Yiga tiina 7
7
Gideon kwaare jara de Midian tiina
1Tega na poore to, Gideon dedaane o jar-keira bam ma zaŋe zezeŋa ne ba vo ba chwi ba vwoa Haroda buli-yi dem seeni. Midian tiina bam déem wo baŋa seeni mo. Ba de ma chwi ba vwoa bwolo kolo na wo Morɛ zwoŋo kom teiŋa ne to wone. 2Baŋa Wɛ déem ma ta Gideon o we, “Nɔɔna balo na tɔge nmo kwaga to tiini ba daga. A ná di Midian tiina bam a pa‑m, nɔɔna bam wó taa jege kamunim ba pae ba tete we banto mo di-ba. Ba bá pa a na a zula. 3Konto to, ta n bere nɔɔna bam maama we, wolo ná fona, se kotu jwoori o viiri o daare debam.” Nɔɔna morro finlei-telei (22,000) ma jwoori sɔŋɔ, ye morro fuga (10,000) maŋe Gideon tei ne.
4 Baŋa Wɛ ta ma ta Gideon o we, “N nɔɔna bam ta tiini ba daga dedɛ.#1 Samuwel 14:6 Ja-ba n vo buga kam seeni se a pɔɔre balo na wó tɔge nmo to a pa‑m. Amo na wó ta wolo we, o da dede‑m se á vo á kwaare jara yam to mo wó vo, se a ná we wolo bá vo, kotu dae se o tɔge.”
5Gideon ma ja nɔɔna bam maama o vo buga kam. Baŋa Wɛ laam ma ta‑o o we, “Maane balo na wó lagese na bam nenɛɛne kukura na ke tei to, dedaane balo de na wó kuni ba nadwoona tega ne ye ba nyɔ na bam to, se n pɔɔre-ba daane.” 6Konto na ke to, nɔɔna bia yatɔ (300) déem mo mɛ ba je ba kase na bam ba nyɔ. Balo maama na daare to kuni dwoona mo tega ne ye ba nyɔ na bam.
7 Baŋa Wɛ laam ma ta Gideon o we, “Amo lage a tɔge nɔɔna bia yatɔ yanto baŋa ne mo a jwoŋi n nɔɔna bam maama a yage, se a daare a kwei Midian tiina bam a ke n jeŋa ne se n di-ba. Ta balo maama na daare to se ba jwoori sɔŋɔ.” 8Gideon déem ma pɔɔre nɔɔna bia yatɔ yam se ba taa wo o tei ne. O ma pa se Isarele tiina balo na daare to jwoori ba viiri. O déem ma jwoŋi ba zela dedaane ba nabwanno tem o pa balo na daare ba maŋe o tei ne to. Midian tiina bam nam ya tigi bwolo kom ne ye ba wo Gideon de o nɔɔna bam kuri seeni mo.
9Tete dem konto ne, Baŋa Wɛ ma ta Gideon o we, “Zaŋe n vo Midian tiina bam na tigi mɛ to n kwaare jara de-ba, se a lage a kwei-ba a ke n jeŋa ne mo. 10Nmo nam ná fona se n jeeri-ba de jara mo, se n zaŋe n tɔge dedaane n tontoŋeno Pura se á vo da á nii. 11Nmo ná yi ba tei ye n ni ba lara yam, nmo wó na baare se n jeeri-ba.” Gideon dedaane o tontoŋeno Pura ma da daane ba vo ba dona bam vwoa yam ni seeni. 12Midian tiina bam, dedaane Amaleki tiina bam, de wɛ-puli seeni nɔɔna bam maama ya jare ba tete mo bwolo kom tega ne, nenɛɛne kayere na tiini se yo tei to. Ba kona yam kɔgɔ de maa tiini ya gaale nenɛɛne naneo ni kasolo na daga tei to.
13Gideon déem yi da o maŋe, dedaane nɔɔno mo wora o tɛ o dendwɛ o bere o dwoŋi. Kotu maa we, “Amo dwɛ we bworobworo mo bibili ko zo debam na tigi mɛ tento to, ye ko laam mage vwei dedaane dam pa se de pipiri de pu tega ne.” 14O dwoŋi wom ma leiri‑o o we, “Konto maama tɛ Joasa bu Gideon se-zɔɔ kom taane mo. O ye Isarele tu mo, ye Wɛ pa‑o dam se o di Midian tiina dedaane debam jar-keira bam maama!”
