Yiga tiina 16

Samson dedaane Delila taane

1Dɛ dedwe mo Samson déem zaŋe o vo Gaza teo o na ka-tola. O ma zo o peini ded‑o. 2Ba ma ta Gaza tiina bam ba we, “Samson wo ywo-seeni mo!” Ba de ma vo o na wo mɛ to, ye ba kaare-ko ba pu. Tete dem konto ne ba ma cheigi teo kom manchwo-peena yam ne. Ba maa tigi ba sia ye ba we, “Dé wó gwoni tega zezenzeŋa mo dé vo dé li‑o dé go.”

3Samson ma tigi o cheigi tete-koro maŋa. Tega na kweere to, mo o vei o vaŋe teo kom manchwo-peo kom o guri. Dɛ selo na moore tega ne to, de bworo kolo ba na mae ba pe teo kom ni to, de ko beiŋa kam maama mo o vaŋe o le. O ma kwei-te o daŋe o bakale baŋa ne o ja o di o tiŋi peo kolo na tole ko nae Heboron to yuu ne.

4Konto na ke ko kɛ to, mo Samson daa nɛ kaane wodwoŋi, o na zoore Sorɛki bwolo ne. Kaane wom yere mo ye Delila. Samson boboŋa ma zo o wone. 5Filisi teene yuu tiina bam ma vo kaane wom tei ba ta‑o ba we, “Kwaane n soge‑o se n lɔre o dam-fɔrɔ kom na nwoŋi mɛ to, se dé lɔre dé na wó ke tei dé ja‑o dé vɔ mɔle mɔle to. Se debam dedoa dedoa wó ŋwe‑m lu-nyenno sabu-dala bia fuga-dedoa (1100) ko ŋwaane.”

6Delila ma da ko ŋwaane o bwei Samson we, “Ja! Ta n bere-ne nmo dam-fɔrɔ kom na nwoŋi mɛ to. Ba nam wó ke tɛ mo ba wane‑m ba ja se n yé wane lege-lege n ke?” 7Samson ma leiri‑o o we, “Ba ná kwei taŋa ŋon-donno terepɛ telo ta na wo koge to ba ma vɔ-ne, amo wó taa bwona mo ywale-ywale nenɛɛne nɔɔna maama na ye tei to.”

8Filisi yuu tiina bam ma beeri taŋa ŋon-donno terepɛ ta na wo koge to, ba ja ba vo ba pa kaane wom, ye o ma-se o vɔ Samson. 9Delila nam ya pɛ se nɔɔna badwonna mo dale diga kadwoŋi ne ye ba cheiga. O ma laare o bwoŋi Samson o we, “Samson! Filisi tiina bam beene se ba ja‑m ywoo!” Samson ma pɛ o zaŋe o vaŋe taŋa ŋone sem o kɔ lela nenɛɛne gare-ŋona na dwei mini ye ka di tei to. Ba maa wo wane ba lɔre o dam-fɔrɔ kom na zege mɛ to.

10Delila daa ma ta‑o o we, “Nmo na gane-ne konto to, a maane we n jege-ne mo n mɔna. Ja! Ta n bere-ne nɔɔna na wó ke tei ba ja‑m to.” 11Samson ma ta‑o o we, “Ba ná mɛ ŋon-dwe selo ba ta na wo mɛ ba ke kolokolo to ba ma ba vɔ-ne, a laam wó taa bwona mo nenɛɛne nɔɔna maama na ye tei to.”

12Delila ma beeri ŋon-dwe o ma o vɔ‑o. O daa ta ma pa se nɔɔna bam dale diga kam ne ba cheiga. O laam ma laare o we, “Samson! Filisi tiina bam beene se ba ja‑m ywoo!” Samson déem ma zaŋe o vaŋe tento o kɔ nenɛɛne gare-ŋona dwoŋi to.

13Delila daa ma ta‑o o we, “Nmo ta jege-ne mo n gana, ye n daare n mɔne-ne. N bá‑n ta ba na wó ke tei ba ja‑m to n bere-ne na?” O ma leiri‑o o we, “Nii a yu-ywei sem na pane kuni berepɛ tei to, se n laam ja-se n ke daane n vɔ n ke paare yera ne, nenɛɛne ba na dole gare-yi tei to. N ná ke konto, amo wó taa bwona mo nenɛɛne nɔɔna maama na ye tei to.”

14Delila ma gane‑o pa se o dɔ. O ma ja o yu-ywei sem na pane kuni berepɛ to o vɔ o meeli gare-yi ba na wora ba dole to yera ne, ye o daare o pa-se de paare. O laam ma laare o we, “Samson! Filisi tiina bam beene se ba ja‑m ywoo!” O ma pɛ o zaŋe dɔɔm wone, ye o vaŋe paare dem o guri. Gare-yi-dolo kom dedaane gare-yi dem maama maa wo o yera ne.

15Kaane wom ma ta‑o o we, “Nmo na tɛ we n swoi-ne to, bɛ mo ye n wo ke n wo dedaane amo? N gane-ne tento n ke kuni betɔ, ye n ta wo sɛ se n ta n dam-fɔrɔ kom na zege mɛ to.”

