŋi sɔ-yuu de sɔ-yuu se Baŋa Wɛ le sɔ-yuu kolo na tusi to. Sɔ-yuu kom de wó nwoŋi mo diga maama wone, se Baŋa Wɛ le diga kalo na tusi to, ye diga kam konto de laam ma nwoŋi nɔɔno dedoa dedoa, se Baŋa Wɛ le wolo na tusi to. 15Ba ná nɛ nɔɔno wolo na ŋɔge wonnu telo á na jege se á chɔge to, ba laam wó zwɛ kotu mo. Ba ta jege se ba ja o yera woŋo maama mo ba woli da ba nwoŋi ba zwɛ. Kokuri, o tiini o ke wo-balɔrɔ mo na dae se ko ke Isarele ne. O chɔge ni-sɛɛm delo Wɛ de o nɔɔna bam na ke daane to mo.”

16Tega na poore to, Josua ma pa se Isarele tiina bam nwoŋi se Wɛ le dwi delo na tusi to. Judah dwi dem mo ba déem le. 17Judah dwi dem ma nwoŋi sɔ-yuu de sɔ-yuu. Ba ma le Zera sɔ-yuu kom. Zera di sem na bobo se te nwoŋi to, Zabidi diga kam mo ba le. 18Zabidi diga kam nɔɔna bam ma nwoŋi nɔɔno dedoa dedoa ye ba le Karimi bu Akane.

19Josua laam ma ta de Akane we, “Amo bu, nmo zege Baŋa Wɛ wom na ye Isarele tiina Wɛ to yiga ne mo. Konto to, pa‑o zula se n daare n ta chega. Ta n keim dem maama jaja n bere-ne, se n yé seigi kolokolo amo yiga ne.”

20Akane ma leiri‑o o we, “Amo seene a tusi a chɔge Baŋa Wɛ wom na ye Isarele tiina Wɛ to yiga. Amo nam ke tento mo: 21Dé na zo se dé wane Jeriko to mo a nɛ gare-laao na nwoŋi Babilonia to, dedaane lu-nyenno sabu-dala bia yalei, ko ta woli de sabu-seŋa kandwɛ-dale na tiini de dumma de dwoi kilo chicheiro to. Amo fera ma tiini ya zo-te, pa se a kwei. Amo koge tega a vwei dem wone mo a seigi tento maama. Á wó na-te dáane ye lu-nyenno tem seigi te maama kuri ne.”

22Josua ma toŋe nɔɔna se ba vo o vwei dem ne ba buŋi ba nii ko ye chega mo na. Ba ma duri ba vo ye ba seene ba na wonnu tem maama na seigi da. Lu-nyenno tem seene te wo vwei dem tega ne, kuri kuri. 23Nɔɔna bam ma kwei wonnu tem vwei dem ne ba ja nwoŋi ba ba Josua dedaane Isarele tiina bam tei ne. Ba ma jale te maama Baŋa Wɛ yiga ne.

24Josua dedaane Isarele kɔgɔ kom maama déem ma ja Akane, ba woli de lu-nyenno tem, de gare-laao kom, de sabu-seŋa kandwɛ-dale dem, ko woli de o bia maama, bakeiri de busankane, ba ja ba tu Akore bwolo kom ne. Ba déem ta ma ja o bonɛ, de o naane, de o pei, ko woli de o vwei dem tete. O woŋo maama mo ba jaane ba woli da ba vo bwolo kom. 25Josua laam ma ta ded‑o o we, “Bɛŋwaane mo ye n ja cham dento n ba n pa debam? Baŋa Wɛ de nam wó pa cham yi‑m zem.”

Isarele tiina bam maama laam ma dole‑o de kandwa ba go. Ba déem ta dole o woŋo maama mo ba go. Ko kwaga ne, ba déem ma zwɛ wonto de o diga tiina bam de o wonnu maama. 26Ba laam ma tigisi kandwa o baŋa ne. Kandwa-dogela yam ta wora dedaane zem maama. Ko nam na zege kanto maŋa ne se ko yi zem to, ba jege jei sem konto ba bwoi we, Cham bwolo mo.#7:26 Cham-bwolo: Hiburu = Akore Ko ma pa se Baŋa Wɛ ban-lom dem to.

Currently Selected:

Josua 7: KBG

Highlight

Copy

Compare