Yiga tiina 6
6
Gideon yera Taane
1Isarele tiina bam déem daa ma toŋe lwarem ba chɔge Baŋa Wɛ yiga. O ma kwei-ba o ke Midian tiina jeŋa ne, ye ba pa se ko zo Isarele tiina bam yera bena yarepɛ. 2Midian tiina bam maa dana ba dwoi Isarele tiina bam ye ba tiini ba bɛɛse-ba. Konto ma pa se Isarele tiina bam yeini ba beeri jei ba seiga peero yuni ne, de te bɔɔna wone, de te gugworru telo maama wone. 3Isarele tiina bam déem ná yeini ba du ba wo-dwa, Midian tiina bam wó tɔge de Amaleki tiina dedaane dwia yalo maama na zoore wɛ-puli seeni to mo ba ba ba jeeri-ba de jara. 4Ba déem tui ba jei Isarele tega baŋa ne mo, ye ba jaane wodiiru telo maama Isarele tiina bam na dugi to ba chɔga. Ba ma jaane-te ba chɔge konto ba tega kam maama ne taa, se ko yi Gaza seeni. Ba ta ma yeini ba vere ba pei, de ba naane, dedaane ba bonɛ, pa se Isarele tiina bam daa ba jege ba ni-wodiu. 5Midian tiina bam yeini ba ja ba vara mo ba ba ye ba daare ba chwi ba vwoa dáane. Banto de ba kona yam ni déem ware ko ga ko ti. Ba maa wó yeini ba meeli tega kam maama nenɛɛne kayere tei to, ye ba deilimi-ka nywa! 6Ba ma pa se yini-gwia tiini ka ja Isarele tiina bam pa se ba kaase ba jare Baŋa Wɛ se o jwoŋi-ba o yage.
7Isarele tiina bam déem na dɛ Midian tiina bam kikia ŋwaane ba keeri ba jare Baŋa Wɛ konto to, 8o ma toŋe sampwora kadwoŋi se ka ja kwora kanto ka vo ka pa-ba:
“Amo, Isarele tiina Baŋa Wɛ wom mo we, amo mo jaane abam a ja a nwoŋi Ejipti teo kom ne ye a vere abam a yage á kabɛɛne dem ne. 9A ma jwoŋi abam Ejipti tiina bam jeŋa ne a yage. A ta ma jwoŋi abam a yage nɔn-dwoa balo maama na bɛɛse abam to jeŋa ne. Amo ma zeili á dona bam pa se ba nwoŋi ba daare ba tega kam ye abam laam tei. 10A ma ta de abam we, ‘Amo mo ye abam Tu Baŋa Wɛ wom. Konto to, á ba jege se á zuli jwona yalo Amori tiina bam na zula ye á laam wo ba tega kam ne to.’ Abam nam wo sɛ amo kwora kam.”
11 Baŋa Wɛ maleka kam ma vo ka jei tei-zɔŋɔ kom na wo Ofera ne to kuri ne. Ko ye Abizeri tu Joasa nyem mo. O bu Gideon maa zege da o fere banina#6:11 banina = wheat peo gwoŋo wone. Ba déem yeini ba nɔne Vini tio-bia mo gwoŋo kom konto wone. Gideon déem nam ke konto se o seigi mena yam Midian tiina bam yiga ne mo. 12Baŋa Wɛ maleka kam déem ma yi Gideon tei ne ka we, “Nmo tiini n ye bembea mo, ye Baŋa Wɛ de wo n tei ne.”
13Gideon ma leiri o we, “Amo tu, Baŋa Wɛ ná seene o wo dé tei ne, bɛ mo ye kikia yanto maama jege ya ke dé yera ne? Wo-kenkagela yalo dwi dé kwoa bam na maŋe ba bere debam we o toŋe ba tetare ne to daa wo yein-seeni mo? Ba déem ta bere debam we, Baŋa Wɛ mo jaane-ba o ja o nwoŋi Ejipti ne. Leile nam, Baŋa Wɛ dole debam mo o yage, o daare o ke debam Midian tiina bam jeŋa ne.”
