Yiga tiina 15

Samson yiri o jene Filisi tiina bam yuu ne

1Ko déem na ke fee se ko maŋe de banina zagem maŋa to, mo Samson vei se o kaare o kaane wom o nii. O ma ja boŋo o vo se o pa‑o. O ma ta o kaane wom kwo o we, “A lage se a zo a kaane wom diga mo.” Kaan-kwo wom maa wo sɛ, ye o we, 2“Amo ya boŋe we n daa‑n ba lage‑o mo, pa se a kwei‑o a pa n yuudwoŋi wom. Kaane wom nyaane mo tento, ye o maŋe o lamma o dwoi zembaaro wom. N ná lage‑o, se a kwei a pa‑m.”

3Samson ma ta ba maama o we, “Amo laam nɛ chwoŋa se a toŋe kolo a na lage to Filisi tiina bam yera ne, ye ko bá taa ye a yiga!”

4Samson ma vo o ja nywoŋ-kuri bia yatɔ (300). O vɔge-se mo selei selei se nabila yam seeni, ye o daare o beeri gaao o vɔ-ko o meeli se nabila yam ne. 5O ma tɔrege mini gaaro tem wone, ye o yage nywoŋ-kuri sem se se duri se zo Filisi tiina bam kare sem wone pa se mini dem zwɛ ba wodiiru tem maama. Mena yalo na bege ya ti ye ba ta wo zage-ya to, de men-pwoa yam, de Vini teeni, de Olivi teeni dem maama mo chɔge.

6Filisi tiina bam ma bwei daane ba we, “Wɔ mo ke tento?” Ba ma leiri ba we, “Samson mo toŋe konto. Ko nam ye Timina tu wom na kwei Samson kaane wom o pa o yuudwoŋi wom to ŋwaane mo o ke konto.” Filisi tiina bam ma vo ba zwɛ kaane wom de o kwo ba go. 7Samson ma du duuri o we, “Abam na toŋe totoŋ-lɔŋɔ konto to, amo ná wo yiri a jene á yera ne, a bá yage.” 8O ma tiini o seene yia o jeeri-ba de jara, ye o go ba dedɛ. Ko kwaga ne mo o vei Etam, o vo o zoore peo bɔɔne wone.

9Filisi tiina bam déem ma vo ba chwi ba vwoa Judah laŋa ne, ye ba kwaare jara dedaane Lehi tiina bam. 10Judah dwi tiina bam ma bwei-ba ba we, “Bɛŋwaane mo abam tu se á kwaare jara dedaane debam?” Ba de ma leiri ba we, “Debam tu se dé ja Samson mo se dé vo dé ke‑o nenɛɛne o na ke debam tei to.”

11Judah tiina bam nɔɔna morro tetɔ ma vo peo bɔɔne dem na wo Etam ne to, ye ba laam ta Samson ba we, “Nmo yei we Filisi tiina bam mo tei debam. Bɛ mo ye n ke debam konto?” O ma leiri o we, “Ba na ke-ne tei to ŋwaane mo amo de ke-ba konto.”

12Nɔɔna bam ma ta‑o ba we, “Dé nam tu se dé ja nmo dé ke Filisi tiina bam jeŋa ne mo.” Samson ma leiri-ba o we, “Du-na duuri á pa-ne we abam tete bá go-ne.” 13Ba ma sɛ ye ba we, “Debam za laga se dé vɔ‑m mo, dé laam kwei‑m dé ke ba jeŋa ne, se de bá go‑m.”

Ba déem ma kwei ŋon-dwe selei ba ma vɔ‑o, ye ba ja‑o ba nwoŋi peo bɔɔne dem ne ba jwoori ba teo kom. 14Ba na jaane‑o ba yi Lehi to, mo Filisi tiina bam chwoosi ba yaga ye ba duri ba jeeri se ba jwoŋi‑o. Baŋa Wɛ jworo kom ma chu o baŋa ne de dam. Ŋone sem ma kɔ lela nenɛɛne mini na to bobɔɔro wone ye ko ye tei to. 15Samson ma dole o yi o na bonaga peyaa-ku-doŋa na tigi dáane. O ma twe o jeŋa o kwei-ka o ma o go nɔɔna moro. 16Samson ma ta o we:

“A kwei bonaga peyaa kua mo,

a ma a go-ba a tigisi pwei de pwei a tiŋi.

Amo mɛ bonaga peyaa kua mo,

a ma a go nɔɔna moro.”

17O na ŋɔɔne konto o ti to, mo o dole peyaa kua kam o yage. Ba déem ma pa jei sem yere we ‘Ramafa-Lehi’#15:17 Ramafa-Lehi kuri mo yePeyaa-kua peo..

18Samson keim dento maama kwaga ne mo na-nyɔm tiini de chɛ‑o. O ma keeri o jare Baŋa Wɛ o we, “Nmo mo tɔge n tontoŋeno baŋa ne n di jara yanto. N laam nam lage se a te leile mo dedaane na-nyɔm, se dwi-gɛ tiina banto ja-ne mɔle yerane na?” 19Baŋa Wɛ ma pa se bɔɔne puri tega ne, ye na ta ba nwoŋi pa se o nyɔ. O ma jwoori o na dam.#Izaya 40:29 Lehi ne mo konto kea. Ba maa bwoi jei sem yere we, ‘En-Hakore.’ Buli-yi dem ta wo Lehi ne dedaane zem maama.

20Maŋa kalo ne Filisi tiina bam na tei tega kam to, Samson mo nii Isarele tiina bam baŋa ne bena finlei.

Currently Selected:

Yiga tiina 15: KBG

Highlight

Copy

Compare