Yiga tiina 8
8
Gideon di Midian tiina bam o ti
1Efrayim tiina bam déem ma yi Gideon tei ye ba ŋwaana ba we, “Bɛŋwaane mo n ya wo bwoŋi debam se dé de nwoŋi dé tɔge dé ke jara de Midian tiina bam? Bɛ mo dé ke‑m ye n ke debam konto?” Ba déem ma tiini ba bwɛ‑o.
2O ma leiri-ba o we, “Amo na ke tei to wo yi kolo abam na ke to. Abam Efrayim tiina na toŋe fenfee kolo to daga ko dwoi amo diga kam maama na ke tei to. 3Kolo ŋwaane, Wɛ woli abam pa se á go Midian dedɛɛra balei bam, Oreba dedaane Zeebi. Amo na ke tei maama to yi konto na?” O taane dem konto ma pa se ba bane dem zuri.
Zeba dedaane Zalemuna taane
4Konto maama dedaane Gideon dedaane nɔɔna bia yatɔ bam laam yi Jɔdan buga kam mo ye ba bɛ-ka. Ba ma tiini ba bugi ye kana de chɛ-ba. 5O ma ta Sukofa tiina bam o we, “Ja! Pa-na a kwaga tɔgena bam bworobworo se ba di, kolo ŋwaane ba tiini ba bugi mo. Dé wora dé pare Midian pwa Zeba dedaane Zalemuna mo se dé ja.”
6Sukofa teo nakwa bam ma leiri ba we, “Abam ta wo jaane Zeba dedaane Zalemuna á ke á jeŋa ne, ye n lage se dé pa n jar-keira bam bworobworo. Dé bá sɛ.”
7Gideon daa ma ta-ba o we, “Á na tage konto dwoŋi to, Baŋa Wɛ nam ná pɛ se dé ja Zeba dedaane Zalemuna, amo wó kwei kagoa yuu sabare mo a ma a fere abam!”
8O na zege dáane to, o vei Peneli mo. O ta ma lwoori-ba nenɛɛne o ya na ke tei Sukofa ne to. Peneli tiina bam de déem ta leiri‑o Sukofa tiina bam leira yam dwoŋi mo. 9O ma ta ba de o we, “Amo ná di pwa bam ye a jwoori de yazura, a lage a vaare á di-dedɔrɔ konto mo a de tega ne!”
10Zeba de Zalemuna dedaane ba jar-keira bam déem ma vo ba wo Karekore ne. Nɔɔna balo maama na nwoŋi wɛ-puli jei sem se ba ke jara to laam daare nɔɔna morro fuga-tenu (15,000) yerane mo, kokuri ba nɔɔna morro bi dedaane finlei (120,000) mo tega jara yam wone. 11Gideon déem ma kwei pipiu tiina chwoŋa kalo na tigi Noba dedaane Jogebeha wɛ-puli seeni to, o vo o dare o dona bam de jara. 12Midian pwa balei bam, Zeba dedaane Zalemuna ma zaŋe ba duri se ba lu. Gideon de o nɔɔna bam ma pare-ba ba ja. Konto ma pa se vuvuga to ba dona bam maama tetare ne.
13Gideon ma zege jara jei sem ne o maa jwoori sɔŋɔ. O nam ya tɔge Heresa zwonnu tem sisworo chwoŋa kam mo. 14Ba na maa kɛ to mo ba nɛ Sukofa tiina nɔn-doŋo dedoa. Gideon ma ja‑o se o bwei‑o teo kom yiga tiina bam bwia. Nɔn-doŋo kom ma popone ba nakwa fuserepɛ barepɛ bam yera o pa‑o. 15Gideon ma vo Sukofa tiina bam tei o ta-ba o we, “Nam nii-na Zeba de Zalemuna mo tento! Abam ya ve se á woli-ne ye á ta we, ‘Nmo ta wo jaane Zeba de Zalemuna, ye n lage se dé woli n nɔɔna bam na bugi to de bworobworo.’ ” 16O ma pa se teo kom nakwa bam nwoŋi pwooni, ye o kwei kagoa yuu sabare o ma fere-ba. 17O ta ma vo o vaare Peneli di-dedɔrɔ kom o de tega ne, ye o daare o go teo kom konto nɔɔna bam.
18Gideon laam ma bwei Zeba de Zalemuna o we, “Nɔɔna bera dwi mo abam déem goa Tabora ne?” Ba ma leiri‑o ba we, “Ba ye nenɛɛne nmo na ye tei to mo. Ba maama nye de pa-bia mo.”