14 Baŋa Wɛ tete déem laam ma pa Gideon ni o we, “Véi n ma n dam dento n na jege to n toŋe, se n jwoŋi Isarele tiina bam n yage Midian tiina jeŋa ne, se amo tete mo toŋe‑m.”
15Gideon ma leiri o we, “Amo Teiru, amo lage a ke tetɛ mo a jwoŋi Isarele tiina bam a yage? Debam diga kam mo tiini ka bwona Manasɛ dwi dem wone. Amo ta ma tiini a ye balaŋa dé diga kam nɔɔna maama wone.” 16Baŋa Wɛ ma leiri‑o o we, “Amo wó taa wo n tei ne, ye nmo wó chochoge Midian tiina bam maama nenɛɛne ba ye nɔɔno dedoa mo tei.”
17Gideon ma ta o we, “N yi ná seene de su amo kikia, se n ke wo-memaŋe n bere-ne. Konto wó pa se a lɔre we nmo Baŋa Wɛ mo ŋɔɔne de amo. 18Ja! Ta yé vei. Cheigi-ne se a vo a ja a pɛɛre a ba a pa‑m, se n laam kɛ.” Baŋa Wɛ de ma leiri o we, “Tɔ. A wó cheigi‑m, véi se n ba.”
19Gideon ma vo sɔŋɔ o saŋe bo-choa, ye o ta kwei muni kuriwaa bu dedoa o ma ke bworobworo kolo na ba jege sabɔle to. O ta ma ke nɔna yam tetɔgɔ wone ye o daare o lwo ya nyoa bam o ke kambia wone, o laam ja o vo o pa‑o tei-zɔŋɔ kom kuri ne.#Pulim 18:6-8
20Wɛ maleka kam ma ta ded‑o ka we, “Kwei nɔna yam dedaane bworobworo kom n daŋe peo konto yuu ne, se n daare n lwo nyoa bam te baŋa ne.” Gideon ma seene o ke konto. 21Baŋa Wɛ maleka kam nam ya zei nacheiga mo o jeŋa ne. O ma kwei nacheiga kam ye o ma ka ni dem seeni o dwei nɔna yam dedaane bworobworo kom. Peo kom déem ma ja mini, ye de zwɛ te maama. Baŋa Wɛ maleka kam déem ma jei.
22Gideon déem ma maane we, ko ye Baŋa Wɛ maleka mo o nɛa. Foone ma tiini de zo‑o ye o laare we, “Yuu-tu Baŋa Wɛ, amo nɛ nmo tete maleka kam jaja.” 23Baŋa Wɛ ma ta‑o o we, “Pa n bochare zuri! Yé ta‑n fona, se n bá‑n te.”
24Gideon déem ma lɔ bimbini se o ma zuli Wɛ jei sem konto ne, ye o bwoŋi-de we, ‘Baŋa Wɛ ye Bochare-zuru Tu mo.’ Bimbini dem konto ta wo Ofera ne, mɛ na ye Abizeri sɔ-yuu tiina nyem to mo.
25Tete dem konto ne mo Baŋa Wɛ déem tage Gideon o we, “Véi n ja n kwo nabea kam, dedaane kadwoŋi na ye bena yarepɛ to, se n laam ma n gwɛɛne bimbini delo n kwo na kaane Baal de baŋa ne to n de tega ne. N ta wó gwoni Asera nyenyego daa kam na sale de yera ne to mo n de tega ne. 26Nmo ta jege se n zege zwoŋo konto yuu ne mo n lɔ bimbini delo na yɔɔre to n pa n Tu Baŋa Wɛ. Ta kwei Asera nyenyego daa kam n na gwoni to n ma n tɔre mini se n zwɛ nabea belei tu wom n kaane n pa Baŋa Wɛ.”
