Nia Gulim 7

Baŋa Wɛ na tei o nɔɔna bam tei to

1“Abam Tu Baŋa Wɛ wom wó pa á ta‑á tei tega kalo á na lage á zo leile to. O maa wó pa á na dam se á di dwi-gɛ tiina dedɛ ye á zeili-ba tega kam ne: Hiti tiina bam, de Giragasi tiina bam, de Amori tiina bam, de Kanaan tiina bam, de Pɛrizi tiina bam, de Hivi tiina ko woli de Jebusi tiina bam. Dwia konto maama yarepɛ daga dedɛ ye ya ta damma ya dwoi abam. 2Baŋa Wɛ nam wó ke-ba á jeŋa ne se á wane-ba á di. O ná seene o ke konto, se á yɔɔre á chɔge-ba. Abam nam yé ke-na ni-sɛɛm de-ba, naa á duri ba ŋwaŋa de fee de. 3Daa ta lɔre-na se á yé kwei ba bukwa á ma á ji á kaana, naa á kwei-ba á pa á bia. Nam yé zaŋe-na á kwei á tete bukwa á pa-ba se ba di ba ma ba ke ba kaana. 4Abam ná sɛ pa se konto ke, ba wó soge á bia mo pa se ba tusi ba taa zuli wa-yɔɔro ye ba daare ba lɔ Baŋa Wɛ kwaga ne. Konto nam wó pa se Baŋa Wɛ bane mo zaŋe abam baŋa ne se o chɔge abam lela.#Ezera 9:12

5Konto ŋwaane, abam ná wane dwi-gɛ tiina bam konto, se á mage ba kaanem bimbina yam á de tega ne. Á ta jege se á lɔ kandwa yalo ba na chwi ba jwona ŋwaane to. Gwoni-na ba Asera nyenyego dɛ sem#7:5 Asera = jwoni dedwoŋi Kanaan tiina na jege ba zuli to á de tega ne, se á daare á ke mini á zwɛ ba jwona yam maama. 6Kokuri to, abam ye nɔɔna balo na ye á Tu Baŋa Wɛ wom nyem mo. O déem kuri abam mo logo baŋa dwi maama wone se á ta‑á ye wonto tete lonne jejegero.#1 Piita 2:9

7Nam lɔre-na we Baŋa Wɛ na kuri abam konto to, ko dae we á kɔgɔ mo daga ko dwoi dwi-gɛ tiina maama. Chega ŋwaane to, abam déem mo tiini á muri nɔɔna maama wone. 8Ko nam ye o na jege abam swono to ŋwaane mo Baŋa Wɛ kuri abam se á ta‑á ye o nyem. Ko ta maa ye o na pwooli dedaane á nabaara bam se o ke tei to ŋwaane mo.#Jeremia 31:3 Mo kokuri o déem toŋe de dam o jwoŋi abam Ejipti Pa-faro wom jeŋa ne o yage pa se á nwoŋi teo kolo á ya na ye kabɛ da to wone. 9Ta‑á yei-na we abam Tu Baŋa Wɛ wom yerane mo ye Wɛ chekke. Á wae á sale‑o, ye o bá kwane o ni de ni-gwonim delo o na ke o swono kom ŋwaane to. O ta wó taa swoi balo na swoi‑o ye ba tɔge o nia yam to, ye o bá yage-ba, se ko yi ba dwi dem kuni moro laŋa ne. 10Ko nam ná ye balo na ve‑o to, o wó yɔɔre o waare-ba. O bá dáane ye o chɔge-ba lela. 11Mo kokuri, ta‑á yei-na se á ta‑á toŋe á tɔge Wɛ nia yam, de o bera yam, de o chullu tem, ne amo na pɛ abam zem to.

