Nia Gulim 6

Baŋa Wɛ ni delo na dwoi maama to

1“Baŋa Wɛ ni dem mo tento. O déem pɛ amo ni se a pa abam mo lɔre o chullu tem de o bera yam maama na ye tei to se á ta‑á tɔge-ya nenɛɛne á ná tu á bɛ Jɔdan buga kam, ye á zo se á jwoŋi á tega kam á ta‑á tei. 2Abam de á bia dedaane á kwaga kam maama jege se á ta‑á kɔre á Tu Baŋa Wɛ wom mo taa wuu, ye á ke á tɔge o nia yanto, de o chullu tem a na wora a pae abam tento to, se á wane á dáane tega kam ne de momwɛ-dɛɛre. 3Cheigi-na Isarele tiina bam, se á ta‑á yei se á sɛ Wɛ nia yam maama. Konto wó pa se á ŋwea ke lanyerane ka pa abam, se á ta puli de kɔgɔ á ji te-fɔrɔ. Á tega kam wó taa lana de varem de kɔnɔ, nenɛɛne á nabaara Baŋa Wɛ wom déem na gwoni ni se o ke o pa abam tei to.

4Cheigi-na Isarele tiina bam, debam Tu Baŋa Wɛ wom ye o yerane dedoa mo. 5Ta‑á swoi-na á Tu Baŋa Wɛ dedaane á bochare maama, de á boboŋa maama, ko woli de á dam maama.#Matiyu 22:37-40

6Ko jege se Wɛ nia yanto a na wora a bere abam zem to taa tigi á bochare ne mo. 7Pa-na se á bia de lɔre-ya. Ta‑á tɛ-na ya taane maŋa maama, nenɛɛne á ná jei sɔŋɔ ne ye á lara, naa á ná tɔge daane á vei chwoŋa yuu ne, ko ta woli de á ná peini tete ne, naa á ná zaŋe zezeŋa maama ne. 8Lwoni-na-ya á tiŋi tɔnɔ ne se á daare á vɔ-ya á je ne, dedaane á tira ne, se á ta‑á guli ya gula. 9Popone-na-ya á tiŋi á di sem ni-bworru tem ne, se á daare á ta popone-ya á yage á manchwo-nia dɛ sem ne.

10 Baŋa Wɛ déem nam ya maŋe o gwoni ni mo de á nabaara Abaraham, de Izaak, dedaane Jakob, se o kwei tega kam konto o pa abam. Leile konto o lage o pa á zo ka wone. Te-kamuna maa wora, ye abam wo lɔge-de. 11Sɔ-fwaaro de maa wora ye te jege zela dedɛ abam na wo tiŋi-ya da. Abam ta maa wó nyɔ vola yalo á na wo koge to na bam, ye á daare á di teeni delo á na wo jeiri to bia bam, Vini tio-bia de Olivi tio-bia de woli da.#Josua 24:13 Abam nam ná tu á nae á di á sui, 12se á yé swei-na Baŋa Wɛ ni ne, kokuri wonto mo jaane abam o ja o nwoŋi Ejipti ne, á déem na ye kabɛ mɛ to.

13Ta‑á kɔre-na abam Tu Baŋa Wɛ wom, ye á toŋe á ke o boboŋa.#Matiyu 4:10 Á ná gwoni ni de nɔɔno, se á ma Baŋa Wɛ yere dem yerane á du duuri. 14Nam yé zaŋe-na á zuli wa yadwonna á woli da, nenɛɛne dwi-gɛ tiina na gilimi abam ye ba zuli wa yalo to. 15Lɔre-na se abam Tu Baŋa Wɛ wom wo á tetare ne, ye o yi page abam baŋa ne. Á ná tɔge wa yadwonna, o bane wó zaŋe de abam, ye o daare o chɔge abam tega kam baŋa ne.

16Ta‑á yei-na se á yé faŋe abam Tu Baŋa Wɛ á nii, nenɛɛne á déem na ke tei Massa ne to.#Matiyu 4:7 17Nam ta‑á cho-na á tete se á sɛ Baŋa Wɛ nia yam, de o chullu tem, ko woli dedaane o bera yam maama. 18Ta‑á ke-na kolo maama na lana ye ko su Wɛ yi to. Konto mo, á ŋwea wó ke lanyerane ka pa abam, ye á daare á zo á jwoŋi te-ŋoŋa kanto kam á ta‑á tei, nenɛɛne Baŋa Wɛ na pwooli de á nabaara bam se o ke tei to. 19Abam laam wó wane á dona maama á di, ye á daare á zeili-ba, nenɛɛne Baŋa Wɛ na tage tei to.

20Jwa seeni maŋa de maŋa, abam bia wó ba ba bwei abam we, ‘Bɛŋwaane mo debam Tu Baŋa Wɛ déem pɛ abam o nia yanto, de o bera yam, dedaane o chullu tem maama, se dé taa tɔga?’ 21Abam laam maa wó ta á bere-ba we:

‘Debam déem ye Ejipti Pa-faro wom kabɛ mo. Baŋa Wɛ déem ma tɔge o dam-fɔrɔ kom baŋa ne o jwoŋi debam o yage. 22Debam yi déem mo nɛ o na ke wo-kenkagela dedaane totoŋ-kamuna yalo na jege foone to, ye o yage-ya Ejipti tiina bam de ba Pa-faro wom baŋa ne dedaane o nakwa maama yuu ne to. 23O déem ma ja debam o nwoŋi teo kom konto ne, ye o daare o ja debam o ba ywo-seeni, se dé wane dé zo tega kanto nenɛɛne o déem na pwooli dedaane dé nabaara bam se o ke tei to. 24Debam Tu Baŋa Wɛ laam ma pa debam ni se dé taa sɛ o nia yanto maama ye dé kɔre‑o. Dé ná seene dé ke konto, wonto de wó taa nii debam baŋa ne, ye o daare o pa se dé woŋo maama da chwoŋa ko pa debam, nenɛɛne ko na ye tei zem to. 25Dé ná seene dé yia dé tɔge o bera yam konto maama, nenɛɛne o na pɛ debam ni tei to, ko wó pa dé na chega o yiga ne.’ ”

Currently Selected:

Nia Gulim 6: KBG

Highlight

Copy

Compare