27Gideon déem ma le nɔɔna fuga o tontoŋena bam wone ye ba vo ba ke kolo Baŋa Wɛ na bere‑o se o ke to. O nam ya kɔre o chorro dedaane teo kom nɔɔna bam mo. Mo kokuri, o wo wane se o ke konto wea ne, ye o ke tete ne.
28Tega na poore tetete to, mo teo kom tiina zaŋe ba na we, Baal bimbini dem bwori mo de to tega ne. Ba ta nɛ we Asera nyenyego daa kam de gwoni mo ya ka daa tera. Ba ta nɛ we nɔɔna kwei nabea balei tu wom ba ma ke kaanem ba yage bimbini delo ba na lɔge ba zege to baŋa ne. 29Ba ma bwɛ daane ba we, “Wɔ mo ke tento?” Ba na yɛ ko wone to mo ba maane we, ko ye Joasa bu Gideon mo ke keim dem.
30Teo kom nɔɔna bam ma vo Joasa tei ba ta ba we, “Pa se n bu wom nwoŋi o ba ywo-seeni se dé go‑o, kolo ŋwaane, o vaare Baal bimbini dem mo o de tega ne, ye o daare o gwoni Asera nyenyego daa kam na yeiri de yera ne to o woli da.”
31Joasa déem ma ta de balo maama na tu ba ta taane ba bere‑o to o we, “Abam wó wane Baal jaŋa á jwoŋi á jaŋe á pa‑o na? Wolo maama na wó jaŋe o pa Baal to wó te mo se tega laam poore. Baal ná seene o ye wɛ, yage-o-na se o tete jaŋe o jaŋa, kokuri to, wonto bimbini mo ba vaare ba de tega ne.” 32Ko na zege dɛ dem konto ne to, mo ba lɛɛre ba jege Gideon ba bwoi we ‘Jerubi-Baal’. Kokuri to o kwo Joasa ya tage o we, “Yage-na se Baal tete jaŋe o jaŋa, ko na ye wonto bimbini dem mo ba vaare ba de tega ne to ŋwaane.”
33Midian tiina bam, de Amaleki tiina bam dedaane dwia yalo maama na zoore wɛ-puli seeni to déem ma woli daane, ye ba bɛ Jɔdan buga kam ba vo ba chwi ba vwoa Jezerele bwolo kom wone. 34Baŋa Wɛ jworo ma chu Gideon baŋa ne dedaane dam. O ma wu nabɔnɔ o bwoŋi Abizeri sɔ-yuu kom o ke daane se ba tɔge o kwaga. 35O ta ma toŋe kwora o bwoŋi Manasɛ tiina bam maama se ba nwoŋi jara ŋwaane. O kwora kam déem ta yi Asere tiina bam, de Zebulun dedaane Nafitali tiina bam. Ba maama ma nwoŋi ba pɛ o kwaga ba pu.
36Gideon déem ma lwoori Wɛ o we, “A lage se a lɔre n na gwoni ni de amo we nmo wó tɔge amo baŋa ne n jwoŋi Isarele dwi tiina n yage to wó seene ko ji chega mo na. 37Tankɔlɔ mo tento a lage a tiŋi mɛ dé na fere mena to. Tega ná poore, ye nyɔnɔ ná bugi tankɔlɔ kom yerane, ye tega kam ná koga, mo a wó lɔre we nmo wó seene n da amo baŋa ne n jwoŋi Isarele tiina n yage nenɛɛne n na tage tei to.” 38Ko déem seene ko ke konto mo. Tega na poore to, Gideon ŋoke na mo tankɔlɔ kom yera ne o su zoŋa.
39Gideon daa ma lwoori Wɛ o we, “Yé pa se n bane zaŋe de amo. Sɛ se a ta faŋe‑m a nii de woŋo dedoa. Pa se tankɔlɔ kom yera ne ko, se nyɔnɔ bugi tega kam maama.” 40Tete dem konto ne Wɛ ta ke konto mo. Tega na poore to, tankɔlɔ kom yerane mo koga, ye tega kam maama bugi de nyɔnɔ.
Currently Selected:
Yiga tiina 6: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