15Gideon na nigi dendwɛ dem dedaane de kuri o ti to, mo o kuni nadwoona o zuli Baŋa Wɛ. O laam ma jwoori Isarele jar-keira bam na wo mɛ to, ye o ta-ba o we, “Zaŋe-na wɛɛne, se Baŋa Wɛ lage o pa se á di Midian tiina bam mo.” 16O déem ma pɔɔre o jar-keira bia yatɔ bam kuni betɔ. O ma pa nɔɔno maama nabɔnɔ. O ta ma pa se kotu zei mini ye kamɔgɔ laam kwoli-de. 17O ma pa ba maama ni o we, “Tɔge-na amo kwaga se á maane á nii amo na wó ke tei to. Amo ná yi dé dona bam tiga jei sem ni, ye a ke kolo maama, se abam de ta‑á nii-ne ye á daare á de ke konto. 18Amo dedaane balo na wo a tei ne to wó wu dé nabwanno tem. Abam ná nɛ konto, se á de wu á nabwanno tem á kaare dé dona bam tiga jei sem maama ne. Á laam maa wó laare wɛɛne we, ‘Baŋa Wɛ ŋwaane, dedaane Gideon ŋwaane!’ ”
19Ko déem na yi tete-koro maŋa kalo Midian tiina yerena bam na leiri daane to, mo Gideon dedaane nɔɔna bi delo na wo o tei ne to vei ba yi ba dona bam vwoa yam ni. Ba ma wu ba nabwanno tem, ye ba daare ba lɔ ba kamwaro tem ba na zei to. 20Gideon nɔɔna bam popɔra kuni betɔ kom maama déem mo wugi ba nabwanno, ye ba daare ba lɔ ba kamwaro tem. Ba déem ma zei mini ba jagwia seeni, ye ba nabwanno tem wo ba jazem seeni. Ba laam ma laare wɛɛne we, “Se-zɔɔ kom ye Baŋa Wɛ ŋwaane dedaane Gideon ŋwaane mo!” 21Nɔɔna bam maama maŋe mɛ ba na zege konto to mo ba kaare ba dona bam ba ke tetare ne. Ba dona bam maa kare ba chwoosi ye ba duri se ba lu.
22Maŋa kalo Gideon nɔɔna bam na jege ba nabwanno tem ba wui konto to, dedaane Baŋa Wɛ pɛ se ba dona bam mo kwei ba se-zɔɔro ba beeri da-jei se ba go. Midian tiina jar-keira bam déem kwei Zerera chwoŋa kam mo ba duri ba vo ba yi Bɛte-Sita. Ba ta ma yi Abel-Mehola na bwola dedaane Tabafa to. 23Isarele tiina balo na nwoŋi Nafitali dwi wone, de Asere dwi wone, de Manasɛ dwi dem maama wone to ma nwoŋi ba pare Midian tiina bam, ne ba na jwoŋi ni se ba ke tei to. 24Gideon déem ta toŋe nɔɔna mo Efrayim zwonnu laŋa kam maama ne se ba ta-ba we, “Nwoŋi-na á ke jara dedaane Midian tiina bam. Che-na Jɔdan buga kam dedaane bu-tole sem se ko yi Bɛte-Bara seeni. Yé pa-na se Midian tiina bam na pwola ba bɛ bwi sem.”
Efrayim tiina bam déem ma seene ba nwoŋi ba che Jɔdan buga kam de bu-tole sem nia maama, se ko yi Bɛte-Bara. 25Ba déem na zeili Midian tiina bam to, mo ba jaane ba yiga tiina balei. Oreba dedaane Zeebi mo konto. Oreba peo kom ne mo ba déem go Oreba, ye ba daare ba go Zeebi mɛ ba na nɔne Vini tio-bia to ye ba bwoi-ko we ‘Zeebi nɔnem jeiga’.
Ba déem ma gwoni Oreba dedaane Zeebi yuni tem ba le ye ba ja-te ba vo ba pa Gideon. Maŋa kam konto ne, dedaane Gideon zoore Jɔdan buga kam wɛ-puli seeni mo.
Currently Selected:
Yiga tiina 7: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