16Dɛ maama o ma tiini o jege Samson yia o gigila de taane dem konto. Samson yera ma ba ya chɛ, ye o kare o beeri toone jei. 17O ma ga ko ŋwa ye o ta o chega kam o bere kaane wom o we, “Fana ta wo gwoni amo yu-ywei sento. Ko zege maŋa kalo a na wo a nu puga ne to mo Wɛ pɔɔre-ne se a taa ye Naziri tu a pa‑o. Ba ná fane a yu-ywei sem, amo wó ga a dam dem mo, pa se a taa bwona ywale-ywale nenɛɛne nɔɔna maama na ye tei to.”

18Delila ma lɔre we o tage o chega maama mo o bere‑o. O ma toŋe o bwoŋi Filisi yuu tiina bam ye o ta de-ba o we, “Jwoori á ba-na, se o laam tage chega kam jei o bere-ne.” Nɔɔna bam ma ja o sabu kom ba woli da ba ba ba pa‑o. 19O ma gane Samson pa se o peini o nɛ baŋa ne o dɔ. O laam ma bwoŋi nɔɔno pa se kotu ba o fane Samson yu-ywei sem na pane kuni berepɛ to. Delila ma gane Samson pa se o ba o ga o dam dem. 20O ma laare o we, “Samson! Filisi tiina bam beene se ba ja‑m ywoo!”

O ma pɛ o zaŋe dɔɔm wone ye o sigi o tete ne o we, “Amo wó vere a tete mo a yage nenɛɛne a na yeini a maŋe a ke tei to.” O daa wo lɔre we Baŋa Wɛ yage‑o. 21Filisi tiina bam ma ja‑o, ye ba daare ba chochɔrege o yi-chele-bia ba le. Ba ma ja‑o ba vo Gaza teo wone, ye ba kwei channa chegero ba ma lei‑o ba zege. O déem na wo peena diga ne konto to, ba maa jege‑o ba choe ba muni. 22Samson yu-ywei sem daa ma bobo se se taa nwoŋa.

Samson toone

23Filisi yuu tiina bam ma jeeri daane se ba kaane ba jwoni Dagon, se ba daare ba di kuri dedaane wopwolo.#1 Samuwel 5:2 Ba maa we, “Dé wɛ dem pɛ se dé jeŋa zo dé dono Samson.” 24Nɔn-kɔgɔ kom maa na nɛ‑o to, mo ba bobo se ba taa seini ba wɛ dem ye ba we:

“Dé wɛ dem pɛ se dé jeŋa zo

dé dono wom.

Wonto ya mo chɔge dé teo kom,

ye o go debam dedɛ.”

25Ba na wora ba di ywoni konto to, mo ba bwɛ daane ba we, “Ja-na Samson á ba ywo-seeni se o taa ke mola se dé taa mɔna.” Ba ma ja Samson ba nwoŋi peena diga kam ne ba ba ba tei ne. O ma seene o ke pa se ba mɔna. Ba ma pa o zege sɔŋɔ kom ywoa yalei tetare ne. 26Samson ma ta bu wolo na jege‑o o vaŋe to o we, “Pa se a dwei ywoa yalo na jege sɔŋɔ konto ya zege to, se a lage se a sale ya yera ne mo.”

27Sɔŋɔ kom déem nam su de nɔɔna mo, baara de kaana. Filisi yuu tiina bam maama de maa wora. Sɔŋɔ kom nayuu nɔɔna bam ye morro tetɔ mo na zege ba nii Samson na ke tei to, ye ba ke‑o ba mɔna. 28Samson ma lwoori Baŋa Wɛ o we, “Yuu-tu Baŋa Wɛ, guli amo gula, se n jwoori n pa-ne dam bedwe yerane. Amo Tu Wɛ, pa se a daa ke keim dedwe a ma yiri jene Filisi tiina bam baŋa ne, de ba na le a yi-chele-bia bam to.”

29Samson ma to o gorege ywoa yalei yalo na jege sɔŋɔ kom ya zege ko tetare ne to. O jazem maa jege ywei dedwe, ye jagwia kam de jege dedem dem. O laam ma yigi-ya. 30O ta ma laare o we, “Yage se amo dedaane Filisi tiina bam tɔge daane dé te.” O ma tiini o yigi sɔŋɔ kom ywoa yam dedaane o dam maama, pa se ko to ko li Filisi yuu tiina bam dedaane nɔɔna balo maama na wo ko wone to. Ko ma pa se Samson toone dɛ ne, o na go nɔɔna balo to daga ba dwoi balo o na ŋwe ye o go to.

31O chorro tem dedaane ba sɔŋɔ tiina maama ma ba ba kwei o yera yam ba jwoori sɔŋɔ. Ba ma suli‑o o kwo Manoa yibeeli dem ne. Zora dedaane Esatola tetare laŋa ne mo konto. O déem nii Isarele tiina bam baŋa ne bena finlei mo.

Currently Selected:

Yiga tiina 16: KBG

Highlight

Copy

Compare