Yiga tiina 5
5
Debora dedaane Baraki leiŋa
1Dɛ dem konto ne mo Debora dedaane Abinowam bu-baaro Baraki déem leeni leiŋa kanto we:
2Isarele tiina bembɛ mo jwoŋi yiga,
ye nɔɔna bam maama de sɛ ba nwoŋi se ba ke jara yam.
Baŋa Wɛ maŋe de tia mo!
3Abam pwa de dedɛɛra maama, cheigi-na,
se a leeni leiŋa a tei Isarele tiina Baŋa Wɛ wom.
Amo wó leeni a zuli Baŋa Wɛ mo!
4 Baŋa Wɛ, nmo déem zege Seyira laŋa ne n nwoŋi n beene!
Nmo yɔɔre n nwoŋi Edom ne mo n beene!
N na ma‑n beene to mo tega kam ziziŋi,
ye wɛyuu kom de maa chuura de na.
5Peero tem de dɔne mo Sinayi Tu Baŋa Wɛ yiga ne.
Te ma ziziŋi Isarele Baŋa Wɛ wom yiga ne.
6Maŋa kalo Anafa bu Samgare na nii tega kam baŋa ne to
ko woli dedaane Jayeli maŋa ne,
chwo-veila déem daa ba tɔge pempala ba via,
se ba tɔge chwo-balɛ yerane mo.
7Nɔɔna déem daa ba zoore Isarele teene nawuura yam ne ya,
se ko taa nii maŋa kalo Debora na nwoŋi
se o nii Isarele tiina bam baŋa ne,
ye o ye ba maama nu to.
8Isarele tiina bam déem na kuri se ba taa zuli wa-gɛ to,
jara mo to ba teene dem ne.
Ba jar-keira morro finna bam wone,
wɔ déem mo zei jara nantana naa chichwei?
9A wo mo dɛ Isarele bembɛ sem
de nɔɔna balo na sɛ ba tɔge ba ke jara to kikia yam.
Baŋa Wɛ maŋe de tia mo!
10Cheigi-na á nii,
abam balo na dɔge bonɛ-pwonnu baŋa ne
ye á jei pwal-laaro baŋa ne to,
ko woli de abam balo na vei tega ne to.
11Cheigi-na se á wó ni lei-mɔra na leeni ba ke sɔɔ tei to.
Ba kare ba tɛ Baŋa Wɛ na ke wo-kamunnu telo to.
Ba ta maa tɛ Isarele tiina bam na di ba dona tei to.
Baŋa Wɛ nɔɔna bam ma zaŋe ba teene dem wone
se ba jeeri manchwo-peena yam ne.
12Debora, zaŋe wɛɛne!
Zaŋe wɛɛne se n mɔ leiŋa
se nɔɔna sɛ.
Abinowam bu Baraki,
nmo de zaŋe wɛɛne,
se n ja balo n na di to n ja n viiri.
13Balo na daare ye ba jege chega to ma vo ba dedɛɛra bam tei.
Baŋa Wɛ nɔɔna bam ma da o ŋwaane
ba woli-ne se dé ke jara.
14Ba badwonna nwoŋi Efrayim dwi dem wone,
ba na ye balo na zeili Amaleki tiina ba tega kam ne to.
Ba maa tɔge Benjamin dwi tiina de ba chorro tem kwaga.
Jara yiga tiina de déem ma nwoŋi Makira ne ba ba.
Dedɛɛra badwonna de nwoŋi Zebulun ne ba jeeri.
15Isakara bembɛ sem ma tɔge Debora kwaga.
Chega to, Isakara nɔɔna bam de ma tɔge Baraki kwaga
ba yɔɔre ba tu bwolo kom ne mo se ba kwaare jara yam.
Ko nam ná ye Ruben dwi dem tiina,
banto ya ta jei boboŋa wone mo.
16Bɛŋwaane mo á maŋe kwaga ne ye á yere pei sem?