Wɛ swolim na wó ba ba baŋa tei to

12Abam ná cheigi Wɛ nia yanto ye á daare á toŋe á tɔge-ya de chega, Baŋa Wɛ swono kolo na ba ti to de wó taa wora de abam, ne o na gwoni ni tei de á nabaara bam to. 13O wó taa swoi abam, ye o swɛ abam swolim pa se á kɔgɔ kom puli dedɛ. Á ná zo tega kalo Baŋa Wɛ na pwooli de á nabaara bam se o pa abam to, o zaane wó taa wo á bia baŋa ne, de á wodiiru baŋa ne, ne ko ná ye mena, de sana, de nuga maama. O zaane ta wó taa wo á vara baŋa ne, á naane, de á pei, dedaane de bia maama 14Abam wó na Wɛ swolim á dwoni tega baŋa dwia yam konto maama. Wolo na ba lore to, naa varem wolo na ba lore to daa bá taa wo abam wone. 15Baŋa Wɛ tete mo wó che abam de jaweero dwi maama. O bá pa chwoŋa se jawe-chɛɛro telo dwi na to Ejipti tiina bam yera ne to ba abam baŋa. O nam wó kwei-te o ke á dona yera ne mo. 16Nam chɔge-na dwi-gɛ tiina balo maama Baŋa Wɛ na wó kwei o ke á jeŋa ne se á chɔge to. Yé duri-na ba yibwona, nam yé zuli-na nɔɔna bam konto jwona. Abam ná ke konto, ba wó soge abam se á tusi amo yiga ne.

17Abam wae á boŋe á tete ne we, ‘Debam bá wane teene dento nɔɔna dé zeili, ba na tiini ba dana ba dwoi debam to ŋwaane.’ 18Nam yé ta‑á fona de-ba. Guli-na abam Tu Baŋa Wɛ na toŋe tei o chɔge Ejipti Pɛ wom de o nɔn-bia bam to. 19Abam tete yi mo nɛ Baŋa Wɛ na tɔge o dam baŋa ne o toŋe wo-kamunnu dedaane wo-kenkagela pa se jawe-chɛɛro ja Ejipti tiina bam ye o daare o vere abam ba jeŋa ne tei to. Guli-na á Tu Baŋa Wɛ wom déem na ke tei, se o ta wó ma dam dem konto mo o chɔge nɔɔna banto abam laam na kɔre tento to. 20O maa wó pa se vuvuga#7:20 vuvuga naa keilimuni to á dona tetare ne, se balo na duri ba lu ba seigi to tete de na chɔgem. 21Mo kokuri, á ba jege se á ta‑á kɔre nɔɔna bam konto. Baŋa Wɛ wora de abam. Wonto nam mo jege dam-fɔrɔ ye o maŋe se nɔɔna taa kɔre‑o. 22Abam Tu Baŋa Wɛ wom tete mo lage o taa zeili dwi-gɛ tiina bam konto o yage fee fee se abam zo ba tega kam wone. Abam bá yɔɔre á zeili-ba bedwe baŋa ne. Ko ná ke konto, kago-vara mo wó puli da ba daane abam. 23Baŋa Wɛ nam wó kwei á dona bam o ke á jeŋa ne. O wó de vuvuga ba tetare ne, se ba na chɔgem ba ti. 24O maa wó kwei ba pwa o ke á jeŋa ne, se á go-ba pa se ba dwi saare logo baŋa ne. Nɔɔn-nɔɔno bá wane abam o che de á na lage á ke kolo to. Abam maa wó chɔge ba maama. 25Zwɛ-na ba jwona yam. Yé pa-na se á fera zo sabu-seŋa, naa lu-nyenno telo na wo jwona yam yera ne to. Nam yé lɔɔne-na-te. Abam ná ke konto, te wó ja abam ne kalanchogo tei. Jwona kaanem ye totoŋ-vɛɛsa mo á Tu Baŋa Wɛ yiga ne. 26Yé ja-na wo-zɔɔna yam konto dwi á zo á sam wone, se konto ná kea abam de wó na chɔgem mo ne wonnu tem konto na maŋe de chɔgem tei to. Yɔɔre á ta‑á chuli-te-na, se te maŋe de chɔgem mo.”

Currently Selected:

Nia Gulim 7: KBG

Highlight

Copy

Compare