19O daa ma ta-ba o we, “Nɔɔna balo á na go konto to ye amo chorro mo, amo tete nu-bia. Ŋwea Tu Baŋa Wɛ wó zege amo chega kam kwaga ne we, abam ya ná wo go-ba, amo de ya wó yage abam.” 20Gideon ma ta o bu-kwea Jefere o we, “Véi n go-ba!” Bu wom maa wo sɛ se o le o se-zɔɔ kom, o ta na ye bu ye foone jege‑o to ŋwaane.
21Zeba dedaane Zalemuna déem ma ta Gideon ba we, “Nmo tete yi n go debam, kokuri to, nabiinu na ye tei to, o dam de mae konto mo.” Gideon ma seene o vo o go-ba. O ma daare o le lu-nyenno telo na wo ba kona yam ba ne to o ja o viiri.
Gideon na ke jwoni delo to
22Ko na ke fee to, mo Isarele tiina bam vei ba ta de Gideon ba we, “Debam lage se nmo mo di paare dé baŋa ne, se n bu dedaane n naa de jwa di paare dé baŋa ne. Kokuri, nmo mo jwoŋi debam n yage Midian tiina bam jeŋa ne.”
23Gideon déem ma leiri-ba o we, “Amo bá sɛ se a di paare á baŋa ne. A bu de nam bá di abam paare. Baŋa Wɛ mo wó taa ye abam Pɛ.” 24O laam ma ta-ba o we, “Woŋo dedoa a na wó lwoori abam se á ke á pa-ne to mo tento: nɔɔno maama pa-ne sabu-seŋa zwa-kwane dedoa se ko nwoŋi wonnu telo o na jwoŋi dé dona bam tei ne to wone.” Kokuri to, Midian tiina bam déem yeini ba lei zwa-kwana mo ba zwa ne, ba na ye Isameli dwi tiina to ŋwaane.
25Nɔɔna bam déem ma leiri ba we, “Dé sɛ de wopwolo.” Ba ma lware gare-jale tega ne pa se nɔɔno maama kwei zwa-kwane dedoa o na jwoŋi ba dona bam jeŋa ne to o de da. 26Gideon na tɔge ko baŋa ne o na sabu-seŋa kalo to daga dedɛ, se ko maŋe de kilo finlei to. O ta ma na lu-nyenno wonnu de zambili-laaro, ko woli dedaane nenɔŋa gwaaro telo Midian pwa na zoore to, de wo-laaro telo ba na de ba kona yam ba ne to. 27Gideon ma kwei sabu-seŋa kam konto o ma o mɔɔne kaanem gare-wogo nyenyego o zege o tete teo Ofera wone. Isarele tiina maama ma dole ba chega de Wɛ ba yage, ye ba daare ba zuli nyenyego kom. Ko ma lɛɛre ko ji kalanchogo kolo na jaane Gideon de o sɔŋɔ tiina to, pa se ba da ko ŋwaane ba tusi dedɛ.#Nwoŋim 28:6; Yiga tiina 17:5; 18:14
Gideon toone
28Isarele tiina bam déem yɔɔre ba di Midian tiiina bam mo lanyerane, pa se Midian tiina bam daa ware-ba se ba daane. Gideon ta na ŋwe to, Isarele tiina bam déem ma sii de jara se ko yi bena funɔnɔ.
29Joasa bu Gideon ma jwoori o tete sɔŋɔ o zoore da. 30O bu-baara maa ye fuserepɛ, kokuri to, o kaana daga dedɛ. 31O ta jege ka-bia kadwoŋi Sɛkɛm ne. Kaane wom ma lo bakeira o pa‑o, ye o de pa bu wom yere we Abimeleka.
32Gideon kwe lanyerane mo ye o laam te. Ba ma suli‑o o kwo Joasa yibeeli dem wone. De déem wo Abizeri dwi tiina teo Ofera ne mo.
33Gideon na yɔɔre o te to, mo Isarele tiina bam daa dole ba chega de Wɛ ba yage, ye ba jwoori ba kaane Baal jwona yam. Ba vei ba kwei Baal-Berifa mo se jwoni dem konto taa ye ba wɛ. 34Isarele tiina bam ma yɔɔre ba swei Baŋa Wɛ swia. Wonto nam ya mo jwoŋi-ba o yage ba dona balo maama na gilimi-ba to jeŋa ne. 35Ba maa wo ke lanyerane de Gideon sɔŋɔ tiina bam, de wo-laaro telo maama o na ke o pa-ba to de.
Currently Selected:
Yiga tiina 8: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