Á boŋe se á cheigi nayera na jege wi ba wui tei to mo na?
Chega ŋwaane to, Ruben dwi dem ya ta jei boboŋa wone mo.
17Gilead tiina bam de ma maŋe
Jɔdan buga kam wɛ-puli seeni.
Dan dwi tiina de ma maŋe kwaga ne de ba nabwooru tem.
Asere dwi dem déem ma maŋe naneo kom ni ne.
Banto wo nwoŋi ba teene dem ne.
18Ko daare Zebulun tiina bam dedaane Nafitali tiina bam
déem sɛ se ba ga ba ŋwea jara wone mo.
19Kanaan teene pwa bam nwoŋi se ba ke jara.
Ba ma kwaare jara Taanaka ne,
se ko maŋe dedaane Megido bwi sem.
Ba nam gɛ lu-nyenno wonnu se ba ja ba viiri.
20Wɛyuu chalechwe sem ma ke jara se vane Sisera.
Se kare wɛyuu kom maama ne mo se via,
ye se lɔ o kwaga ne.
21Kison na-ŋone sem ma chwooli-ba se ja viiri;
Kison bu-tola kam na wora taa wuu to mo konto.
Amo wó da konto ŋwaane a vo yiga mo de dam.
22Sisein-nɔɔna bam wurigi mo se maa kɛa.
Se napɔɔna yam maa guri tega.
23 Baŋa Wɛ maleka kam maa we:
“Sɔɔle-na lwarem á yage Meroza teo kom baŋa ne!
Sɔɔlem tiini de taa wo ko nɔn-bia bam de yuu ne,
kokuri, ba wo sɛ ba nwoŋi se ba woli Baŋa Wɛ,
se o nɔɔna bam wane ba jeeri ba dona babɛ sem jara wone.”
24Jayeli mo tiini o jege yu-ywoŋo kaana maama wone!
O maa ye Keni tu Hebera kaane
ye o jege yu-ywoŋo o dwoi kaana balo maama na zoore vwoa wone to.
25Sisera déem lwoori na mo se o nyɔ.
Jayeli ma kwei nayela o pa‑o.
O déem ma beeri veira zoŋa,
o ke nayel-pepala da o pa‑o.
26O déem zei vwei paare mo o jagwia ne,
ye o jazem dem jege bagwori.
O ma pa paare dem o lɔ Sisera yuu kom o chochoge.
Paare dem ma tɔge o zwa-kwaale ne de nwoŋi de ja tega.
27Sisera sesare mo o to tega ne o tiga.
O maŋe Jayeli nɛ seeni mo o te o tiga yiri-titi.
28Sisera nu maa zege o diga takworo ni ne o yere jei maama.
O ta ma leesi o nii chwoŋa ne ye o we,
“Bɛ mo ke pa se o dáane konto, ye o ta wo tu?
A ta wo nigi o toroko kom na maa beene to.
Bɛŋwaane mo o sisein-nɔɔna bam napɔɔna ta ba dɔna?”
29Kaana balo na zege o tei ne to ma leiri taane ba bere‑o,
ye o jege-de o ma zuri o bochare taa we,
30“Ba na dáane to, ba wora ba pɔɔre wonnu telo ba na vere jara wone to mo ba pae daane.
Jar-keiru maama bá ga kaane dedoa naa balei se o ja o jwoori sɔŋɔ.
Gare-nyenno maa wó taa ye Sisera nyem,
ye zambili-nyenno tem taa ye amo tete nyem.
Ko ye wonnu tento ŋwaane mo pɛ ba dáane.”
31 Baŋa Wɛ, sɛ se nmo dona maama te toone dem konto dwoŋi.
Ko daare balo na swoi nmo to,
pa se ba taa nyeena de dam
ne wea na nye de dam ka pulim maŋa ne tei to.
Isarele tiina bam déem ma sii de jara se ko yi bena finna.
Currently Selected:
Yiga tiina 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)